Tok Bilong Kingdom—Kisim Gut As Bilong En
1 Taim Jisas i tok piksa long man i tromoi pikinini wit long gaden, em i tok pikinini wit i pundaun long “gutpela graun” em i olsem “man i harim tok na i save gut as bilong en.” (Mt 13:23) Olsem wanem? Yumi “save gut as” bilong tok bilong Kingdom yumi harim pinis? Kingdom i mekim wanem long yumi? Yumi putim ol wok bilong Kingdom i stap olsem nambawan samting na long dispela rot yumi kamapim klia yumi kisim gut as bilong tok bilong Kingdom?
2 Yumi mas stadi bambai yumi inap kisim stretpela save long Kingdom. Yumi mas tingim gut long bel ol kaikai bilong spirit yumi kisim. Bilong stadi i ken helpim gut yumi, yumi mas laikim tru ol kaikai bilong spirit. Sapos nogat, ating bai yumi mekim sampela narapela wok na yumi no gat taim bilong stadi. I hatwok liklik long bihainim gut sedyul bilong stadi. Tru, i gat ol narapela bikpela samting yumi mas tingim, tasol stadi yumi mekim bai helpim yumi long kisim planti gutpela samting bilong spirit.—Snd 3:13-18; Kl 1:27.
3 Liklik buk Skelim Sampela Tok Bilong Baibel Long Olgeta De i helpim yumi long kisim ol gutpela tingting long ol samting bilong Kingdom. Ol man i pilim olsem ol i sot long ol samting bilong spirit, ol i tingting long lusim sampela minit long olgeta de bilong ol i ken kaunim teks na stori bilong en. (Mt 5:3) Planti teks i stori long ol narapela narapela samting bilong Kingdom. Olsem: Teks bilong Novemba 22, 1994, em Matyu 13:4. Stori bilong teks i toktok long Kingdom na i kirapim yumi long was gut, nogut yumi poromanim ol wanblut na ol narapela man na ol i pundaunim yumi. Long ol haus Betel long olgeta hap, ol brata sista i save lusim 15 minit long olgeta moningtaim bilong ol i ken stori long teks bilong de, na dispela i soim yumi olsem em bikpela samting long yumi mas bung wantaim na stori long teks. Olsem wanem? Famili bilong yu i save stori long teks long olgeta de?
4 Ol tok bilong Wastaua na Kirap! i stori long ol nupela samting lain bilong yumi i save long en, na dispela i olsem kaikai. Tupela nius hia i helpim yumi long save, Kingdom bilong God i mas i kam bilong helpim ol man. Ol i helpim yumi long tingim ol samting bilong spirit na kisim “tingting bilong Krais.” (1 Ko 2:15, 16) Dispela olgeta samting inap strongim bilip bilong yumi long ol samting yumi wet long en, na i kirapim yumi long wok strong moa long autim tok bilong Kingdom.—1 Pi 3:15.
5 Bikpela samting i olsem: Yumi ol wan wan i mas kisim as bilong tok bilong Kingdom. Long rot bilong Kingdom God bai kamapim klia olsem i stret em i stap King, na pinisim ol pasin nogut, na kamapim nupela taim—Paradais. Jisas i tokim yumi long tingim Kingdom pastaim. Yumi mas bihainim pasin kain olsem sipsip bambai yumi inap stap laip aninit long Kingdom. (Mt 6:10, 33) Wok strong na bai yu inap kisim ol blesing bilong Kingdom.