Yupela i Mas Bihainim Wanem Kain Pasin?
1 Klostu nau “De bilong God” i laik painim olgeta man. Long dispela taim God bai givim strafe long olgeta man nogut na kisim bek ol stretpela man. Olgeta man i stap laip long dispela taim, ol i mas tokim God long as bilong olgeta pasin ol i bin mekim. Olsem na aposel Pita i kamapim askim: “Yupela i mas bihainim wanem kain pasin”? Em i tok yumi mas ‘wokabaut long pasin holi, na bihainim olgeta pasin bilong God [olsem givim bel long em], na wok strong long hariapim de bilong God, na stap klin, na i no gat asua long wanpela samting, na stap wanbel wantaim God.’—2 Pi 3:11-14.
2 Wokabaut Long Pasin Holi na Bihainim Olgeta Pasin Bilong God: Bilong wokabaut long pasin holi, yumi mas mekim ol stretpela pasin i litimapim ol lo bilong Baibel. (Ta 2:7, 8) Kristen i mas klia long ol pasin bilong graun, olsem pasin bilong bihainim laik bilong em yet tasol na laik nogut bilong skin.—Ro 13:11, 14.
3 Bilong “bihainim olgeta pasin bilong God” yumi mas pas gut long God, long wanem, bel bilong yumi i pilim tru ol gutpela pasin bilong em. Wanpela bikpela rot bilong kamapim long ples klia yumi “bihainim olgeta pasin bilong God,” em yumi givim bel long wok autim tok. Tasol yumi no autim tok long wanem yumi pilim olsem em wanpela wok yumi mas mekim na em tasol, nogat; yumi autim tok, long wanem, yumi laikim tru Jehova. (Mk 12:29, 30) Oltaim yumi mas givim bel long God, olsem na oltaim yumi mas insait long wok bilong autim tok. Gutpela sapos yumi makim taim bilong autim tok long olgeta wik.—Hi 13:15.
4 Bilong “wok strong long hariapim” de bilong Jehova, dispela de i mas i stap olsem nambawan samting long tingting bilong yumi long olgeta de. Ol samting bilong Kingdom i mas i stap olsem nambawan samting long i stap bilong yumi.—Mt 6:33.
5 Stap Klin, No Gat Asua Long Wanpela Samting, na Stap Wanbel Wantaim God: Yumi bilong bikpela lain na yumi bin ‘wasim ol klos bilong yumi long blut bilong Pikinini Sipsip, na ol klos i kamap waitpela.’ (KTH 7:14) Pasin bilong “stap klin” i olsem: Yumi dediket pinis long Jehova na stap klin long ai bilong em, olsem na yumi mas wok strong na bai pasin bilong dispela graun i no mekim yumi kamap doti long ai bilong God. Bilong yumi “no gat asua long wanpela samting,” yumi no ken tingting long kisim planti mani kago samting, long wanem, dispela inap bagarapim pasin Kristen bilong yumi. (Je 1:27; 1 Jo 2:15-17) Taim yumi stap wanbel wantaim ol man long olgeta samting, yumi kamapim klia yumi bihainim pasin bilong i “stap wanbel wantaim God.”—Fl 4:7; Ro 12:18; 14:19.
6 Sapos yumi klia long ol pasin nogut bilong dispela graun, bai yumi no “wokabaut wankain olsem ol man bilong dispela graun,” em Jehova i makim ol bilong bagarap. Ol gutpela wok bilong yumi bai helpim ol narapela long save, ‘ol manmeri i bihainim God’ ol i stap narapela kain long ‘ol man i sakim tok bilong em.’—Ro 12:2; Mal 3:18.
7 Ol gutpela kaikai bilong spirit yumi save kisim long olgeta taim, i save strongim yumi long bihainim moa yet ol gutpela pasin bilong God. Planti nupela man tu i laik mekim olsem. Gutpela sapos yumi helpim ol long autim tok long mun Ogas.
8 Taim yumi “wokabaut stret,” olsem mekim ol gutpela wok, dispela i litimapim nem bilong Jehova, na strongim kongrigesen, na helpim ol narapela. (1 Pi 2:12) Gutpela sapos oltaim yumi bihainim ol dispela pasin.