Lukautim Gut Ol Pikinini Bilong Yu Bambai Ol i No Ken Kisim Blut

¹ “Ol pikinini . . . i gutpela blesing tru yumi kisim long God.” (Sng 127⁠:⁠3) Sapos yu kisim pinis gutpela blesing olsem, em Jehova i givim long yu, orait yupela ol papamama i ken amamas, tasol yupela i gat bikpela wok bilong skulim na lukautim ol pikinini. Olsem wanem? Yu stretim rot pinis bambai ol yangpela pikinini bilong yu i no ken kisim blut? Sapos dokta i tokim pikinini long kisim blut, pikinini yet bai mekim wanem? Yu bin toktok wantaim famili bilong yu long ol samting ol inap mekim sapos sik samting i kamap na ol dokta i tok ol i mas kisim blut?

² Wok bilong helpim famili bilong yu long redi long kain hevi olsem, dispela i no ken givim hatwok na hevi long ol. Tru yu no save long olgeta samting inap kamap long i stap bilong yu na bai yu redi, nogat; tasol i gat planti samting em yupela ol papamama i ken mekim pastaim bilong lukautim ol pikinini na bai ol i no kisim blut. Sapos yu les long mekim dispela wok na bihain pikinini i slip long haus sik, ating dokta i gat rot long givim blut long em. Orait, yupela i ken mekim wanem?

³ Bilip Strong, Em Bikpela Samting: Yu mas tingim gut ol dispela askim olsem: Yu yet yu bilip strong long lo bilong God long blut? Yu save lainim ol pikinini bilong yu long bihainim lo bilong God long blut olsem yu lainim ol long bihainim ol lo bilong em long yumi no ken stil, o giaman, o pamuk, o insait long ol wok bilong dispela graun, na kain samting olsem? Yumi wanbel tru long lo bilong God long Lo 12⁠:23 i tok: “Yupela i no ken kaikai abus wantaim blut bilong en”? Na ves 25 i tok: “Sapos yupela i no dring [olsem kaikai] blut bilong abus, bai Bikpela i laikim pasin bilong yupela, na bai em i mekim olgeta wok bilong yupela na bilong ol tumbuna pikinini bilong yupela i kamap gutpela.” Ating dokta bai tok, blut bai mekim pikinini “i kamap gutpela.” Tasol taim dispela kain samting i no kamap yet, yu mas strong long tingting olsem yu mas sakim blut​—⁠yu yet i no ken kisim, na no ken orait long ol pikinini bilong yu i kisim. Pasin bilong i stap gut wantaim Jehova olsem pren bilong em, dispela i mas i stap olsem nambawan samting long tingting bilong yu​—⁠nogut yu tingting long skruim liklik hap taim moa long laip bilong yu na yu brukim lo bilong God. Yumi mas mekim ol samting na bai God i ken orait long yumi long nau, na bihain yumi inap kisim laip oltaim!

⁴ Tru tumas, ol Witnes Bilong Jehova i laik i stap laip. Ol i no laik i dai. Ol i laik i stap laip bambai ol inap litimapim nem bilong Jehova na bihainim laik bilong em. Em wanpela as na ol i go long haus sik na bringim ol pikinini bilong ol tu i go bambai dokta i ken stretim sik bilong ol. Na taim dokta i tok long givim blut, ol i tokim dokta ol i laikim ol narapela samting bilong helpim ol​—⁠blut nogat. I gat planti narapela samting i stap olsem senis bilong blut. Ol dokta i gat save ol i mekim wok long ol dispela narapela samting. Ol dispela narapela samting yumi inap kisim i no marasin giaman ol man nating i wokim​—⁠ol i gutpela na sampela buk bilong dokta i tok orait long en. Planti tausen dokta long olgeta hap ol i wok gut wantaim yumi na helpim yumi na ol i no mekim wok long blut, tasol sampela taim i hatwok long painim dokta em i orait long helpim ol pikinini Witnes na maski long blut.

