Yu Save Skelim Buklet Skelim Sampela Tok Bilong Baibel Long Olgeta De?

Olsem wanem? Yu save ritim skripsa na tok bilong Wastaua long buklet Skelim Sampela Tok Bilong Baibel Long Olgeta De? Sapos yu no save mekim olsem, orait mobeta yu kirap nau long mekim. Planti bratasista i save skelim teks bilong de long moning na bai ol inap tingim tingim tok bilong en long de olgeta. (Jos 1:8; Sg 119:97) Olsem wanem tok bilong skripsa inap helpim yu? Yu ken ritim ol ves i stap klostu long dispela ves na bai yu save dispela ves i stori long wanem samting. Traim long tingim wanpela stori bilong Baibel i kamapim stiatok i stap long dispela ves. Orait bihainim dispela stiatok long sindaun bilong yu. Taim yu larim Baibel i stiaim ol disisen yu wokim, dispela bai helpim yu.—Sg 119:105.

Long olgeta moning, ol lain long Betel long olgeta hap bilong graun i save skelim buklet Skelim Sampela Tok Bilong Baibel Long Olgeta De. Long ol yia i go pinis, ol i putim planti bilong ol dispela moning program long JW Brodkas i stap aninit long het tok OL PROGRAM NA OL SAMTING I SAVE KAMAP. Yu bin lukim wanpela bilong ol dispela tok? Ating sampela bilong ol tok i kamap i stret long sindaun bilong yu. Olsem, stori bilong Lot i stiaim yu olsem wanem long taim yu laik wokim ol disisen long i stap bilong yu?

LUKIM VIDIO NO KEN LAIKIM PASIN BILONG DISPELA GRAUN (1JO 2:15), NA BIHAIN BEKIM OL DISPELA ASKIM:

• Wanem stiatok bilong Baibel i as bilong dispela tok bilong moning wosip?

• Olsem wanem stori bilong Lot i kamapim klia samting nogut i save kamap taim man i laikim pasin bilong dispela graun o ol samting bilong dispela graun?—St 13:12; 14:12; 19:3, 12, 13, 24-26

• Olsem wanem yumi ken soim olsem yumi laikim Jehova na i no ol samting bilong dispela graun?