Long Dispela Yia Bilong Wok Bai Yumi Mekim Wanem?
1 Yia bilong wok bilong 1994 i kirap pinis long Septemba 1, olsem na nau em i gutpela taim bilong yumi lain bilong Jehova i tingim wanem ol samting yumi olgeta wan wan i laik mekim long dispela nupela yia bilong wok, na wanem ol samting yumi olgeta wantaim, olsem wanpela oganaisesen, i laik mekim.
2 Wok Long Kamap Strong Long Ol Samting Bilong Spirit: Sapos yumi nupela insait long tok i tru, yumi mas laik long kamap strong long bilip. (Hi 6:1-3) Sapos yumi stap strong pinis long ol samting bilong spirit, yumi mas helpim ol nupela man na ol narapela i no strong tumas, na tu, yumi mas was gut long yumi yet—nogut yumi ting yumi strong pinis na yumi save pinis long ol tok bilong Baibel na long stretpela pasin Kristen, na em inap tasol. Olsem wanem? Long olgeta de yumi save kaunim na tingim teks bilong de? Yumi save kaunim hap bilong Baibel em Sedyul Bilong Skul Bilong Wok Autim Tok i makim? Yumi save redim ol tok bilong Buk-Stadi na Stadi Wastaua? Yumi olgeta i mas putim ol dispela samting olsem mak bilong winim, na yumi mas mekim sampela samting moa. Bilong abrusim bagarap long taim pasin nogut bilong dispela graun i pinis na yumi ken i stap laip long nupela taim God bai kamapim, yumi mas wok long kamap strong moa yet long ol samting bilong spirit.—Lukim Filipai 3:12-16.
3 Stap Klin Long Ol Samting Bilong Spirit: Bilong Jehova i ken orait tru long yumi, yumi mas stap klin long “olgeta pasin doti bilong bodi na bilong spirit.” (2 Ko 7:1) Taim yumi kamap klin pinis, yumi no ken “tantanim nabaut [gen] long graun malumalum” bilong pasin nogut bilong dispela graun. (Lukim 2 Pita 2:22.) Yumi mas tingting strong long stap klin na strong long ol samting bilong spirit. Na yumi mas save long ol pasin Satan i mekim bilong giamanim yumi—nogut yumi pundaun na mekim sin na Jehova i no orait moa long yumi.—2 Ko 2:11.
4 Bihainim Gutpela Tok: Sindaun 15:22 i tok: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela.” Tasol tingim dispela samting: Man i mekim dispela tok, em Solomon, bihain em i larim ‘ol meri bilong em i pulim tingting bilong em i go long ol giaman god,’ long wanem, em i bin sakim tok bilong God i tambuim ol Israel long maritim ol meri bilong ol arapela kantri. (1 Kin 11:1-4) Olsem na sapos yumi yet i no bihainim gutpela tok, bai yumi no inap mekim gut wok bilong Jehova na stap olsem gutpela piksa bilong ol narapela i ken bihainim. (1 Ti 4:15) Tok bilong Baibel bai helpim yumi long was gut long tingting bilong yumi. (Snd 4:23) Ol samting bilong lukautim yumi i olsem: Yumi mas laikim ol samting Jehova i laikim, na no ken tru laikim ol samting em i no laikim, na oltaim yumi mas larim em i stiaim yumi na yumi mas mekim ol samting em i laikim.—Snd 8:13; Jo 8:29; Hi 1:9.
5 Yumi no lotu nating long Jehova olsem ol man i holim nating nem Kristen i mekim, nogat. Lotu bilong yumi i gat laip na i wok strong i stap long bihainim ol tok i tru olsem i stap long Tok bilong God.—Jo 4:23, 24.
6 Yumi tingting strong long bihainim laik bilong God, tasol long olgeta de ating sampela traim i laik painim yumi. Tasol yumi stap strong, long wanem, yumi save, wankain traim i painim olgeta brata bilong yumi “long olgeta hap bilong graun,” na Jehova yet bai mekim yumi kamap strong. (1 Pi 5:9, 10) Yumi save pinis long ol dispela samting, olsem na bai yumi inap mekim tru wok bilong yumi long yia bilong wok bilong 1994.—2 Ti 4:5.
[Ol Askim]
1. Nau em i gutpela taim bilong yumi olgeta i tingim wanem ol samting?
2. (a) Sapos yumi nupela long tok i tru, yumi mas i gat wanem laik? (b) Yumi mas putim wanem samting i olsem mak bilong winim?
3. Yumi mas mekim wanem na bai God i orait long yumi?
4. Bilong wanem yumi olgeta i mas bihainim gutpela tok?
5. Stori long lotu bilong yumi.
6. Taim yumi laik mekim wok bilong yumi na traim i painim yumi, wanem samting inap strongim yumi?