Yu Save Bihainim Tru Krais?

“Mipela i bin soim yupela olgeta pasin yupela i mas wokabaut long en . . . [na] mekim ol dispela pasin moa moa yet.”​​—1 TE. 4:1.

1, 2. (a) Long taim bilong Jisas planti man i bin lukim wanem ol bikpela samting i kamap? (b) Olsem wanem na taim bilong yumi tu i wanpela bikpela haptaim?

SAMPELA taim yu tingting pinis olsem em i gutpela samting tru sapos yu bin i stap long taim bilong Jisas? Ating yu tingting olsem Jisas inap oraitim sik bilong yu, na long dispela rot yu inap abrusim ol hevi bilong sik. O ating yu amamas long lukim Jisas na harim ol tok bilong em​—yu inap kisim skul long em o lukim em i wokim ol mirakel. (Mk. 4:​1, 2; Lu. 5:​3-9; 9:11) Em wanpela gutpela samting tru long stap long taim we Jisas i mekim ol dispela wok, a? (Lu. 19:37) Kirap long dispela taim na i kam inap long nau, i no gat wanpela lain i bin lukim kain samting olsem, na samting Jisas i mekim long graun long rot bilong “givim em yet long God olsem ofa,” dispela samting i no inap kamap gen.​—Hi. 9:26; Jo. 14:19.

² Tasol taim bilong yumi tu em i wanpela bikpela haptaim tru. Bilong wanem i olsem? Nau yumi stap long taim em Baibel i tok em “taim bilong las de.” (Dan. 12:​1-4, 9; 2 Ti. 3:1) Long dispela haptaim, ol i bin rausim Satan long heven. Klostu nau, ol bai pasim em long sen na tromoi em i go daun long “hul i no gat as.” (KTH 12:​7-9, 12; 20:​1-3) Na tu, long dispela haptaim yumi gat wok long ‘autim gutnius bilong kingdom’ long olgeta hap, na tokim ol man long Paradais bai kam​—em wanpela wok i no inap kamap gen.​—Mt. 24:14.

3. Paslain stret long taim Jisas i go long heven, Jisas i tokim ol disaipel long mekim wanem wok? Wanem wok i insait long en?

³ Paslain stret long taim Jisas i go long heven, em i tokim ol disaipel: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Ap. 1:8) Wok bilong skulim ol man long olgeta hap, dispela wok tu i insait long en. Ol i laik kamapim wanem samting long dispela wok? Ol i laik kamapim ol disaipel​—em sampela man moa i bihainim Krais​—paslain long pinis i kamap. (Mt. 28:​19, 20) Yumi mas mekim wanem sapos yumi laik mekim gut dispela wok Krais i givim long yumi?

4. (a) Tok bilong Pita long 2 Pita 3:​11, 12 i kamapim klia wanem samting? (b) Yumi mas was gut long wanem samting?

⁴ Tingim tok aposel Pita i bin mekim: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De, bai em i kamap kwiktaim.” (2 Pi. 3:​11, 12) Tok bilong Pita i kamapim klia olsem long nau, long dispela taim bilong las de, yumi mas was i stap bambai oltaim yumi bihainim olgeta pasin bilong God. Wok bilong autim gutnius i insait long en. Olsem na yumi amamas tru long lukim ol bratasista bilong yumi long olgeta hap bilong graun i givim bel tru long autim tok, em wok Krais i bin givim long yumi! Long wankain taim yumi mas was gut bambai ol hevi bilong olgeta de bilong dispela graun bilong Satan na ol laik nogut bilong skin bilong yumi i no ken daunim pasin bilong yumi long givim bel long mekim wok bilong God. Olsem na yumi laik skelim olsem wanem yumi ken wok yet long bihainim Krais.

Amamas Long Kisim Ol Wok God i Givim Long Yumi

5, 6. (a) Pol i givim wanem tok amamas long ol wanbilip bilong em long Jerusalem? Em i givim wanem tok lukaut long ol? (b) Bilong wanem yumi no ken ting wok yumi kisim long God i liklik samting tasol?

