Kaikai Bilong Spirit Long Olgeta De —Ol Famili Kristen i Mas Kisim
1 “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Mt 4:4) Ol dispela tok i stret tumas! Yumi mas kisim kaikai bilong skin long olgeta de, na olsem tasol yumi mas kisim kaikai bilong spirit tu long olgeta de. Bilong helpim yumi long kisim long olgeta taim, Sosaiti i bin wokim liklik buk Skelim Sampela Tok Bilong Baibel Long Olgeta De. Olsem wanem? Yupela ol famili Kristen, yupela i makim taim long olgeta wan wan de long mekim teks bilong de?
2 Papamama i Mas Stap Olsem Gutpela Piksa Bilong Ol Pikinini i Ken Bihainim: Yumi olgeta i gat planti wok, olsem na sampela taim yumi no mekim teks—yumi ting olsem bihain bai yumi mekim. Tasol sapos papamama i save olsem i bikpela samting long famili i mas kisim kaikai bilong spirit, orait, ol bai makim taim long olgeta de bilong mekim teks long taim famili i bung wantaim. (Mt 5:3) Papamama i mas i go pas—ol i mas kaunim teks, na tu ol i mas kamapim sampela bikpela tok bilong en olsem i stap long Wastaua, na stori long olsem wanem famili inap bihainim ol dispela tok. Tru, ating ol i mas wok strong na mekim mekim bambai ol i lain long mekim long olgeta taim. Sapos ol i mekim olsem, dispela samting bai helpim ol. (Lukim Aposel 17:11, 12.) Olsem na yupela papamama, wok strong long stap olsem gutpela piksa bilong ol pikinini i ken bihainim.
3 Mekim Long Taim Stret: Wanem taim i gutpela bilong famili olgeta i ken bung wantaim bilong toktok long teks, nogut sampela taim ol i mekim na sampela taim ol i lusim? Sapos long moningtaim yupela tingim teks, orait dispela bai helpim yupela. Long olgeta moningtaim famili bilong Betel na ol misineri i save toktok liklik long teks. Dispela i helpim ol dispela brata sista long tingim tok bilong Jehova long olgeta de.—Sng 1:1, 2; Fl 4:8.
4 Sapos long olgeta moningtaim ol famili Kristen i toktok long sampela tok bilong Baibel, dispela bai helpim ol. Dispela bai helpim ol pikinini i skul long sanap strong long bilip long taim bilong traim. Sapos inap liklik taim famili i no inap bung wantaim na toktok long teks, orait, papamama i mas tingim narapela rot bilong mekim teks na bai ol i no lus long dispela gutpela kaikai bilong spirit. Olsem: Sapos papa i mas i go long ples wok paslain long ol pikinini i kirap long slip long moningtaim, orait, ating mama i ken bung wantaim ol pikinini na mekim teks. Tasol sampela famili i mekim teks long apinun, long wanem, long dispela taim famili olgeta i stap wantaim. Olgeta wan wan famili i ken wokim sedyul i stret long ol yet.
5 Ol famili Kristen i mas kisim kaikai bilong spirit long olgeta de. Wok bilong mekim teks em i bikpela samting ol i mas mekim. (Fl 1:10) Sapos yumi toktok long wanpela hap bilong Baibel long olgeta de, dispela bai helpim yumi long holimpas ol stretpela lo bilong God. Olgeta bilong famili i mas wok gut wantaim na bai dispela samting inap helpim gut ol.
[Ol Askim]
1. (a) I gat wanem as na Sosaiti i bin givim liklik buk Skelim Sampela Tok Bilong Baibel Long Olgeta De long yumi? (b) I stret long olgeta wan wan famili i mas givim wanem askim long ol yet?
2. (a) I gat wanem as na ol papamama i mas makim sampela taim bilong tingim teks bilong de? (b) Kaunim Aposel 17:11, 12. Wan wan taim tasol ol dispela Kristen i save kaunim na skelim ol tok bilong Baibel o olsem wanem?
3. (a) Sapos yupela inap, bilong wanem i gutpela sapos long moningtaim yupela mekim teks bilong de? (b) Kaunim Buk Song 1:1, 2 na Filipai 4:8. Ol dispela ves i kamapim wanem ol gutpela tok bilong helpim yumi long dispela taim nau?
4. Olgeta wan wan famili i gat wanem wok ol i mas mekim?
5. (a) Kaunim Filipai 1:10. I gat wanem samting na yumi ken save dispela tok i kirapim yumi long tingim teks bilong de? (b) Bilong mekim teks long olgeta de, bilong wanem olgeta wan wan long famili i mas wok gut wantaim ol narapela?