Ol Mak Bilong Spirit Yu Laik Winim
1 Em i gutpela samting tru long yumi inap litimapim nem bilong Jehova inap oltaim oltaim! Bilong mekim olsem, yumi ken putim sampela wok bilong spirit olsem mak yumi laik winim long nau. Dispela bai helpim yumi long mekim gutpela wok long strong bilong yumi. (1 Ko. 9:26) Wanem ol mak i stret long yu long winim?
2 Baibel-Stadi: Yu save redim ol samting bilong olgeta wan wan miting? Sapos olsem, orait taim yu stadi yu save lusim hap taim long kisim sampela insait moa bilong ol samting yu stadi long en, na tingim tingim long bel? Olsem: Taim yu redim Stadi Wastaua na Buk-Stadi Bilong Kongrigesen, yu save makim tasol ol bekim o yu save skelim ol skripsa, na tingim as bilong ol tok paragraf i kamapim? Olsem wanem? Yu inap putim mak olsem long olgeta wik yu bai stadi na kisim insait bilong sampela tok i stap long ol sapta ol i makim bilong Baibel ritim bilong Skul Tiokratik? Kain pasin olsem bilong stadi bai kisim hap taim bilong yu na i hatwok, tasol bai yu kisim ol gutpela samting tru long en.—Snd. 2:4, 5.
3 Ol Miting Bilong Kongrigesen: Narapela mak yu inap putim, em bilong go oltaim long olgeta 5-pela miting. Pasin bilong kam paslain long taim miting i kirap na toktok gut wantaim ol wanbilip na insait long namba wan singsing na beten, dispela i save strongim kongrigesen. Na tu, yumi ken putim mak long bekim tok long olgeta miting na mekim ol bekim bilong yumi i kamap gutpela moa. Ating yu ken stori long olsem wanem wanpela skripsa long paragraf i stret long samting yupela toktok long en long miting, o olsem wanem yumi inap bihainim dispela tok.—Hi. 10:24, 25.
4 Wok Autim Tok: Wok autim tok bilong yumi bai kamap gutpela moa taim yumi putim ol mak bilong winim. Olsem wanem? Yu putim mak long hamas aua yu bai lusim long autim tok long olgeta mun? Sampela i pilim olsem dispela i save helpim ol. O yu inap mekim wanpela hap wok bilong yu long autim tok i kamap gutpela moa, olsem mekim wok long Baibel taim yu autim tok long ol haus, mekim ol gobek i gutpela moa, wok strong long kisim wanpela Baibel-stadi, o mekim gutpela wok tisa moa long ol Baibel-stadi?
5 Olsem wanem? Yupela papamama i wok long kirapim ol pikinini long putim mak ol i ken winim long wok bilong Jehova? Helpim ol long luksave olsem wok painia em i gutpela rot tru bilong kamapim olsem ol i pilim tru gutpela pasin bilong Jehova.—Sav. 12:1.
6 Taim yumi skelim ol wok yumi mekim, na yumi wok strong long winim ol mak yumi bin putim, yumi bai kisim bikpela amamas moa long wok bilong yumi na bai yumi strongim ol narapela.—Ro. 1:12.