Ol Yangpela​—Yupela Bai Mekim Wanem Long Laip Bilong Yupela?

“Mi mekim olsem man i boksen gut, na i no tromoi han nabaut na paitim win nating.”​—1 KO. 9:26.

1, 2. Sapos yu laik bai ol gutpela samting i kamap taim yu wok long kamap bikpela, yu mas mekim wanem samting?

SAPOS yu laik bihainim wanpela rot yu no save long en, ating yu bai kisim wanpela mep na kompas i go wantaim yu. Mep bai helpim yu long luksave long wanem hap stret yu stap long en na wanem rot yu mas bihainim. Kompas bai stiaim yu long bihainim yet rot i stret. Tasol mep na kompas i no inap helpim yu sapos yu no kliagut long wanem hap yu laik go long en. Olsem na yu mas save long wanem ples stret yu laik go long en.

² Na i wankain tu taim yu wok long kamap bikpela. Yu gat wanpela mep na wanpela kompas. Baibel i olsem wanpela mep bilong helpim yu long save long wanem rot yu mas bihainim. (Snd. 3:​5, 6) Maus bilong bel, em sapos yu skulim gut, em inap helpim yu long bihainim yet rot i stret. (Ro. 2:15) Em i mekim wok olsem wanpela kompas. Tasol bilong laip bilong yu i ken kamap gutpela, yu mas kliagut long wanem ol samting yu laik mekim. Yu mas putim sampela mak yu laik winim.

3. Wanem ol gutpela samting inap kamap sapos yu putim ol mak bilong winim, olsem Pol i stori long en long 1 Korin 9:26?

³ Aposel Pol i stori long ol gutpela samting bilong pasin bilong putim ol mak na wok strong long winim. Em i tok: “Mi mekim olsem man i ran strong, na i no save lukluk nabaut. Na mi mekim olsem man i boksen gut, na i no tromoi han nabaut na paitim win nating.” (1 Ko. 9:26) Sapos yu putim ol mak yu laik winim, bai yu olsem man i ran strong na i no lukluk nabaut. I no longtaim na yu mas wokim sampela bikpela disisen, olsem long ol samting bilong lotu, wok mani, marit, na famili. Ating sampela taim yu inap pilim olsem yu no kliagut long wanem samting stret yu mas makim. Tasol sapos ol tok na stiatok bilong Baibel i stiaim yu long makim ol samting yu bai mekim, bai yu no larim wanpela samting i pulim yu long bihainim narapela rot.​—2 Ti. 4:​4, 5.

4, 5. (a) Wanem samting inap kamap sapos yu no putim ol mak bilong winim? (b) Bilong wanem laik bilong yu long mekim ol samting God i orait long en, dispela i mas stiaim ol samting yu makim bilong mekim?

⁴ Sapos yu no putim ol mak bilong winim, ating ol wanlain na ol tisa bai pulim yu long mekim samting em ol yet i ting i stret long yu mas mekim. Tasol maski yu bin putim ol mak yu laik winim, ating sampela bai kamapim yet tingting bilong ol long yu. Olsem na taim ol i kamapim tingting bilong ol, askim yu yet, ‘Ol dispela mak ol i kolim bai helpim mi long tingim Man Bilong Wokim mi taim mi stap yangpela yet, o ol dispela mak bai pasim mi long mekim olsem?’​—Ritim Saveman 12:1.

⁵ Bilong wanem laik bilong yu long mekim ol samting God i orait long en, dispela i mas stiaim ol samting yu makim bilong mekim? Wanpela as, em olsem Jehova i bin givim yumi olgeta gutpela samting yumi gat. (Jem. 1:​17) Tru tumas, yumi olgeta i mas tenkyu long Jehova. (KTH 4:​11) Namba wan gutpela rot bilong kamapim tenkyu bilong yu long Jehova em long tingim em taim yu putim ol mak yu laik winim. Nau yumi ken skelim wanem ol mak i gutpela long winim, na ol samting yu mas mekim bilong winim ol dispela mak.

Yu Ken Putim Wanem Ol Mak?

