Ol mak yu putim i olsem plen; yu mas wok strong na bai em i kamap tru
YANGPELA
12 Ol mak
MAKIM WANEM SAMTING
Ol mak yu putim bilong winim em ol samting yu laik bai kamap bihain—i no driman nating. Bilong ol dispela samting i kamap, yu mas plen, redi long mekim senis, na mekim gut wok.
Sampela mak yu putim i bilong sampela de o wik, sampela mun, na wanpela yia samting. Bilong winim ol mak insait long wanpela yia, pastaim yu mas winim sampela liklik mak.
WAI NA EM I BIKPELA SAMTING
Taim yu winim ol mak, dispela bai helpim yu long bilip long yu yet, strongim pasin pren, na amamas bilong yu bai go bikpela.
Bilip long yu yet: Taim yu putim ol liklik mak na yu winim, yu bai bilip olsem yu inap winim ol bikpela mak. Na tu, yu inap strongim bel taim yu bungim hevi bilong wan wan de—olsem yu no larim ol narapela i pulim yu long mekim samting i no stret.
Pasin pren: Ol man i amamas long bung wantaim lain husat i putim ol mak bilong winim—em ol lain i save long samting ol i laikim na ol i redi long winim ol dispela mak. Wanpela gutpela rot bilong strongim pasin pren bilong yu em long wok wantaim narapela long winim wankain mak.
Amamas: Taim yu putim ol mak na yu winim, bai yu pilim olsem yu inapim ol samting yu laik mekim.
“Mi amamas long putim ol mak. Dispela i mekim na mi bisi na wok strong long winim. Na taim yu winim wanpela mak, yu bai amamas long tingim gen na tok, ‘Man, tru tru mi mekim! Mi winim pinis mak mi putim.’”—Christopher.
STIATOK BILONG BAIBEL: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.”—Saveman 11:4.
SAMTING YU KEN MEKIM
Mekim ol dispela samting na winim ol mak yu putim.
Makim. Wokim lista long ol mak yu ting yu inap winim—makim ol samting yu bai mekim, raitim namba 1, namba 2, namba 3, na i go.
Plen. Long wan wan mak, mekim ol dispela samting:
Makim det yu laik winim.
Plen long ol samting yu bai mekim.
Tingim ol hevi inap kamap, na hau yu bai winim.
Mekim. No ken wet long stretim olgeta samting paslain long yu kirap long winim ol mak yu putim. Askim yu yet, ‘Wanem namba 1 samting mi inap mekim bilong winim mak mi putim?’ Na nau yu ken kirap mekim. Bihain long yu mekim ol samting yumi kolim pinis, skelim gen wanem mak yu bin winim.
STIATOK BILONG BAIBEL: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting.”—Sindaun 21:5.