Yu Gat Oda Bilong Yu?

¹ Olsem wanem? Sampela taim yu bin go long bung bilong wok autim tok na nau yu lukim olsem yu no gat ol magasin long bek bilong yu? Wanpela rot bilong stretim dispela hevi em olsem, yu mas i gat oda bilong ol magasin. Ol wan wan pablisa i ken toksave long brata i lukautim ol magasin long hamas magasin ol bai kisim. Long dispela rot, yu na famili bilong yu bai kisim ol magasin long olgeta taim na yupela i no sot. Yu bin mekim olsem?

² Toksave long brata i lukautim ol magasin long putim oda bilong yu. Sapos yu gat oda bai yu pilim olsem yu gat bikpela wok long tilim ol dispela magasin long olgeta wik, na bai yu kisim bikpela amamas long mekim olsem. Sapos yu gat oda pinis, orait yu mas skelim gen, ol magasin yu kisim ol bai inap long yu mekim wok long ol insait long olgeta wan wan mun, o nogat. Long olgeta taim yumi mas kisim na baim oda bilong yumi, na yumi mas ting yumi gat wok long mekim olsem. Na ating yumi mas skulim yumi yet long putim sampela mani i stap bilong baim ol magasin taim ol i kam. Sapos yumi dinau long kongrigesen taim ol i givim ol magasin long yumi na bihain yumi no baim, dinau bilong ol magasin long kongrigesen bai go bikpela. Na dispela samting inap mekim na Sosaiti bai rausim bikpela hap bilong oda bilong ol magasin long oda bilong kongrigesen​—⁠o pinisim oda olgeta​—⁠inap long taim kongrigesen i bekim dinau bilong en. Yumi no laik bai dispela samting i kamap, a? Sapos yu lusim kongrigesen na go long narapela hap inap longpela taim, em wok bilong yu long toksave long brata i lukautim ol magasin olsem yu laik em i mekim wanem long magasin oda bilong yu. Ating yu laik pinisim oda bilong yu, o larim ol magasin i stap inap long yu kam bek, o ol i ken givim long narapela pablisa taim yu no stap.

³ Olsem wanem? Yu inap wok wantaim ol brata sista long De Magasin long olgeta wik? Olsem kalenda bilong ol Witnes Bilong Jehova bilong 1999 i kamapim, De Magasin em i kamap long olgeta Sarere bilong dispela yia! Yumi no ken ting wok bilong tilim Wastaua na Kirap! em i liklik samting. Taim yumi wok strong long insait tru long wok bilong tilim ol magasin, yumi “bringim gutpela tok” long ol gutpela samting i go long ol man i stap long hap bilong yumi.​—⁠Ais 52:⁠7.