Mekim Wok Painia na Tingting Long Mekim Oltaim
1 I gat wanpela wok yumi mas mekim na i makim olsem yumi givim bel tru long Jehova na yumi tingting long kisim laip oltaim. Dispela wok em i wok bilong autim tok. (Ro 10:10; 1 Ti 4:16) Taim Jisas i singautim ol man i go bihainim em, em i tokim ol, ol i mas autim tok bilong Kingdom bilong God. (Lu 9:57-62) Taim yumi kirap bihainim Jisas, i no olsem yumi mas senisim wok mani yumi mekim, tasol tingting bilong yumi i mas senis. Nau yumi mas tingting olsem: Nambawan bikpela wok bilong yumi em wok bilong “tokaut long olgeta gutpela pasin” Jehova i bin mekim long yumi, na bilong kamapim ol disaipel tu. (1 Pi 2:9; Mt 24:14; 28:19, 20) Ol manmeri i givim bel tru long Jehova na dediket long em, long tingting bilong ol dispela wok bilong autim tok em i nambawan bikpela wok ol i mas mekim. Planti, em ol i no gat samting i pasim ol, ol i kirap mekim wok painia na ol i tingting long mekim dispela wok inap oltaim.—2 Ko 4:1, 7.
EM I WOK BILONG AMAMAS
2 Wanpela painia i bin mekim wok painia inap 54 yia pinis, na em i tok: “Amamas mi bin kisim taim mi mekim dispela wok i winim tru ol hevi i bin painim mi. Sapos mi inap kamap yangpela gen, mi laik mekim dispela wok bilong litimapim nem bilong bikpela God, em Jehova.” I no gat wanpela wok mani bilong dispela graun inap mekim bel bilong man i amamas tru olsem wok painia i mekim. Sapos man i givim bel long mekim wok painia, dispela i makim olsem em i givim bel tru long Jehova, na em bai kisim planti gutpela samting long nau na long bihain tu.—1 Ti 4:8.
3 Man i mekim wok painia em inap kisim bikpela amamas moa, long wanem, em i wok long givim samting long narapela man. (Ap 20:35) Taim man i givim bel long mekim wok bilong Kingdom, em i save kamap pren tru bilong Jehova na Pikinini bilong em, Krais Jisas. (Lu 16:9; 1 Ko 15:58) Em bai stap bel isi na bel bilong em i no ken kotim em, long wanem, em i mekim wok bilong Jehova inap tru long strong bilong em na i stap bilong em. Painia i save stretim gut olgeta samting em i mas mekim, olsem na em inap mekim bikpela wok moa long bihainim tok bilong Jisas na tingim Kingdom wantaim stretpela pasin pastaim.—Mt 6:33.
WOK LONG KAMAP STRONG LONG AUTIM TOK
4 Man i tingting long mekim wanpela wok oltaim em i mas mekim sampela samting na bai wok bilong em i ken kamap gutpela moa. Sapos painia i laik sanap strong na karim hevi, na stap amamas na givim bel yet long wok painia, wok em i mekim i mas kamap gutpela moa. Long rot bilong oganaisesen bilong em, olsem long ol miting na kibung, Jehova i save skulim yumi long ol samting bilong spirit. Na tu, ol elda na wasman sekit taim em i kam lukim kongrigesen, ol i save miting wantaim ol painia. Na namel long wik bilong kibung sekit, i gat wanpela bikpela miting bilong ol painia. Olsem wanem? Long kain miting olsem yu save raitim sampela tok long notbuk samting na tingting strong long bihainim ol gutpela tok yu harim?
5 Sapos yu no gat wanpela Baibel-stadi i wok long kamap strong, olsem wanem? Yu bin putim dispela samting olsem wanpela mak bilong winim? Pasin yu mekim bilong kirapim tok o bilong bekim tok long man i laik daunim tok bilong ol Witnes, yu inap lain long mekim i kamap gutpela moa? Em gutpela samting tru sapos yu inap autim tok long longwe teritori o i go i stap inap liklik hap taim long narapela kongrigesen bilong helpim ol, o go i stap olgeta na helpim ol. Long ol dispela rot na long planti narapela rot tu, bai yu inap kamap strong long wok painia na mekim gut ol wok.
6 Long yia 1994 planti brata sista bai kirap long mekim wok painia, na sapos yu tu yu tingting long mekim olsem, yu mas beten yet long Jehova long dispela samting. (Mt 7:7, 8) Planti ol i bin mekim wok painia haptaim pastaim, na dispela i bin helpim ol long bilip na wetim Jehova i helpim ol.
7 Sapos man i laik mekim wok painia, em i no ken ting em i mas i gat bikpela save o narapela kain strong. Tasol em i mas laikim tru Jehova na ol manmeri, na em i mas redi long lusim sampela samting em i laik mekim bambai em i ken helpim ol narapela man. (Mt 22:37-39; Fl 4:13) Wok autim tok inap helpim yu long lain long sampela pasin yu mas kisim bambai yu inap winim taim bilong Armagedon. Sapos yu mekim wok painia, dispela inap helpim yu long sori moa yet long narapela man, na bilip bilong yu bai kamap strong moa, na bai amamas bilong yu i go bikpela, na bai yu stap bel isi. (Ga 5:22, 23) Olsem na yu mas wok long kamap wanpela painia, na taim yu kirap pinis long mekim dispela wok, orait, tingting long mekim dispela wok oltaim!
[Ol Askim]
1. Wanem wok i nambawan bikpela wok ol Kristen i dediket pinis i mas mekim?
2. Wanem wok inap mekim man i amamas tru?
3. Taim man i mekim wok painia, bilong wanem em inap kisim bikpela amamas moa?
4. Yumi ken mekim wanem na bai yumi wok long kamap strong long wok painia?
5. Kolim sampela samting yu ken mekim bilong helpim yu long kamap strong long wok painia.
6. Sapos yu tingting long mekim wok painia, yu mas mekim wanem?
7. Sapos man i laik mekim gut wok painia, em i mas i gat bikpela save o narapela kain strong?
This is a repeat of article in km 1/93 taken from km-E 10/89 “Make Full-Time Service Your Career.”