⁵ Painim Dokta i Laik Wok Gut Wantaim Yumi: Ol dokta i mas tingim planti samting taim ol i wok long helpim ol sikman, na taim yu tokim dokta long helpim pikinini bilong yu na maski long blut, dispela i givim hatwok moa long em. Sampela dokta bai orait long helpim ol sikman i bikpela pinis na maski long blut sapos sikman i wokim wanpela pepa i tok, em i no laik kisim blut, na sapos em i kisim bagarap, orait, dokta i no gat asua long dispela. Na sampela dokta bai orait long helpim ol pikinini i kamapim bel bilong ol olsem ol yet i no laik kisim blut. Sampela kot i save, sapos ol pikinini i gat save na tingting na ol yet inap tingim wanem kain marasin samting ol i laik kisim, orait i stret ol dispela pikinini i ken mekim olsem. (Lukim Wastaua [tok Inglis], Jun 15, 1991, p. 16, 17, i stori long ol samting i kamapim klia olsem pikinini i gat save na tingting na em yet inap tingim ol samting em i mas mekim.) Tasol ating sampela dokta i no orait long helpim ol liklik pikinini, olsem ol bebi, sapos ol i no kisim tok orait long givim blut long ol. Wan wan dokta tasol bai tok promis long ol i no ken givim blut long pikinini, maski wanem wanem samting i kamap. Ol lo bilong dokta na kot i mekim na planti dokta i pilim olsem ol i no inap tok promis long ol i no ken givim blut long pikinini. Tasol long nau i gat planti dokta i laik helpim ol pikinini bilong ol Witnes Bilong Jehova na ol i tok ol bai wok strong long mekim ol samting bambai ol i no gat wok long givim blut long ol.

⁶ Tasol olsem wanem sapos yu wok long painim wanpela dokta i orait long helpim pikinini bilong yu i gat sik, na yu painim pinis wanpela dokta i save wok gut wantaim ol Witnes Bilong Jehova na bipo em i bin katim sampela Witnes na em i no mekim wok long blut, tasol em i pilim olsem lo bilong gavman i pasim rot bilong em long tok promis olsem em i no ken mekim wok long blut? Olsem wanem sapos em i tokim yu em i ting em inap helpim pikinini na no gat wok long blut? Orait, sapos kain samting olsem i kamap, ating bai yu larim em i mekim, a? Tasol yu mas tokaut klia olsem, taim yu tok orait long dokta i helpim pikinini, yu no orait long em i givim blut long pikinini. Sapos yu mekim dispela samting, yu yet yu mas karim ol hevi i kamap long dispela na ol i no ken ting yu surik long bihainim bilip bilong yu.

⁷ Tasol sapos yu inap painim narapela samting ol dokta i ken mekim wok long en na i no olsem ol i mas givim blut long pikinini, orait, yu ken bihainim dispela rot. Tasol gutpela sapos yu wok strong long painim wanpela dokta i orait long helpim pikinini na em i tok em i no ken givim blut long em. Gutpela sapos yu tingim ol dispela samting taim hevi i no kamap yet. Taim pikinini i no sik yet, wok strong long painim wanpela dokta i orait long mekim dispela wok sapos sik i painim pikinini. Sapos inap, gutpela yu no ken go long ol dokta na ol haus sik i no laik wok gut wantaim yu.

⁸ Long sampela kantri narapela samting bai mekim na ol dokta bai givim blut long pikinini o nogat em olsem: Husat bai baim haus sik na ol dokta? Sapos papamama i gat helt-insurens o sampela narapela samting bilong helpim ol long painim wanpela dokta ol yet i makim, dispela bai helpim ol na ol i no ken putim pikinini long han bilong ol dokta na lain bilong haus sik em ol i no laik wok gut wantaim papamama. Sapos famili i gat mani, planti taim ol dokta na haus sik bai mekim gut wok na wok gut wantaim famili. Na sapos papamama inap long baim ol samting, planti taim haus sik na dokta i larim papamama i kisim pikinini i stap long narapela haus sik na bringim em i kam long dispela haus sik. Na yupela mama i gat bel, em i bikpela samting yupela i lukautim gut skin bilong yupela long taim yupela i gat bel! Dispela bai helpim yupela na yupela i no ken karim pikinini hariap tumas na hevi bai kamap long dispela; bilong helpim pikinini em mama i karim hariap tumas, planti taim ol dokta i mekim wok long blut bilong helpim em.

