Pikinini Bilong Yu Inap Wokim Gut Tingting?
1 Pikinini i mas wokim gut tingting long wanem samting? Long pasin bilong kisim blut. Hap bilong The Watchtower bilong Jun 15, 1991, nem bilong en, “Walk as Instructed by Jehovah” i kamapim stori bilong ol pikinini bilong ol Witnes Bilong Jehova em ol i gat wankain tingting olsem papamama bilong ol; ol i sanap strong na kamapim long ples klia olsem pasin bilong bihainim lo bilong God long blut i bikpela samting long ol. Olsem wanem? Kain samting olsem inap painim pikinini bilong yu?
2 Lo i Tok Wanem? Long Amerika, Suprim Kot Bilong Illinois i kamapim tingting bilong en long raits bilong pikinini (em pikinini i no winim 18 krismas) long tokaut olsem em i no laik kisim blut. Taim kot i skelim kot kes bilong wanpela sista i gat 17 krismas, kot i tok: “Sapos ol samting i kamapim klia olsem dispela pikinini i gat tingting bilong man i bikpela pinis na em i kliagut long ol samting bai painim em taim em i no kisim blut na em i wokim tingting olsem man i bikpela pinis, orait lo i givim rait long em long kisim o sakim marasin samting.” Taim ol i laik save pikinini em inap wokim tingting bilong em yet long ol samting, orait ol dokta o ol jas inap toktok wantaim em na bai ol i ken harim em yet i kamapim tingting bilong em long kisim blut. Pikinini i mas kliagut long sik bilong em i bikpela olsem wanem na em i mas save long wanem samting bai painim em sapos em i kisim narapela marasin samting na em i mas tokaut strong long bilip bilong em long lo bilong God long blut.
3 Pikinini Bilong Yu Bai Tok Wanem? Olsem wanem? Ol pikinini bilong yu inap kamapim tingting bilong ol yet long lo bilong God long blut? Ol i bilip tru olsem em lo bilong God long ‘abrusim blut’? (Ap. 15:29; 21:25) Ol inap kamapim ol tok bilong Baibel i as bilong bilip bilong ol? Ol inap strongim bel na sambai long tingting bilong ol long blut sapos ol dokta i tok ol inap i dai, maski sapos papamama bilong ol i no stap? Yumi save “taim nogut i save painim yumi olgeta,” olsem na yu ken mekim wanem bilong redim pikinini bilong yu long stap gut long God taim traim i painim em?—Sav. 9:11; Ef. 6:4.
4 Ol Papamama, Yupela Inap Mekim Wanem? Yu gat wok long skulim ol pikinini bilong yu long tingting bilong God long blut. (2 Ti. 3:14, 15) Buk Toktok Gut, pes 77-81 i stori gut long dispela samting. Mekim stadi long en wantaim famili bilong yu. Mekim wok long dispela hap “Sapos Man i Tok—” long pes 81-3, na mekim traim long en wantaim ol pikinini bilong yu bilong helpim ol na bai ol inap kisim save long olsem wanem ol inap kamapim as bilong bilip bilong ol na bilong wanem ol i mas mekim olsem. (1 Pi. 3:15) Ol narapela buk na nius samting bilong skulim yumi long ol samting bilong blut em buklet Ol Witnes Bilong Jehova na Tingting Bilong Ol Long Blut, na buklet How Can Blood Save Your Life? na Wastaua bilong Jun 15, 2004, pes 14-24.
5 Helpim ol pikinini bilong yu na bai ‘ol inap long save tru long laik bilong God. Bai ol i save long ol pasin i gutpela na long ol pasin God i laikim tumas na long ol pasin i inap tru na i stret olgeta.’ Long dispela rot ol inap makim ol samting ol i laik mekim na Jehova bai mekim gut long ol.—Ro. 12:2.
[Askim Bilong Stadi]
1. Ol pikinini Witnes i bin mekim wanem long pasin bilong kisim blut? Stori long dispela.
2. Wanpela kot i tok wanem long wanpela pikinini husat i no laik kisim blut? Ol papamama Kristen na ol pikinini bilong ol i lainim wanem samting long dispela stori?
3. Ol papamama i mas tingim gut wanem ol askim? Bilong wanem ol i mas mekim olsem?
4, 5. (a) Papamama i gat wanem wok? Olsem wanem ol inap mekim dispela wok? (b) I gat wanem ol samting i stap bilong helpim ol papamama?