Makim Taim Bilong Tilim Ol Magasin
1 Jehova i tingting pinis long ‘mekim gut’ long ol man i bihainim laik bilong em, na em i laik bai ol i ken ‘tingim na wetim dispela taim i kamap.’ (Jer 29:11) Wastaua na Kirap! i stori long ol dispela samting na i stret long dispela taim nau. Ol dispela magasin inap helpim olgeta manmeri em wok na sindaun bilong ol i narapela narapela kain. (1 Ti 2:4) Olsem wanem? Yu wantaim famili bilong yu i save makim taim bilong tilim ol magasin long olgeta wik?
2 Sapos nau yu no save tilim planti magasin olsem bipo, yu ken mekim wanem bilong stretim dispela samting? Wanpela samting em olsem: Yu mas amamas yet long ol tok i stap insait long ol magasin bilong yumi. Wanpela man i raitim pas na i tok: “Taim mi kaunim ol nius bilong yupela mi kisim bikpela amamas tru. Ol i no olsem nius nating i giaman long helpim yumi, nogat. Ol inap tru long stiaim tingting bilong yumi na soim rot long yumi na bai i stap bilong yumi i gat as bilong en.” Ol brata i bin lusim bikpela hap taim long painim save long ol tok ol i putim long Wastaua na Kirap!, em ol magasin “wokboi i gat gutpela tingting” i save kamapim. (Mt 24:45) Ol dispela magasin i gutpela rot tru bilong putim tok i go daun long bel bilong man.
3 Yu mas save gut long ol tok i stap insait long ol magasin yu laik tilim. Wok long painim sampela hap tok i stori long sampela hevi i kamap long hap bilong yu. Gutpela sapos yu redim sampela tok yu ken mekim long wanpela man, o meri, o wanpela yangpela yu inap bungim long haus o long rot. Yu mas redi long helpim ol long save, olsem wanem ol magasin inap helpim ol yet na famili olgeta.
4 Tingting Strong Long Tilim Planti Magasin: Long sedyul bilong yu long autim tok yu mas makim bikpela hap taim bilong tilim ol magasin. Wanem kain taim i gutpela long yu ken tilim ol magasin? Olsem wanem? Yu bin traim pasin bilong i go long ol haus na autim tok inap wanpela aua samting long apinun olsem 5 klok samting o paslain long taim yu go long Buk-Stadi bilong yu? Long sampela hap, pasin bilong autim tok long apinun olsem 5 klok samting i bin kamapim gutpela kaikai. Sarere tu i gutpela de bilong tilim ol magasin, na yumi ken mekim long kain kain rot, tasol long ol narapela de tu yu ken mekim dispela wok. Long de ol i makim bilong tilim magasin, gutpela sapos yu go long ol stua na haus bilong ol man na tilim.
5 Gutpela sapos yumi olgeta i gat oda long kongrigesen bilong kisim ol nupela nupela magasin. Sapos yu holim sampela olpela magasin, orait taim i no gat man i stap long haus, yu ken lusim wanpela olpela magasin. Tasol tingting gut—no ken putim long ples klia na bai ol man i ken lukim na ol i save, i no gat man i stap. Na yu ken lusim ol olpela magasin long ol haus sik tu sapos ol i orait long mekim olsem. Ol olpela magasin yu bin tilim yu mas kaunim na raitim long Ripot Bilong Wok Autim Tok.
6 Sapos yu bihainim ol dispela tok, ating bai yu inap tilim planti magasin moa. Ol man i gat gutpela bel, tasol pasin nogut bilong dispela graun i putim hevi long ol, ol i save laikim tumas ol gutpela tok olsem i stap long Wastaua na Kirap! long wanem, dispela i mekim gut bel bilong ol. Ol dispela magasin inap tru long helpim ol man long kisim ol kaikai bilong spirit, em ol man i laik bai Jehova i ken orait long ol. Tru tumas, ol magasin hia ol i gutpela samting tru. Olsem na yu mas tingting strong long tilim planti magasin, na wok long painim kain kain rot bilong tilim sampela moa long teritori bilong yu.