⁹ Sampela dokta i gat tok long ol Witnes i no kamapim kwik tingting bilong ol long blut. Nogut yupela i mekim olsem. Taim papamama Witnes i go long haus sik o lukim dokta, namba wan samting ol i mas mekim, em ol i mas toktok wantaim dokta long tingting bilong ol long blut. Sapos dokta i tok em i mas katim pikinini, orait, tokim dispela dokta yu laik lukim hariap narapela dokta, em dokta i gat wok long mekim i dai tingting bilong sikman long taim bilong katim em, na bai yu inap kamapim tingting bilong yu long blut long em. Ating dokta bilong katim man inap stretim rot na bai yu inap lukim dispela dokta bilong mekim i dai tingting bilong sikman. Skelim gut ol pepa yu mas sainim​—⁠no ken sainim hariap. Sapos yu no wanbel long wanpela tok, orait katim long pen bilong makim olsem. Bilong tokaut klia long tingting bilong yu, raitim tok olsem yu no ken kisim blut maski wanem wanem samting i kamap, na as bilong dispela tingting em tok bilong Baibel na ol samting blut inap mekim long man.

¹⁰ Oganaisesen Bilong Jehova i Helpim Yu: Oganaisesen bilong Jehova i bin mekim wanem ol samting bilong lukautim ol pikinini bilong yupela na dokta i no ken givim blut long ol? I gat planti samting. Sosaiti i bin wokim planti buklet samting bilong skulim yumi long ol samting bilong blut na ol samting yumi ken kisim i olsem senis bilong blut na i no gat blut long en. Bipo yu bin stadi long buklet Ol Witnes Bilong Jehova na Tingting Bilong Ol Long Blut na ol narapela buk samting i stori long blut. Na ol brata sista long kongrigesen bai helpim yu na sambai long yu. Taim bikpela hevi i kamap, ating ol elda bai makim wanpela elda long i go wantaim papa o mama bilong pikinini o narapela bilong famili long haus sik na was i stap long pikinini inap sampela aua na bihain narapela elda i senisim em. Ol i mas was i stap long san na nait olgeta, olsem 24 aua, long wanem, taim ol famili na pren i lusim haus sik long nait na i go bek long haus bilong ol yet na i no gat wanpela i stap wantaim pikinini, orait nau rot i op long dokta i givim blut long em. Dispela samting i bin kamap planti taim.

¹¹ Long Papua Niugini i gat 3-pela Hospital Lieson Komiti, ol i stap long ol bikpela taun. Sosaiti i makim olgeta kongrigesen long i stap aninit long wanpela komiti i gat ol brata i bin skul gut bilong mekim dispela wok na ol i redi long helpim ol brata. Long rot bilong ol elda, toksave long ol dispela brata bilong komiti sapos yu laik bai ol i helpim yu. Yu no ken singautim ol long ol liklik hevi, tasol no ken wet inap longtaim tumas sapos yu pilim olsem wanpela bikpela sik i laik kamap. Planti taim ol inap givim nem bilong sampela dokta ol i redi long helpim ol Witnes na ol i gat sampela narapela samting bilong helpim yu. Sapos wanpela brata i mas helpim yu, ol dispela brata bai stretim rot na sampela bai kam na helpim yu, sapos ol inap.

¹² Tingim Hevi Inap Kamap Long Kot na Pasin Bilong Stretim: Olsem wanem sapos wanpela dokta o haus sik i laik kisim tok orait long kot bilong givim blut long pikinini? Olsem wanem? Nau yu mas ting olsem yu lus, na yu no gat rot moa long mekim wanpela samting? Nogat tru! Ating yu gat rot yet bilong sakim blut. Paslain long taim dispela hevi i kamap, yu mas redim gut rot. Yu inap mekim wanem samting?

¹³ Sapos yu save long ol lo i save stiaim haus sik na ol jas bilong kot, dispela bai helpim tru yu. Wanpela bikpela lo long dispela samting em olsem: Lo i no givim namba o strong olgeta long papamama bilong kisim o sakim ol samting ol dokta i laik mekim bilong stretim sik bilong ol pikinini bilong ol. Ol man i bikpela pinis ol inap orait long ol samting dokta i laik mekim bilong stretim sik bilong ol, o ol inap sakim. Tasol ol papamama i no inap sakim ol samting ol dokta i laik mekim bilong stretim sik bilong pikinini bilong ol sapos ol dokta i ting dispela marasin samting bai helpim pikinini, maski papamama i laik sakim dispela marasin samting, long wanem, ol i bilip tru olsem i no stret pikinini i kisim.

¹⁴ Dispela lo i bin kamap klia long tok bilong Sprim-Kot bilong Yunaitet Stets long 1944, em i tok: “Sapos ol papamama i orait long i dai bilong holimpas bilip bilong ol, ol i ken i dai. Tasol sapos wankain hevi i painim pikinini, i no stret long papamama i subim pikinini na em i mas i dai taim em i no bikpela yet na em yet inap skelim wanem rot em i laik bihainim.” Ol lo bilong welfe bilong ol pikinini long nau tu i save tingim ol pikinini olsem ol i mas i stap gut long skin. Ol dispela lo i bilong pasim ol man na ol i no ken bagarapim pikinini, na ol i wokim ol dispela lo tu bilong lukautim pikinini, nogut papamama i no laik kisim pikinini i go long dokta bilong stretim sik bilong em.