⁵ Long pas aposel Pol i raitim long ol Kristen long Jerusalem, em i tok amamas long ol wanbilip bilong em long pasin bilong ol long sanap strong maski ol man i mekim nogut long ol. Em i tok: “Yupela i mas tingim gen dispela taim bipo, taim yupela i kisim lait bilong God. Long dispela taim ol i bin givim ol bikpela hevi long yupela, na yupela i karim planti pen. Tasol yupela i sanap strong na sakim ol dispela hevi.” Tru tumas, Jehova i tingim pasin bilong ol long i stap gut long em. (Hi. 6:10; 10:​32-34) Ating ol gutpela tok amamas bilong Pol i bin strongim tru ol dispela Kristen Hibru. Tasol long dispela pas yet, Pol i givim tu tok lukaut long wanpela laik bilong yumi man, na sapos yumi no bosim gut dispela laik, em inap daunim pasin bilong yumi long givim bel long mekim wok bilong God. Em i tok ol Kristen i mas was gut, nogut ol i “sakim” tok, olsem painim eskius, na ol i no bihainim ol lo bilong God.​—Hi. 12:25.

⁶ Dispela tok lukaut long laik bilong man long “sakim” pasin bilong mekim wok em God i bin givim long yumi, em i stret long ol Kristen long nau tu. Yumi luksave olsem yumi no ken ting wok Kristen bilong yumi em i liklik samting tasol o larim wanpela samting i daunim pasin bilong yumi long givim bel long mekim wok bilong God. (Hi. 10:39) Tru tumas, pasin bilong mekim wok bilong God inap makim olsem bai yumi stap laip o yumi dai.​​—1 Ti. 4:​16.

7, 8. (a) Wanem samting bai helpim yumi long holimpas pasin bilong givim bel long mekim wok bilong God? (b) Sapos yumi no strong moa olsem long pastaim, yumi mas tingim wanem samting long Jehova na Jisas?

⁷ Wanem samting bai helpim yumi long was gut na yumi no ken mekim kain kain eskius long mekim ol wok God i bin givim long yumi? Wanpela rot bilong sakim dispela pasin em oltaim yumi mas tingim tingim long bel as bilong dediket bilong yumi. Yumi bin tok promis long Jehova olsem pasin bilong mekim laik bilong em bai i stap olsem nambawan samting long laip bilong yumi, na yumi laik truim dispela promis. (Ritim Matyu 16:24.) Olsem na sampela taim yumi mas malolo na askim yumi yet: ‘Mi tingting strong yet long bihainim dediket bilong mi long God olsem mi tingim long taim mi kisim baptais? O insait long ol yia i kam mi no givim bel moa olsem long pastaim?’

⁸ Sapos yumi skelim gut yumi yet na yumi kisim save olsem yumi no givim bel long mekim wok olsem long pastaim, i gutpela yumi tingim tok bilong profet Sefanaia long strongim yumi, em i tok: “Yupela i no ken seksek nating. God, Bikpela bilong yupela i stap wantaim yupela. Strong bilong en i helpim yupela na yupela i winim pait. Bikpela bai i amamas long yupela na mekim song olsem ol manmeri i amamas long bikpela de bilong lotu.” (Sef. 3:​16, 17) Pastaim dispela gutpela tok i bilong helpim ol Israel bilong bipo em ol i lusim kalabus long Babilon na kam bek long Jerusalem. Tasol dispela tok i bilong helpim lain bilong God long nau tu. Wok yumi mekim em wok bilong Jehova, olsem na yumi mas tingim olsem Jehova na Jisas i helpim yumi na strongim yumi long mekim tru dispela wok God i bin givim long yumi. (Mt. 28:20; Fl. 4:13) Sapos yumi givim bel tru long mekim wok bilong God, em bai mekim gut long yumi na helpim yumi long kamap strong moa long ol samting bilong spirit.

Givim Bel Long “Painim Kingdom Pastaim”

9, 10. Wanem mining bilong tok piksa bilong Jisas long bikpela kaikai? Yumi inap kisim wanem skul long en?