6. Wanem wanpela bikpela mak yu ken putim bilong winim, na bilong wanem?

⁶ Olsem stadi paslain long dispela i kamapim, wanpela bikpela mak yu ken putim bilong winim, em yu yet i mas save tru olsem ol tok bilong Baibel em i tru. (Ro. 12:2; 2 Ko. 13:5) Ating ol wanlain bilong yu i bilip long evolusen o long kain kain bilip giaman bilong lotu, long wanem, ol narapela i bin tokim ol long bilip long ol dispela tok. Tasol i no olsem yu mas bilip long wanpela samting long wanem ol narapela i tokim yu long bilip long en, nogat. Jehova i laik bai yu yet i wokim tingting bilong yu long mekim wok bilong em. (Ritim Matyu 22:​36, 37.) Papa bilong yumi long heven i no laik bai yu bilip nating, nogat, bilip bilong yu i mas i gat as bilong en.​—Hi. 11:1.

7, 8. (a) Bilong helpim yu long strongim bilip bilong yu, yu ken putim wanem ol mak bilong winim long nau? (b) Taim yu winim pinis sampela mak, wanem gutpela samting bai kamap?

⁷ Bilong strongim bilip bilong yu, putim sampela mak yu laik winim long nau. Wanpela mak yu ken putim, em long beten long olgeta de. Bilong helpim yu long kamapim stret ol samting yu laik beten long en na no ken kolim wankain tok planti taim, yu ken tingim o raitim sampela tok long ol samting i bin kamap long de em yu laik kamapim long beten bilong yu. Tasol no ken kamapim ol hevi tasol, kamapim tu ol samting yu bin amamas long en. (Fl. 4:6) Narapela mak yu ken putim, em long ritim Baibel long olgeta de. Olsem wanem? Yu save olsem sapos yu ritim 4-pela o 5-pela pes long olgeta de, yu bai ritim Baibel olgeta insait long wanpela yia tasol?a Song 1:​1, 2 i tok: “Man i save laikim tumas lo bilong God, na em i save tingting long dispela lo long san na long nait [dispela man i ken amamas tru].”

⁸ Narapela mak tu yu ken putim bilong winim long nau, em long redim wanpela tok bilong bekim long ol miting bilong kongrigesen. Pastaim, ating yu ken ritim bekim i stap long paragraf o ritim wanpela skripsa. Bihain, yu ken putim mak long bekim tok long toktok bilong yu yet. Olgeta taim yu bekim tok, dispela i olsem wanpela presen yu givim long God. (Hi. 13:15) Taim yu winim pinis sampela bilong ol dispela mak, yu bai bilip moa long yu yet, pilim moa yet ol gutpela pasin bilong Jehova, na yu bai redi long putim sampela mak em yu laik winim long bihain.

9. Sapos yu no kamap pablisa yet, yu ken putim wanem ol mak bilong winim long bihain?

⁹ Wanem sampela mak yu ken putim bilong winim long bihain? Sapos yu no kirap yet long autim gutnius, yu ken putim mak long kamap wanpela pablisa. Taim yu kamap pablisa pinis, orait nau yu mas autim tok long olgeta mun na mekim gut dispela wok. Na tu, yu mas lain long mekim wok long Baibel taim yu autim tok. Taim yu mekim olsem, yu bai amamas moa yet long wok bilong autim tok. Orait nau yu ken wok long lusim sampela aua moa long go long ol haus na autim tok, na wok strong long mekim wanpela Baibel stadi. Sapos yu wanpela pablisa i no baptais yet, wanpela gutpela mak tru yu ken putim em long inapim ol mak bilong kisim baptais na kamap wanpela Witnes Bilong God Jehova i dediket na baptais pinis.

10, 11. Ol yangpela i baptais pinis, ol i ken putim wanem ol mak bilong winim long bihain?

¹⁰ Sapos yu wanpela wokboi bilong Jehova i baptais pinis, em hia sampela mak yu ken putim bilong winim long bihain. Ating sampela taim yu ken helpim narapela kongrigesen long autim tok long teritori em wan wan taim tasol ol inap autim tok long en. Na tu, ating yu gat strong na gutpela helt, olsem na yu inap mekim wok painia haptaim o painia oltaim. Planti tausen painia em ol i stap amamas, ol bai tokim yu olsem fultaim sevis em i gutpela rot tru bilong tingim Man Bilong Wokim yu taim yu stap yangpela yet. Dispela em ol mak yu inap winim taim yu stap yet wantaim papamama. Taim yu mekim olsem, dispela bai helpim tu kongrigesen bilong yu.

¹¹ Sampela narapela mak yu putim bilong winim long bihain, em inap opim rot long yu ken helpim sampela kongrigesen moa. Olsem: Yu ken tingting long mekim wok long narapela hap o kantri we ol i sot long ol pablisa. O yu ken helpim wok bilong sanapim ol Haus Kingdom o ol brens ofis long ol narapela kantri. O ating yu inap mekim wok long Betel o kamap wanpela misineri. Tasol paslain long yu ken mekim ol dispela samting, yu mas kisim baptais. Sapos yu no baptais yet, tingim ol samting i insait long wok bilong inapim mak bilong kisim baptais.

