Long Dispela Memorial, Bai Yu Bihainim Pasin Bilong Jehova na Jisas?
1. Ol Witnes Bilong Jehova i wok strong long mekim wanem long taim bilong Memorial?
1 Jehova i gat laik tru long kamapim ol samting em i tingting pinis long mekim. Aisaia 9:7 i kolim sampela bilong ol blesing bilong Kingdom Bilong God na tok: “Bikpela I Gat Olgeta Strong i gat strongpela laik tru long . . . mekim ol dispela samting i kamap.” Olsem tasol, taim Pikinini Bilong God i mekim wok autim tok long graun, em i kamapim olsem em i laik tru long helpim lotu i tru. (Jon 2:13-17; 4:34) Long olgeta yia long taim bilong Memorial, planti milion pablisa long olgeta hap i wok strong long bihainim pasin bilong Jehova na Jisas. Ol i givim bel long mekim bikpela wok moa bilong autim tok. Bai yu insait long dispela wok?
2. Pasin bilong givim bel tru bai kirapim yumi long mekim wanem long Mas 7?
2 Tilim Invatesen Bilong Memorial: Long dispela yia, wok bilong tilim invatesen bilong Memorial bai kirap long Sarere, Mas 7. Kirap nau na stretim ol samting bilong insait tru long wok autim tok. Ol kongrigesen bai kisim bikpela amamas taim ol i wok strong long inapim gut teritori bilong ol. Long rot bilong invatesen o jw.org, wok strong long invaitim ol Baibel stadi, ol gobek, wanwok, famili, na ol wanskul.
3. Olsem wanem yumi inap mekim bikpela wok moa bilong autim tok long Mas na Epril?
3 Painia Haptaim: Pasin bilong givim bel tru bai kirapim yumi long mekim bikpela wok moa bilong autim tok. Long Mas na Epril, planti bai insait long painia haptaim bikos ol yet inap makim olsem ol bai inapim 30 aua. Long famili lotu bilong yupela o long stadi bilong yu yet, beten na tingim hau yu inap mekim olsem. (Snd. 15:22) Pasin bilong yu long givim bel long insait long dispela wok inap kirapim ol narapela tu long mekim olsem. Sapos yu mekim sampela senis long i stap bilong yu bambai yu inap mekim bikpela wok moa, yu bihainim pasin bilong Jisas long givim bel long autim tok.—Mak 6:31-34.
4. Taim yumi bihainim pasin bilong Jehova na Jisas, dispela i kamapim wanem ol gutpela samting?
4 Taim yumi bihainim pasin bilong Jehova na Jisas long givim bel long mekim wok long taim bilong Memorial, dispela bai kamapim planti gutpela samting. Yumi inap autim tok long planti man moa long teritori. Bai yumi kisim bikpela amamas tru taim yumi mekim wok bilong Jehova na helpim ol narapela. (Apo. 20:35) Bikpela samting moa, yumi amamasim God na Pikinini bilong em.