⁹ Taim Jisas i kaikai long haus bilong wanpela hetman bilong ol Farisi, em i kamapim wanpela tok piksa long wanpela bikpela kaikai. Long dispela tok piksa, em i stori olsem ol narapela narapela manmeri i gat rot long wok king wantaim em long Kingdom bilong heven. Na em i kamapim tu mining bilong pasin bilong “sakim” dispela gutpela samting. (Ritim Luk 14:​16-21.) Long tok piksa bilong Jisas, ol manmeri em i singautim i kam long kaikai, ol i kamapim kain kain eskius na ol i no kam long kaikai. Wanpela i tok em i mas i go lukim gaden em nau tasol em i bin baim. Narapela i tok em i bin baim sampela bulmakau na em i laik go na traim ol. Na narapela i tok: ‘Mi no inap kam, nau tasol mi marit.’ Ol eskius i no gutpela. Man i baim gaden o bulmakau em i save skelim ol paslain long em i baim, olsem na i no gat wok long go hariap na skelim ol bihain. Na i no gat as na man i marit nupela i no bihainim wanpela bikpela singaut olsem, a? Olsem na yumi no kirap nogut olsem dispela man i singautim ol i kam em i kros!

¹⁰ Olgeta manmeri bilong God i ken kisim skul long dispela tok piksa bilong Jisas. Ol inap kisim wanem skul? Yumi no ken tru larim ol samting bilong yumi yet, olsem ol samting Jisas i kamapim long tok piksa bilong em, i bikpela samting long yumi na i go pas long wok bilong God yumi mekim. Sapos Kristen i no larim dispela samting i stap long ples stret bilong en, isi isi pasin bilong em long givim bel long mekim wok bilong God bai i no strong moa. (Ritim Luk 8:​14.) Bilong dispela samting i no ken kamap, yumi mas bihainim tok bilong Jisas: “Wok yet long painim Kingdom pastaim na stretpela pasin bilong God.” (Mt. 6:​33, NW) Taim yumi lukim ol wokman bilong God​—ol yangpela na ol lapun​—i bihainim dispela bikpela tok, dispela i strongim tru yumi, a? Tru tumas, planti i bin lusim sampela samting bilong skin ol i holim bambai ol i ken lusim bikpela haptaim moa long mekim wok bilong God. Long ol samting i painim ol yet ol i kisim save olsem sapos ol i givim bel tru long painim Kingdom pastaim ol bai stap amamas na belgut tru.

11. Wanem stori bilong Baibel i soim olsem em i bikpela samting long wok strong tru na givim bel olgeta long mekim wok bilong God?

¹¹ Bilong kamapim klia olsem em i bikpela samting long givim bel long mekim wok bilong God, tingim wanpela samting i kamap long laip bilong King Jehoas bilong Israel. Em i tingting planti long samting bai painim ol Israel long han bilong ol Siria, olsem na Jehoas i go krai long Elisa. Profet i tokim em long opim windo na sutim wanpela banara i go long hap bilong Siria, na dispela i makim olsem Jehova bai helpim ol long daunim dispela lain. Man! Dispela i mas strongim tru bel bilong king, a? Orait nau Elisa i tokim Jehoas long kisim ol banara na paitim graun long en. Jehoas i paitim graun tripela taim tasol. Elisa i kros long dispela, long wanem, sapos em i paitim graun 5-pela o 6-pela taim, dispela bai makim olsem ol bai “pinisim tru ol Siria.” Nau Jehoas bai winim ol tripela taim tasol. Jehoas i no givim bel long paitim graun, olsem na em i no winim tru ol Siria. (2 Ki. 13:​14-19) Yumi inap kisim wanem skul long dispela stori? Jehova bai blesim tru yumi sapos yumi givim bel olgeta na wok strong tru long mekim wok bilong em.

12. (a) Wanem samting bai helpim yumi long holimpas pasin bilong givim bel long mekim wok bilong God taim yumi karim ol hevi? (b) Stori long olsem wanem yu save kisim helpim long rot bilong wok strong long autim tok.

