Tilim Planti Magasin na Kisim Amamas
1 Bikpela oganaisesen bilong Jehova long antap i save kamapim ol wok. Na long rot bilong Krais Jisas, Jehova i bin kamapim wanpela oganaisesen hia long graun, em tu i gat ol gutpela wokman insait long en ol i givim bel long wok bilong ol. (Sng 110:3; Mt 9:37, 38) Sapos yumi traim mekim gutpela wok autim tok na mekim bikpela wok autim tok, bai yumi kisim moa amamas. (Lu 10:17) Bai yumi amamas sapos yumi givim bel long tilim planti Wastaua na Kirap! moa.
2 Ol magasin i wanpela bikpela rot bilong ol man i kisim save long Kingdom. Wok autim tok i go bikpela, na long sampela hap ol pablisa i tilim planti magasin tu. Tasol long sampela hap, bipo ol i tilim planti, na nau i no planti tumas. Yumi ken mekim wanem na bai yumi ken stretim dispela samting? Wanem sampela samting yumi ken tingim na i ken helpim yumi long tilim planti magasin moa?
3 Namba wan samting i olsem: YUMI KEN TINGTING STRONG LONG TILIM MAGASIN. Sapos yumi save kaunim ol tok bilong ol Wastaua na Kirap!, dispela tok bilong tupela magasin wantaim bai kirapim yumi long tilim ol dispela magasin long ol man. Taim yumi save pinis long ol tok i stap long magasin, bai yumi gat laik nau long givim long ol narapela man. Sarere em i gutpela taim bilong planti pablisa long tilim magasin long ol haus na long rot na long ples maket. Planti kongrigesen i save makim sampela de namel long wik tu na sapos ol pablisa i no inap autim tok long Sarere ol i ken mekim long namel long wik. Sampela i save autim tok long ol haus long apinun. Na sampela i save autim tok long rot na long ol stua. Na sampela i autim tok na tilim magasin long kain kain taim na ples. Na sampela i save go bek gen oltaim long ol man i bin kisim magasin na ol i bringim nupela magasin long ol. Na taim yumi autim tok long ol haus na ol i no laik kisim buk, yumi ken soim magasin long ol na ating ol bai kisim. Sapos yumi tingting long mekim ol dispela samting, bai yumi kisim amamas.
4 Na narapela samting bilong helpim yu long tilim magasin, em olsem: NO KEN MEKIM BIKPELA TOK O PLANTI TOK. Sampela pablisa i bin stori stori na nau man i les na em i no kisim magasin. Na sampela pablisa, taim ol i laik tilim magasin ol i kamapim Stori Bilong Mun, tasol ating em i no gutpela tumas. Sapos yumi givim liklik tok tasol long man, em gutpela. As bilong dispela wok, em yumi laik tilim planti magasin, na magasin yet bai givim ol tok long man. Sosaiti i tok, sapos yumi toktok inap hap minit tasol, em inap, na yumi ken kolim klia tok na yumi stori long wanpela samting tasol i stap long magasin yumi laik givim long man.
[Ol Askim]
1. (a) Yumi ken mekim wanem na bai yumi ken kisim bikpela amamas moa? (b) Olsem Luk 10:17 i tok, 70 disaipel i bin amamas long wanem samting? (c) Yumi ken mekim wanem na yumi tu i ken bel gut olsem?
2. (a) Long sampela hap, olsem wanem long wok bilong tilim magasin? (b) Orait, yu ting bilong wanem Sosaiti i putim dispela tok hia long Wok Kingdom na yumi stori long en?
3. (a) Olsem wanem na i gutpela sapos yumi tingting long tilim planti magasin? (b) I gat wanem ol rot i stap bilong tilim magasin?
4. (a) Wanem sampela gutpela pasin yumi ken bihainim bilong tilim planti magasin? (b) Olsem wanem yumi ken mekim sotpela tok tasol taim yumi laik tilim magasin?
This article is repeated in km 7/93.