¹⁵ Ol papamama Kristen i laikim ol dispela lo bilong lukautim pikinini na bai ol papamama i no ken bagarapim ol pikinini. Tasol planti taim ol i kamapim ol dispela lo na tok bilong Sprim-Kot taim sampela pikinini bilong ol Witnes Bilong Jehova i kisim sik, tasol i no stret ol i mekim olsem. Bilong wanem i no stret? Long wanem, ol papamama Witnes i no laik ol pikinini bilong ol i mas i dai taim ol i holimpas bilip bilong ol, nogat. Sapos i olsem, olsem wanem na ol i kisim ol pikinini i go long haus sik? Ol papamama Witnes i laik painim wanpela dokta na marasin bilong helpim pikinini bilong ol. Ol i laikim tumas pikinini bilong ol, na ol i laik pikinini i mas i stap gut long skin. Tasol ol i bilip olsem God i givim wok long ol bilong skelim gut wanem samting bai ol i mekim bilong stretim sik bilong pikinini. Ol i laik bai ol dokta i stretim sik bilong pikinini, tasol ol i no laik bai pikinini i kisim blut. Sapos pikinini i kisim sampela marasin i no gat blut bilong stretim sik bilong en, dispela i gutpela moa, winim pasin bilong kisim blut, na bikpela samting moa, Man bilong wokim yumi, em God Jehova, bai amamas long ol.

¹⁶ Ol marasin i no gat blut inap helpim gut man, tasol planti dokta na ol man bilong welfe bilong lukautim pikinini ol i ting em i gutpela samting long givim blut long man, o sampela taim blut bai helpim man long i stap laip na em i no ken i dai long dispela sik. Olsem na taim ol papamama Witnes i no laik ol dokta i givim blut long pikinini, hevi inap kamap. Long planti ples, lo i no orait long ol dokta i mekim sampela samting long pikinini sapos papamama i no orait long en. Olsem na sapos papamama i no orait long givim blut long pikinini, sampela taim ol dokta o nes long haus sik i laik kisim tok orait long kot bilong givim blut long pikinini. Ol inap kisim dispela tok orait bilong givim blut long pikinini long rot bilong ol man bilong welfe, o ol dokta, o sampela lain bilong haus sik, em ol i tok ol i mekim ol samting bilong lukautim pikinini.a

¹⁷ Planti taim ol dokta i wok hariap long kisim dispela tok orait long kot bilong givim blut long pikinini na ol i no toksave long papamama, o ol i toksave long ol klostu tru long taim bilong kot. Ol dokta, o ol man i bosim haus sik, o ol lain bilong welfe bilong lukautim pikinini, ol bai tok wantu sik i bin kamap na ol i no gat taim bilong toksave gut long papamama long ol samting ol bai mekim bilong stretim sik bilong pikinini. Bihain taim ol man i askim gut ol, planti taim ol dokta i tok i no olsem pikinini i laik bagarap, tasol ol i laikim tok orait bilong kot “sapos” ol i ting bihain ol i mas givim blut. Yu papa o mama tru bilong pikinini, olsem na i stret ol dokta, na bos bilong haus sik, na ol man bilong welfe, long olgeta taim ol i mas tokim yu ol bai mekim wanem samting tru long pikinini bilong yu. Lo i tok, taim ol dokta i laik kisim tok orait long kot bilong givim blut long pikinini, sapos inap, ol i mas toksave long yu na yu gat rot long kamapim tingting bilong yu long kot, olsem i gat wanem as na yu no laik ol dokta i givim blut long pikinini bilong yu.