¹² Ol hevi i painim yumi, ol inap traim pasin bilong yumi long givim bel long mekim wok bilong God na lotuim em. Planti brata na sista i mas karim hevi long mani na kaikai samting. Sampela i bel hevi, long wanem, ol i gat bikpela sik na dispela i pasim ol long mekim bikpela wok bilong Jehova. Tasol yumi olgeta inap mekim ol samting bilong holimpas pasin bilong givim bel long mekim wok bilong God na bihainim tru Krais. Plis tingim sampela tok na skripsa i stap long blok “Wanem Samting Bai Helpim Yu Long Bihainim Yet Krais?” Tingim olsem wanem yu ken bihainim tru ol dispela tok. Sapos yu mekim olsem, bai yu kisim ol gutpela samting. Taim yumi wok strong long mekim wok autim tok, dispela bai helpim yumi long stap strong, laip bilong yumi bai gutpela tru, na bel bilong yumi bai i stap isi moa na bai yumi amamas moa. (1 Ko. 15:58) Na tu, sapos yumi givim bel olgeta long mekim wok bilong God, dispela bai helpim yumi long “wetim De bilong God i kamap.”​​—2 Pi. 3:​12.

Skelim Gut Sindaun Bilong Yu

13. Olsem wanem yumi inap save olsem yumi yet i givim bel olgeta long mekim wok bilong God?

¹³ Tasol em i gutpela long tingim olsem pasin bilong givim bel olgeta, dispela i no makim olsem yu mas lusim planti aua long autim tok. Sindaun bilong yumi wan wan i narapela narapela. Jehova i save amamas tru long wanpela pablisa i lusim wanpela o tupela aua long autim tok long olgeta mun, sapos helt bilong em i mekim na em i no inap autim tok sampela aua moa. (Skelim Mak 12:​41-44.) Olsem na bilong save olsem yumi yet i givim bel olgeta long mekim wok bilong God o nogat, yumi mas skelim gut save na sindaun bilong yumi. Yumi save bihainim Krais, olsem na yumi mas kisim wankain tingting olsem Krais. (Ritim Rom 15:5; 1 Ko. 2:​16) Wanem samting i olsem nambawan samting long laip bilong Jisas? Em i tokim ol manmeri long Kaperneam: “Mi mas autim gutnius bilong kingdom bilong God. . . . God i salim mi na mi kam bilong mekim dispela wok.” (Lu. 4:43; Jo. 18:37) Tingim pasin bilong Jisas long givim bel long mekim wok autim tok, na skelim sindaun bilong yu bilong save olsem yu inap mekim sampela wok moa bilong autim tok.​​—1 Ko. 11:1.

14. Long wanem narapela rot yumi inap mekim sampela wok moa bilong autim tok?

¹⁴ Taim yumi skelim gut sindaun bilong yumi, ating yumi kisim save olsem yumi inap lusim sampela aua moa bilong autim tok. (Mt. 9:​37, 38) Olsem: Planti tausen yangpela em nau tasol ol i pinis long skul ol i save mekim sampela wok moa bilong autim tok na ol i kisim bikpela amamas long rot bilong givim bel long mekim wok painia. Olsem wanem? Yu tu i laik kisim dispela amamas? Sampela brata na sista i bin skelim sindaun bilong ol na ol i mekim disisen long go sindaun long narapela hap bilong kantri bilong ol, o long narapela kantri, we ol i sot long ol pablisa bilong Kingdom. Na sampela i bin lainim narapela tokples bilong helpim ol man i save mekim dispela tokples. Tru, taim yumi mekim sampela wok moa bilong autim tok, dispela inap givim hatwok long yumi, tasol yumi inap kisim ol gutpela blesing, na yumi inap helpim planti narapela long kisim “save long as bilong tok tru.”​—1 Ti. 2:​3, 4; 2 Ko. 9:6.

