Rot Bilong Winim Ol Mak Bilong Spirit
1 Yupela ol yangpela Kristen i save laikim Jehova na tingim tok Jisas i mekim long olgeta Kristen long ‘painim kingdom pastaim.’ Na ol dispela samting i stiaim yu long putim ol mak yu laik winim. (Mt. 6:33, Nupela Testamen na Ol Sam) Ating mak yu laik winim em long mekim bikpela wok moa bilong autim tok long rot bilong mekim wok painia oltaim. Ating sampela narapela i laik insait long wok bilong sanapim ol Haus Kingdom o brens ofis, o mekim wok long Betel. Em ol gutpela mak yu inap putim bilong winim!
2 Wanpela gutpela rot bilong helpim yu long winim ol kain mak olsem yu putim, em long raitim long pepa ol dispela samting. Wastaua bilong Julai 15, 2004 i tok: “Samting [yu] gat tingting long mekim i save kamap klia tru taim [yu] toktok long en. Olsem na i gutpela sapos [yu] raitim long pepa ol mak [yu] laik winim, na ol samting [yu mas] mekim bilong inapim ol dispela mak.” Na tu, yu ken putim ol liklik mak em yu ken winim pastaim na dispela bai helpim yu long skelim ol samting yu mekim, ol i kamap gutpela o nogat, na helpim yu long tingting strong long ol mak yu laik winim long bihain.
3 Ol Mak Yu Ken Winim Nau: Sapos yu no baptais yet, tingim samting yu mas mekim na bai yu ken winim dispela mak. Ating yu mas kliagut long ol bikpela as tok bilong Baibel. Bilong mekim olsem, orait putim mak long stadi gut long buk Baibel i Tok, na ritim olgeta skripsa ol i no raitim ol tok bilong ol long ol paragraf. (1 Ti. 4:15) Putim mak long ritim Baibel olgeta, kirap long Stat i go long Kamapim Tok Hait, wankain olsem ol lain i wok long Betel na ol lain i go long skul Gileat i mas mekim. Bihain, wok yet long ritim Baibel long olgeta de. (Sng. 1:2, 3) Tingim, dispela bai helpim yu long kamap bikpela long ol samting bilong spirit. Yu mas mekim beten paslain long yu ritim Baibel na mekim stadi bilong yu yet na bihain long en tu yu mas mekim olsem, na oltaim wok long bihainim ol samting yu wok long lainim.—Jem. 1:25.
4 Sapos yu baptais pinis, wanem sampela mak moa yu ken putim bilong winim? Olsem wanem? Yu mas kamap gutpela moa long pasin bilong autim tok? Olsem: Yu inap putim mak long kamap gutpela moa long mekim wok long Baibel taim yu autim tok? (2 Ti. 2:15) Olsem wanem yu ken mekim bikpela wok moa bilong autim tok? Putim ol mak em yu ken winim long nau na ol dispela mak i mas stret long krismas bilong yu na i stap bilong yu, na dispela bai helpim yu long winim ol mak yu putim bilong winim long bihain.
5 Man i Winim Mak Em i Putim: Taim Tony i gat 19 krismas em i go lukim wanpela brens ofis bilong ol Witnes Bilong Jehova, na dispela i kirapim laik bilong em long wok long Betel. Tasol em i no save bihainim stretpela pasin, na em i no dediket yet long God. Tony i kirap stretim pasin bilong em na bai i stret wantaim pasin Jehova i laikim, na em i putim mak long kisim baptais. Taim em i winim pinis dispela mak, em i putim mak long mekim wok painia haptaim na bihain painia oltaim, na em i raitim long kalenda ol det em bai kirap mekim dispela tupela wok. Em i mekim wok painia inap ol i singautim em long wok long Betel. Man! Tingim amamas em i kisim!
6 Yu tu inap winim ol mak taim yu putim wok bilong Kingdom i stap namba wan samting long i stap bilong yu. “Olgeta samting yu laik mekim,” beten long Jehova long en na wok strong long winim ol dispela mak.—Snd. 16:3; 21:5.
[Askim Bilong Stadi]
1. Planti yangpela Kristen i putim wanem ol mak bilong spirit ol i laik winim?
2. Wanem samting inap helpim yu long winim ol mak yu putim?
3. Kolim sampela mak em ol yangpela i ken winim pastaim na bai ol i ken kisim baptais.
4. Wanem sampela liklik mak em wanpela Kristen i laik wok long Betel i ken putim?
5. Olsem wanem pasin bilong putim ol liklik mak bilong winim long nau i helpim wanpela brata long winim mak bilong em long wok long Betel?
6. Wanem samting inap helpim yu long winim ol mak yu putim?