Winim Mak Long Kisim Baptais

12. Wanem sampela as na sampela i kisim baptais? Tasol bilong wanem dispela i no stret?

¹² I gat wanem as na yu mas kisim baptais? Ating sampela i ting olsem dispela bai banisim ol long mekim sin. Na sampela i pilim olsem ol i mas baptais, long wanem, ol wankrismas bilong ol i baptais pinis. Na sampela narapela i laik amamasim papamama bilong ol. Tasol baptais i no inap pasim yu long mekim pasin nogut em yu gat laik long mekim. Na yu no ken kisim baptais long wanem narapela i strong long yu mas baptais, nogat. Yu mas baptais taim yu save gut pinis long ol samting yu mas mekim olsem wanpela Witnes Bilong Jehova, na yu save tru olsem yu redi na amamas long mekim dispela samting.​—Sav. 5:​4, 5.

13. I gat wanem as na yu mas kisim baptais?

¹³ Wanpela as na yu mas kisim baptais em olsem: Jisas i bin tokim ol disaipel bilong em long ‘kamapim ol disaipel na baptaisim ol.’ Na em yet i stap gutpela piksa long dispela samting​—em yet i kisim baptais. (Ritim Matyu 28:​19, 20; Mak 1:9.) Na tu, baptais em i bikpela samting bilong ol man husat i laik bai God i kisim bek ol. Taim aposel Pita i stori long Noa i wokim sip na em wantaim famili bilong em i bin go insait long en na Bikpela Tait i no bagarapim ol, em i tok: “Dispela wara em i olsem piksa bilong baptais, long wanem, God i save kisim bek yupela long wara bilong baptais.” (1 Pi. 3:​20, 21) Tasol dispela i no makim olsem yu kisim baptais na bai God i mas lukautim yu sapos wanpela bagarap i kamap, nogat. Yu baptais, long wanem, yu laikim tru Jehova na yu laik mekim wok bilong em long bel, tingting, na strong olgeta bilong yu.​—Mk. 12:​29, 30.

14. Bilong wanem sampela i surik long kisim baptais? Tasol yu ken bilip tru long wanem samting?

¹⁴ Ating sampela i surik long kisim baptais, long wanem, ol i pret, nogut bihain kongrigesen i rausim ol. Olsem wanem? Yu yet i pret long dispela? Kain pret olsem i no samting i nogut olgeta, nogat. Em inap makim olsem yu save em i bikpela samting long stap Witnes Bilong Jehova. Ating narapela as na yu inap surik long kisim baptais, i olsem: Ating yu no bilip tru olsem pasin bilong bihainim ol lo bilong Jehova em nambawan gutpela rot long bihainim. Sapos olsem, orait tingim ol samting nogut i save kamap long man i sakim ol lo bilong Baibel. O, ating yu laikim ol lo bilong God, tasol yu ting yu no inap bihainim. Tasol dispela em i gutpela samting, long wanem, em i soim olsem yu gat pasin daun. Baibel i tok, bel bilong olgeta sinman inap giamanim ol. (Jer. 17:9) Tasol yu ken bilip tru olsem yu inap stap gut long baptais bilong yu sapos oltaim yu wok long ‘bihainim tok bilong God.’ (Ritim Song 119:9.) Maski i gat wanem as na yu surik long kisim baptais, yu mas stretim tingting bilong yu.b

15, 16. Olsem wanem yu inap save olsem yu redi long kisim baptais?

¹⁵ Tasol olsem wanem yu inap save olsem yu redi long kisim baptais? Wanpela rot em long askim yu yet olsem: ‘Mi inap stori gut long ol bikpela tok bilong Baibel long ol narapela? Mi save go long autim tok taim papamama i no go? Mi save wok strong long go long olgeta miting Kristen? Mi inap tingim sampela taim we mi bin sakim ol wanlain i laik pulim mi? Bai mi mekim yet wok bilong Jehova sapos papamama na ol pren bilong mi i no mekim moa wok bilong em? Mi bin beten tokim God olsem mi laik stap pren bilong em? Mi dediket pinis long Jehova long rot bilong beten?’