Sampela Man Long Baibel Em Yumi Ken Bihainim Pasin Bilong Ol

15, 16. Yumi inap bihainim pasin bilong husat long givim bel long bihainim Krais?

¹⁵ Sampela man em ol i kamap aposel ol i mekim wanem taim Krais i singautim ol long bihainim em? Baibel i tok long Matyu olsem: “[Em] i kirap na i lusim olgeta samting i stap, na em i go bihainim Jisas.” (Lu. 5:​27, 28) Long Pita na Andru, em ol i bin wok long painim pis, Baibel i tok: “Kwiktaim tupela i lusim umben na i go bihainim em.” Orait nau Jisas i lukim Jems na Jon, em ol i stretim ol umben wantaim papa bilong ol. Ol i mekim wanem taim Jisas i singautim ol? “Kwiktaim tupela i lusim bot na i lusim papa bilong tupela, na tupela i go bihainim Jisas.”​—Mt. 4:​18-22.

¹⁶ Narapela gutpela piksa long bihainim em Sol, bihain em i kamap aposel Pol. Maski pastaim em i mekim nogut tru long ol disaipel bilong Krais, em i senisim pasin bilong em na kamap wokman em God i ‘makim pinis’ bilong holim nem bilong Krais. “Bihain em i go stret long ol haus lotu bilong ol Juda, na em i autim tok olsem, ‘Jisas em i Pikinini Bilong God.’ ” (Ap. 9:​3-22) Na maski em i mas karim planti hevi na ol man i mekim nogut long em, Pol i no lusim pasin bilong givim bel long autim tok.​​—2 Ko. 11:​23-​29; 12:15.

17. (a) Wanem laik bilong yu taim yu wok long bihainim Krais? (b) Yumi kisim wanem ol blesing taim yumi givim bel na strong olgeta long mekim laik bilong Jehova?

¹⁷ Yumi laik bihainim ol gutpela pasin bilong ol dispela disaipel na redi kwik na givim bel olgeta long bihainim singaut bilong Krais. (Hi. 6:​11, 12) Yumi kisim wanem ol blesing taim yumi givim bel yet na bihainim tru Krais? Yumi kisim amamas tru long mekim laik bilong God, na yumi belgut taim yumi mekim sampela wok moa insait long kongrigesen. (Sng. 40:8; ritim 1 Tesalonaika 4:1.) Tru tumas, taim yumi wok strong tru long bihainim Krais, yumi kisim ol gutpela blesing tru olsem tingting i stap isi, stap belgut, amamas, God i orait long yumi, na yumi inap kisim laip i stap oltaim oltaim.​​—1 Ti. 4:​10.

Yu Inap Tingim?

• Yumi kisim wanem bikpela wok? Yumi mas ting olsem wanem long en?

• Yumi mas was gut long wanem pasin bilong yumi ol man? Bilong wanem i olsem?

• Bilong wanem yumi mas skelim gut yumi yet?

• Wanem samting bai helpim yumi long bihainim yet Krais?

[Blok/Piksa long pes 27]

Wanem Samting Bai Helpim Yu Long Bihainim Yet Krais?

▪ Ritim Baibel long olgeta de, na tingim tingim long bel ol tok yu ritim. ​​—Sng. 1:​1-3; 1 Ti. 4:​15.

▪ Beten planti taim na bai spirit bilong God i ken helpim na stiaim yu. ​​—Sek. 4:6; Lu. 11:​9, 13.

▪ Bung wantaim ol manmeri i givim bel tru long autim tok.​​—Snd. 13:20; Hi. 10:​24, 25.

▪ Pilim tru olsem taim i sot pinis. ​—Ef. 5:​15, 16.

▪ Tingim ol samting nogut bai painim yu sapos yu “sakim” pasin bilong bihainim Krais.​​—Lu. 9:​59-​62.

▪ Oltaim tingim tok promis bilong yu long dediket na ol gutpela blesing i kam long rot bilong mekim wok bilong Jehova na long pasin bilong givim bel olgeta long bihainim Krais.​​—Sng. 116:​12-​14; 133:3; Snd. 10:22.