Tingim Ol Mak Bilong Wok Yu Laik Winim Bilong Helpim Bilip Bilong Yu Long i Stap Strong
1 Sapos yumi laik bai God Jehova i amamas long yumi, yumi mas i gat strongpela bilip long Em na Kingdom bilong Em long han bilong Krais Jisas. (Hi 11:6) Dispela samting i helpim yumi long i stap klostu long em, na i helpim yumi long tingim laip oltaim yumi inap kisim long bihain. Tasol Aposel Pol i tok, “planti man ol i no bilip.” Yumi save, sapos yumi no gat bilip, bai Jehova i no inap amamas long yumi. Na yumi tingim laip bilong ol narapela man na laip bilong yumi yet, olsem na yumi mas holimpas strongpela bilip, long wanem, liklik taim bai pasin bilong ‘dispela graun i pinis.’—2 Te 3:2; Mt 24:3, 36.
2 Wanem samting bai helpim yumi long holimpas strongpela bilip? Sapos yumi tingim ol wok bilong spirit yumi laik mekim, dispela samting bai helpim yumi. Sapos yumi tingim ol wok autim tok yumi laik mekim na ol narapela wok tu, bai yumi inap mekim bikpela wok tru bilong helpim yumi yet na litimapim nem bilong Papa bilong yumi long heven.
LONG WOK AUTIM TOK NA TAIM YUMI YET I STADI
3 Sampela inap mekim bikpela wok long autim tok na sampela nogat. Maski yumi no inap mekim bikpela wok, tasol sapos yumi givim bel long mekim wok bilong Jehova, em bai amamas long yumi. Stori bilong rabismeri i givim tupela liklik mani i helpim yumi long save long dispela samting. (Lu 21:1-4) Tasol i gat planti samting yumi inap mekim long dispela yia bilong wok bilong 1993 na bai wok autim tok bilong yumi i kamap gutpela moa. Ating bai sampela inap skruim sampela aua moa long wok autim tok bilong ol long dispela yia bilong wok. Olsem wanem? Bai yu inap stretim ol wok samting yu mas mekim bambai yu inap mekim wok painia haptaim inap wanpela o tupela mun samting? O yu inap stretim rot bambai yu ken mekim wok painia oltaim? Sapos nau yu tingim gut ol wok yu laik mekim, ating bai yu inap winim ol dispela mak.
4 Narapela bikpela samting yu ken tingting long mekim, em olsem: Taim yu yet yu stadi, tingim ol samting yu ken mekim bilong kisim gut ol dispela tok. Bilong mekim olsem, yu ken makim wanpela hap taim, olsem wanpela yia samting, na insait long dispela hap taim yu mas kaunim olgeta tok bilong Baibel. Ating yu ken makim wanpela taim long olgeta wik na bai yu yet yu stadi. Bilong helpim yu long kisim gut ol dispela tok yu lain long en na putim i go daun long bel bilong yu, yu mas mekim wok long en taim yu autim tok, na toktok wantaim ol narapela brata sista long dispela samting, o tingim ol samting yu yet yu ken mekim bilong bihainim dispela tok.
OL YANGPELA NA OL PAPAMAMA
5 Wanpela wok ol yangpela i ken tingting long mekim, em olsem: Ol i ken tingting long autim gut tok long ol tisa na wanskul bilong ol. Wanpela yangpela Witnes i stori long buklet Skul na em i tok: “Dispela buklet i bin helpim mipela long autim tok long ol tisa na wanskul bilong mipela na tokim ol long ol samting mipela bilip long en.” Olsem wanem? Yu bin mekim wok long dispela buklet? Yu mas strongim bel bambai yu inap mekim olsem, tasol yu mas save, Jehova bai blesim ol wok yu mekim.
6 Yupela ol yangpela i mas wok tu long sakim ol samting em inap pulim yu long mekim pasin nogut, olsem ol poroman nogut, na pasin bilong kisim drak, na mekim pasin pamuk samting. Sapos yu poroman wantaim ol yangpela i mekim ol dispela pasin na yu bihainim pasin bilong ol, dispela bai bagarapim gutpela pasin bilong yu.
7 Ating i gat sampela samting long sindaun bilong yu na long wok autim tok bilong yu, em yu laik mekim i kamap gutpela moa. Sapos yu putim sampela mak long ol wok samting yu o famili bilong yu i laik winim, ating yu mas lusim sampela samting yu yet yu laik mekim bambai yu inap winim dispela mak. Tasol yu save pasin bilong “dispela graun bai i pinis,” olsem na yu mas wok strong long mekim olgeta samting bambai God i amamas long yu. (1 Jo 2:17) Yu mas tingting long mekim ol samting bambai yu wantaim famili bilong yu inap holimpas strongpela bilip. Tingim ol wok samting yu laik mekim, na wok strong long inapim ol dispela wok.
[Ol Askim]
1. (a) Bilong wanem yumi laik kisim strongpela bilip? (b) Bilong wanem God i no ken amamas long planti manmeri na ol bai lus long kisim laip oltaim? (c) Olsem wanem dispela samting i stret wantaim tok bilong 2 Tesalonaika 3:2?
2. Sapos yumi tingim sampela wok yumi laik mekim long wok autim tok, olsem wanem dispela bai helpim yumi? Olsem wanem long ol narapela wok yumi laik mekim?
3. (a) Olsem wanem na yumi olgeta i tingim narapela narapela mak yumi laik winim long wok bilong autim tok? (b) Stori long sampela wok ating sampela bai tingting long mekim. (c) Sapos nau yu tingim sampela wok yu laik mekim, olsem wanem dispela bai helpim yu long bihain?
4. (a) I no hatwok long makim taim bilong yu yet yu stadi, tasol wanem samting i hatwok? Olsem wanem yu inap winim dispela hevi? (b) Taim yu yet yu stadi, yu ken mekim wanem na bai yu inap kisim gut ol dispela tok?
5. (a) Olsem wanem ol yangpela inap mekim gutpela wok long buklet Skul? (b) Sapos yu pret long givim wanpela long tisa, gutpela yu mekim wanem?
6. (a) Stori long wanpela samting ol yangpela i mas tingting long mekim. (b) Bai yu mekim wanem bilong sakim ol samting i laik pulim yu long mekim pasin nogut?
7. (a) Bilong wanem sampela taim i hatwok long mekim wok yu o famili bilong yu i tingting long mekim? (b) Olsem wanem tok bilong 1 Jon 2:17 inap helpim yu long mekim dispela wok yu tingting pinis long mekim?