¹⁶ Baptais em wanpela bikpela samting na yu no ken mekim nating. Olsem wanem? Yu kliagut long ol tok Baibel i mekim long samting bilong baptais? I no olsem yu inap long givim ol gutpela tok long pletfom o kamapim ol gutpela bekim long taim bilong miting na em tasol, nogat. Yu mas inap long wokim ol gutpela disisen em ol stiatok bilong Baibel i as bilong en. (Ritim Hibru 5:​14.) Sapos yu inap long mekim olsem, orait gutpela samting tru i wetim yu​—em long givim bel olgeta long mekim wok bilong Jehova na bihainim ol pasin i kamapim klia olsem yu dediket tru long em.

17. Wanem samting bai helpim yu long karim ol hevi em inap painim yu bihain long yu kisim baptais?

¹⁷ Bihain tasol long yu kisim baptais, ating bel bilong yu bai kirap moa yet long mekim wok bilong Jehova. Tasol i no longtaim na ating sampela hevi bai kamap i traim bilip na pasin bilong yu long sanap strong. (2 Ti. 3:12) No ken ting yu wanpela tasol i mas karim ol dispela hevi. Askim papamama long givim gutpela tingting long yu. Na tu, askim ol strongpela bratasista bilong kongrigesen long helpim yu. Pas gut wantaim ol poroman em ol inap sapotim yu. No ken tru lusim tingting olsem Jehova i save tingim yu, na em bai givim yu strong inap tru long winim ol hevi i painim yu.​—1 Pi. 5:​6, 7.

Olsem Wanem Yu inap Winim Ol Mak?

18, 19. Taim yu skelim ol samting i bikpela samting long yu mas mekim, dispela bai helpim yu olsem wanem?

¹⁸ Maski yu traim bes bilong yu, ating yu pilim olsem yu no gat taim long mekim ol samting yu gat laik long mekim na ol samting yu mas mekim. Sapos olsem, orait skelim wanem ol samting i bikpela samting tru long yu mas mekim. Bilong helpim yu long kliagut long dispela samting, kisim wanpela baket na putim sampela bikpela ston insait long en. Nau pulapim wesan long dispela baket. Baket i pulap nau long ol ston na wesan. Orait nau rausim ol ston na wesan na putim i stap. Nau pulapim gen baket; putim wesan pastaim, na bihain traim long putim ol bikpela ston. Bai i no gat spes, a? Em long wanem, yu bin putim wesan pastaim long baket.

¹⁹ Na i wankain tu taim yu skelim taim bilong yu. Sapos yu putim ol samting olsem pasin bilong painim amamas i stap namba wan, bai yu no gat taim long mekim ol bikpela samting​—em ol wok bilong God. Tasol sapos yu bihainim tok bilong Baibel na “skelim gut wanem ol samting i bikpela samting moa,” bai yu gat taim long mekim ol wok bilong God, na taim tu long painim sampela amamas.​—Fl. 1:​10, NW.

20. Sapos yu wari na tingting planti taim yu wok strong long winim ol mak yu bin putim, yu ken mekim wanem?

²⁰ Taim yu wok strong long winim ol mak yu bin putim, em baptais i wanpela bilong ol, ating sampela taim bai yu wari na tingting planti. Taim yu pilim olsem, orait putim ol hevi bilong yu “long han bilong Bikpela, bai em i karim na bai em i strongim yu.” (Sng. 55:22) Long nau, yu inap insait long wanpela bikpela wok tru i winim ol wok bipo ol man i bin mekim​—em wok bilong autim tok long olgeta hap na lainim ol man. (Ap. 1:8) Yu ken makim olsem yu bai lukim tasol ol narapela i mekim dispela wok, o yu yet i ken insait long en. No ken surik long givim taim, save, na strong bilong yu long mekim wok bilong Kingdom. Sapos yu mekim olsem, bai yu no bel hevi long yu bin mekim wok bilong Man Bilong Wokim yu “taim [yu] yangpela yet.”​—Sav. 12:1.

[Ol Futnot]

Bai Yu Bekim Olsem Wanem?

• I gat wanem as na yu mas putim sampela mak long winim?

• Wanem sampela gutpela mak yu ken putim bilong winim?

• Wanem ol samting i insait long wok bilong inapim mak bilong kisim baptais?

• Taim yu skelim ol samting i bikpela tru long yu, olsem wanem dispela inap helpim yu long winim ol mak?

[Piksa long pes 13]

Yu bin putim mak long ritim Baibel long olgeta de?

[Piksa long pes 15]

Wanem samting bai helpim yu long winim mak yu bin putim long kisim baptais?

[Piksa long pes 16]

Yu kisim wanem skul long dispela piksa?