Givim Bel Yet Long Wok Autim Tok
1 Inap hamas yia yu bin givim bel long autim tok bilong Kingdom? Ating faipela o tenpela yia samting? Sampela brata sista i bin autim tok inap twenti o teti yia samting na ol i wok strong yet. Wanem samting i mekim na ol i no les? Olsem wanem yumi ken stap gut long oganaisesen bilong Jehova na wok gut wantaim em long dispela wok em i mekim i ‘kamap hariap long taim em i makim pinis’?—Ais 60:22.
BIHAINIM PASIN BILONG JEHOVA LONG GIVIM BEL
2 Ol manmeri i autim tok bilong Kingdom, i stret long ol i tingim ol yet i olsem ol wanwok bilong God. (1 Ko 3:9) Ol i lukim em i strong long laikim pasin i stret na ol tu i mekim olsem. Planti tausen yia bipo Jehova i bin autim gutnius long namba wan taim, na em i bin strong long kirapim lain bilong em long ol tu i mas autim dispela gutnius. (Ga 3:8) Planti tausen yia i kamap i go pinis, tasol Jehova i tingim yet ol samting bilong Kingdom em i laik mekim. Jehova “i gat strongpela laik tru” long kamapim ol samting em i bin tok promis long en, na em i kirapim lain bilong em tu long autim tok bilong Kingdom long olgeta hap.—Ais 9:7; Mt 24:14.
3 Maski yumi bin autim tok longtaim liklik o sotpela taim tasol, sapos oltaim yumi tingim ol tok i tru bilong Kingdom, dispela bai helpim yumi long bihainim pasin bilong God na givim bel long autim tok. Sapos yumi stadi long Baibel, bai yumi kisim spirit bilong Jehova. Dispela bai helpim yumi long holimpas pasin bilong givim bel long autim tok bilong em.—Ro 12:11, 12; Ef 5:1.
TINGIM GUT PASIN BILONG JISAS
4 Krais Jisas em i nambawan piksa tru bilong man i givim bel long autim tok. Em i mekim yet i go inap long taim em i dai, maski em i kisim bikpela pen. Hibru 12:2, 3 i makim wanpela samting i helpim Jisas long i stap strong. Em i tingim gutpela pe God i laik givim long em. Taim yu tingim ol gutpela samting Jehova bai mekim, ating dispela i kirapim yu long givim bel moa yet, a? Tingim: Sapos longtaim pinis yumi givim bel long mekim wok bilong Jehova, em gutpela; tasol bilong kisim gutpela pe olsem laip oltaim, yumi mas stap strong inap long las de.—Mt 24:13.
5 Taim yumi mekim wok bilong Jehova, dispela yet inap kirapim yumi long givim bel moa yet long mekim wok. Tingim gutpela pasin Jisas i mekim em Jon sapta 4 i stori long en. Skin bilong em i les. Em i mas malolo liklik na kisim kaikai na wara. Ol disaipel i go long taun bilong kisim kaikai, tasol taim ol i kam bek i olsem bikman bilong ol i no hangre moa na skin bilong em i no les. Wanem samting i mekim na skin bilong em i strong gen na i olsem em i malolo pinis? Em olsem: Em i mekim wok bilong God na gutpela samting i kamap. Wanpela meri Samaria i bin harim tok bilong Jisas na kwiktaim em i bilip. Em i toktok wantaim ol wanples bilong em na ol i kam long Jisas bilong harim tok bilong em. Em nau, ol dispela manmeri ol i redi long Jisas i bungim ol bilong kisim laip oltaim! Wantu Jisas i bin redi long helpim ol. Gutpela pasin Jisas i mekim i kirapim yumi long mekim yet wok. Yumi save sapos man i putim gut yau na bihainim ol tok em i harim, bai em inap kisim gutpela laip long bihain.
SAMTING BILONG TILIM LONG DISPELA MUN
6 Long mun Novemba bai yumi tilim Baibel New World Translation wantaim buk Famili, long K5.00. Tru sampela taim yumi bungim ol man i bel nogut long wok bilong yumi, o ol i no hariap long bilipim ol tok bilong yumi, o ol i no tingim God na Baibel, tasol no ken larim ol dispela samting i mekim yumi bel hevi. Sapos pes bilong yumi i lait na yumi givim bel long tilim ol dispela buk, ating dispela bai helpim sampela bilong ol long save, Tok bilong God inap helpim gut man i bihainim ol tok bilong en. (Hi 4:12) Tokim ol, bai yumi amamas long stadi wantaim ol long Tok bilong God na bai ol tu inap “stap laip” na “stori long ol samting Bikpela i bin mekim.”—Sng 118:15-17.
7 Yumi ken bilip olsem taim yumi givim bel long autim tok long mun Novemba, Jehova, em as bilong pasin bilong givim bel, em bai givim planti gutpela blesing long yumi olgeta.
[Ol Askim]
1. Yumi ken givim wanem ol askim long yumi yet long ol samting bilong wok autim tok long dispela taim nau?
2. Olsem wanem Jehova i bin lukautim wok bilong autim tok bilong Kingdom?
3. Yumi mas mekim wanem na bai yumi givim bel long autim tok?
4. Kolim wanpela samting i helpim Jisas long givim bel long autim tok i go inap long taim em i dai.
5. Olsem wanem wok autim tok inap kirapim yumi long givim bel moa yet long dispela wok?
6. (a) Bai yumi tilim wanem samting long mun Novemba? (b) Yumi mas autim tok bilong Kingdom olsem wanem?