¹⁸ Ol dispela samting i kamapim ples klia olsem em i bikpela samting long painim wanpela dokta i laik helpim ol Witnes. Wok gut wantaim dispela dokta, na long rot bilong Hospital Lieson Komiti, helpim dokta long painim ol marasin i no gat blut long en bilong stretim sik bilong pikinini, o kisim pikinini bilong yu i go long narapela dokta o haus sik i laik helpim yu. Tasol sapos yu pilim olsem dokta, o bos bilong haus sik, o lain bilong welfe, ol i laik kisim tok orait long kot bilong givim blut long pikinini, gutpela yu askim ol, ol i laik mekim olsem o nogat. Sampela taim ol i mekim olsem long pasin hait long rot bilong telefon. Sapos ol i tingting long go long kot, tokim ol strong olsem yu laik save long dispela na yu laik i stap long kot bilong kamapim tingting bilong yu tu. (Snd 18:17) Sapos i gat taim, ating i gutpela sapos yu kisim wanpela loya bilong helpim yu. Sampela taim kot i save makim wanpela loya. Sapos yu gat loya bilong yu o loya em kot i makim, ol loya bilong Sosaiti i ken givim sampela save long loya bilong yu, na dispela bai helpim em long kamapim gut tok long kot bilong helpim yu.

¹⁹ Sapos yu sakim blut na nau ol dokta i go long kot bilong kisim tok orait bilong givim blut, tok bilong ol dokta olsem pikinini bilong yu i mas kisim blut bilong i stap laip bai grisim tru kot. Jas i no gat save long ol samting bilong marasin olsem dokta, olsem na planti taim jas bai harim tok bilong dokta. Na ol bai harim moa yet tok bilong dokta sapos papamama i no gat rot bilong kamapim tingting bilong ol, tasol dokta i tok pikinini i mas kisim blut “hariap.” Sapos jas i harim tok bilong dokta tasol na tok bilong papamama nogat, dispela bai no inap helpim em long skelim wanem tok i tru. Tasol yumi no save gut long wanem taim na bilong wanem ol dokta i ting ol i mas givim blut. Planti taim, wanpela dokta bai tok em i bikpela samting tru long em i givim blut long pikinini na pikinini i no ken dai, tasol narapela dokta, em i gat save long stretim dispela sik wantaim ol marasin i no gat blut, em bai tok em i no gat wok long givim blut bilong stretim sik bilong pikinini.

²⁰ Bai yu mekim wanem sapos wanpela loya o jas i askim yu, i gat wanem as na yu no laik givim blut long pikinini bilong “lukautim laip” bilong em na em i no ken i dai? Ating pastaim yu laik kamapim bilip bilong yu long kirap bek na tokaut olsem yu gat strongpela bilip olsem God inap kirapim bek pikinini bilong yu sapos em i dai. Tasol nambawan tingting bilong jas em bilong lukautim pikinini bilong yu, olsem na sapos yu bekim tok olsem, jas bai ting lotu i paulim tingting bilong yu na em i mas mekim ol samting bilong helpim pikinini bilong yu.

²¹ Samting kot i mas save long en em olsem: Yu no sakim olgeta kain marasin samting bilong dokta, nogat, tasol yu no laik bai pikinini i kisim blut, long wanem, yu bilip tru olsem i no stret long lo bilong God na man i kisim blut. Jas i mas save olsem yu gutpela papa o mama na yu no save mekim nogut long pikinini, yu laik bai ol dokta i helpim pikinini bilong yu. Tasol yu no wanbel long tok bilong dokta olsem blut tasol inap helpim man, long wanem, blut inap bagarapim man, na i gat planti marasin samting i no gat blut long en bilong stretim sik.

²² Sapos i gutpela, yu ken tokim jas em tingting bilong wanpela dokta tasol olsem em i mas givim blut long pikinini bilong stretim sik bilong em, tasol ol dokta i gat narapela narapela rot bilong stretim sik, na yu laik painim wanpela dokta i ken mekim wok long ol marasin i no gat blut long en bilong stretim sik bilong pikinini. Ating Hospital Lieson Komiti i bin helpim yu pinis long painim kain dokta olsem, na em inap tokaut long kot bilong helpim yu, o em i ken tokaut long rot bilong telefon. Na lieson komiti inap kamapim sampela save long jas na long dokta i laik kisim tok orait long kot long ol nius bilong ol dokta. Em tok bilong ol nius i kamapim save bilong ol dokta long stretim kain sik olsem bilong pikinini bilong yu long rot bilong marasin samting i no gat blut.

