Krais Em Gutpela Piksa Bilong Ol Yangpela
1 Inap longpela taim liklik wanpela Witnes i toktok wantaim wanpela yangpela, na nau yangpela i tok: “Mi pilim tru olsem pasin bilong Krais Jisas em i gat strong. Em wanpela bikman mi inap bilip tru long em.” Tasol yumi no ken tok olsem long ol bikman bilong politik o ol man i gat biknem long spot o long televisen samting, nogat. Ol Kristen tru i no ting ol man i bihainim ol pasin i no pasin Kristen ol i gutpela piksa bilong bihainim.—Sng 146:3, 4.
2 Taim ol yangpela i kirap long bilip long Krais Jisas, ol i ken save ol i stap olsem sipsip bilong God, na Jisas i save long ol. Gutpela Wasman bilong sipsip i save tingim ol. (Jo 10:14, 15, 27) Ol yangpela i bihainim Krais olsem Gutpela Piksa bilong ol, ol i save kisim blesing.
3 Wanpela brata i wok nau long Betel long Bruklin, kirap long taim em i gat 8-pela krismas em i putim wok Betel olsem wanpela mak em i laik winim. Ol narapela i strongim em long tingim wok Betel i olsem wanpela gutpela rot bilong em i ken bihainim pasin bilong Krais long taim em i kamap bikpela. Papamama bilong em, na ol wasman bilong raun tu, ol i kirapim em long tingim dispela wok. Bilong helpim em long redi, ol i kirapim em long wok strong olsem ol brata long Betel i mekim, olsem mekim sampela wok long haus, helpim ol brata long klinim Haus Kingdom, na save gut long pasin bilong autim tok. Inap sampela yia pinis em i bin wok long Betel, na nau em i amamas olsem taim em i yangpela yet na i wok long go bikpela em i bin wok strong long bihainim pasin bilong Krais.
4 Jisas i no tingting long painim bikpela wok bilong skin; em i tingting long mekim wok autim tok. Wanpela yangpela sista i gat laik long mekim wok painia long taim em i pinisim skul, tasol em i surik long mekim, long wanem, em i no gat wanpela wok haptaim. Em i wok long tingting: ‘Bai mi kisim wanpela wok mani pastaim, na bihain bai mi wokim pepa bilong mekim wok painia.’ Tasol wanpela elda i tokim em, sapos em i no kirap kwik long mekim wok painia, ating em bai kirap na kisim wanpela wok bilong olgeta de, long wanem, i no gat wanpela samting i pasim rot long em long mekim olsem. Sista i tok: “Mi beten askim Jehova long spirit bilong em i ken soim rot long mi.” Wantu sista i putim nem bilong mekim wok painia haptaim na bihain em i kamap painia oltaim. Bihain liklik, em i painim wanpela wok mani i stret long sedyul bilong em long mekim wok painia.
5 Jisas i strong long autim tok bilong Kingdom long olgeta man na em i no pret. (Mt 4:23) Ol yangpela Kristen tu ol i ken lain long tokaut strong na ol i no ken larim ol man i pretim ol. Wanpela Witnes i gat 14 krismas em i tok: “Olgeta long skul ol i save mi wanpela Kristen. Ol i save gut long dispela samting, olsem na taim mi autim tok na bungim wanpela wanskul, mi no sem. Ol i save putim yau na planti taim ol i kisim buk samting.”
6 Sapos ol yangpela i tingim gutpela pasin bilong Krais, dispela bai helpim ol long tingim gut ol samting ol i laik mekim long bihain. Ol i no tingim ol wok bilong graun ol inap mekim, ol i ‘tingim God i bin wokim ol’ na ol i wok strong long mekim wok bilong Jehova. (Sav 12:1) Olsem Krais Jisas, ol i wok long “laikim tru Papa” na long dispela rot bai ol inap kisim planti blesing, winim ol gutpela samting ol man bilong dispela graun inap givim long ol. Bai ol i no “pinis” wantaim ol pasin bilong dispela graun, nogat; bai ol inap tingting long kisim laip bilong i “stap oltaim.”—1 Jo 2:15-17.