Ol Yangpela—Yupela i Laik Winim Wanem Ol Mak Bilong Spirit?
1 Jehova i save olsem ol gutpela wok na ol mak yumi inap winim, ol i bikpela samting bilong mekim yumi amamas. (Lukim Stat 1:28; 2:15, 19.) Long nau, Jehova i givim wok long lain bilong em long autim tok na skulim ol man. Na tu, yumi laik winim wanpela bikpela mak, em yumi laik kisim laip oltaim long Paradais. Tasol insait long dispela taim, yumi mas putim ol mak bilong spirit yumi laik winim sapos yumi no laik lusim nating strong na ol samting bilong yumi.—1 Ko 9:26.
2 Ol Mak Ol Yangpela Inap Winim: Ol yangpela i mas putim ol mak bilong spirit inap long skel na save bilong ol. (1 Ti 4:15) Sampela liklik pikinini ol i winim mak ol i bin putim na ol inap kolim nem bilong ol buk bilong Baibel maski ol i no save yet long rit. Long rot bilong famili-stadi, ol pikinini i save lain long redi long ol miting bambai ol i ken winim mak bilong bekim gut tok na insait long Skul Bilong Wok Autim Tok. Taim ol pikinini i go wantaim papamama bilong ol long autim tok, ol i lain long autim tok na ol i wok strong i go long winim mak bilong kamap pablisa i no baptais. Ol papamama i mas strongim ol pikinini bilong ol long putim mak long dediket na kisim baptais.
3 Sapos yu wanpela yangpela, yu putim wanem ol mak bilong spirit yu laik winim? Nau yu mas tingim Man i wokim yu, na bilong mekim olsem yu mas tingim ol bikpela samting long i stap bilong yu. (Sav 12:1; Sng 71:17) Olsem wanem? Yu inap mekim wok painia haptaim long ol mun yu save kisim malolo long en? Yu bin tingting long mekim wok autim tok long olgeta de olsem wanpela painia oltaim? Yu inap lainim nupela tok ples na bai yu inap helpim wanpela grup o kongrigesen bilong dispela tok ples long hap bilong yu o long narapela hap long bihain? Planti brata sista i wok nau long Betel o ol i wok olsem wasman bilong raun o misineri, ol i bin putim mak long mekim ol dispela wok taim ol i stap yet long skul. Olsem wanem? Yu inap mekim olsem tu?
4 Taim yu stap yangpela yet, wok strong long bihainim pasin bilong Jisas. Maski em i gat 12-pela krismas tasol, em i no bin pret long toktok long ol samting bilong spirit. (Lu 2:42-49, 52) Sapos yu putim ol gutpela mak, olsem long mekim stadi bilong yu yet, long kaunim Baibel long olgeta de, na long bung oltaim wantaim ol strongpela Kristen long taim bilong ol miting na long taim bilong autim tok, dispela bai helpim yu long kisim save long pasin bilong skulim ol narapela long Kingdom bilong God olsem Jisas i bin mekim.