²³ Sapos ol dokta i tokim ol jas olsem kwiktaim ol i laikim tok orait long givim blut long pikinini, planti taim ol jas i no bin tingim ol hevi blut inap kamapim, olsem sik AIDS, hepataitis, na planti narapela sik nogut. Yu ken kamapim ol dispela hevi long jas, na yu ken tokim em tu olsem yu wanpela papa o mama Kristen i bilip, olsem na yu ting sapos man i kisim blut bilong narapela man bilong lukautim laip bilong em, em i brukim tru lo bilong God, na sapos man i subim pikinini long kisim blut, dispela i olsem em i reipim em. Yu na pikinini bilong yu (sapos em i bikpela liklik inap long em yet i ken kamapim bilip bilong em) yupela inap tokim jas olsem yupela i nolaik tru long ol i mekim dispela samting long bodi bilong pikinini, na yupela i ken askim jas olsem em i no ken givim tok orait long ol dokta bilong givim blut, na yupela i laik painim wanpela dokta i redi long helpim pikinini long marasin samting i no gat blut.

²⁴ Sapos yupela i kamapim gut ol tok, ol jas inap save long tingting bilong yupela​—⁠em tingting bilong papamama. Na bai ol i no hariap long givim tok orait long ol dokta long givim blut long pikinini. Sampela taim ol jas i bin tokaut strong olsem ol dokta i no inap givim blut, na ol i mas mekim wok pastaim long ol marasin i no gat blut, o ol i mas larim ol papamama i painim narapela dokta i laik helpim ol long stretim sik bilong pikinini na i no ken givim blut long em.

²⁵ Sapos yu mas toktok wantaim sampela man em ol i laik subim yu long pikinini i kisim blut, yu mas kamapim long ples klia olsem yu gat wanpela tingting tasol em yu nolaik tru long ol i givim blut long pikinini. Sampela taim ol jas (na ol dokta) i askim papamama long givim wok long ol dispela jas (o dokta) long tok orait long givim blut long pikinini bilong ol, na ol i ting dispela bai helpim papamama na bel bilong ol i no gat tok long pikinini i kisim blut. Tasol olgeta i mas save, yu pilim strong olsem em wok bilong yutupela papamama long mekim olgeta samting na pikinini bilong yu i no ken kisim blut. God i bin givim dispela wok long yu. Yu no inap givim dispela wok long narapela man.

²⁶ Olsem na taim yu toktok wantaim ol dokta na jas, yu mas redi gut bilong kamapim klia tingting bilong yu na ol i ken bilip long ol tok bilong yu. Sapos yu bin wok strong, tasol kot i givim tok orait bilong givim blut long pikinini bilong yu, wok yet long askim dokta long em i no ken givim blut long pikinini na em i mas mekim wok long ol narapela marasin i no gat blut. Askim em long skelim sampela tok i stap long ol nius bilong ol dokta na askim em long toktok wantaim wanpela dokta i amamas long toktok wantaim em long rot bilong stretim dispela sik na em i no ken mekim wok long blut. Sampela taim dispela i bin mekim na wanpela dokta i lusim rum bilong katim pikinini na em i amamas na tok em i no bin mekim wok long blut, maski pastaim i luk olsem em i no laik harim tok bilong papamama. Olsem na maski kot i givim pinis tok orait long givim blut long pikinini, yu no ken les, kamapim yet laik bilong yu long dokta!​—⁠Lukim “Askim” long Wastaua (tok Inglis), Jun 15, 1991.

²⁷ Tingim, Jisas i bin tok: “Yupela lukaut long ol man. Ol bai i kotim yupela long ol kaunsil bilong ol . . . na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” Bilong mekim gut bel bilong yumi taim hevi bilong blut i painim yumi, Jisas i bin tok moa olsem spirit holi bai helpim yumi long tingim ol tok i stret long mekim long kain taim olsem na dispela bai helpim yumi.​—⁠Mt 10:​16-20.

²⁸ “Sapos man i putim yau gut long tok bilong ol man i skulim em, orait em bai i gat gutpela sindaun. Na sapos man i bilip strong long Bikpela, bai em i ken amamas.” (Snd 16⁠:20) Yupela ol papamama, gutpela sapos pastaim yupela i mekim ol samting bilong lukautim ol pikinini bilong yupela na ol i no ken kisim blut em inap bagarapim ol long ol samting bilong spirit. (Snd 22⁠:⁠3) Yupela ol pikinini, harim gut ol tok papamama i skulim yupela long en bilong redi gut long sakim blut, na putim gut ol dispela tok long bel bilong yupela. Na yupela olgeta long famili, yupela i mas strong tru long ‘no ken kaikai blut, na olgeta wok bilong yupela bai kamap gutpela,’ long wanem, Jehova bai mekim gut long yupela.​—⁠Lo 12⁠:​23-25.

[Futnot]

This article is repeated in km 11/92.