Oltaim Litimapim Nem Bilong Jehova
1 I no gat planti samting i olsem bikpela samting na yumi mas tingim oltaim. Sampela bilong ol em kaikai na pulim win na slip. Yumi mas mekim dispela samting sapos yumi laik lukautim skin bilong yumi. Aposel Pol i tok autim gutnius em i bikpela samting olsem taim em i tok: “Oltaim yumi mas givim biknem long God.” (Hi 13:15) Olsem na oltaim yumi mas litimapim nem bilong Jehova, em Papa bilong yumi long heven. Em samting yumi mas mekim long olgeta wan wan de.
2 Taim ol man i laik pulim nabaut tingting bilong Jisas, em i tokim ol: “Mi mas autim gutnius bilong kingdom bilong God.” (Lu 4:43) Insait long tripela yia hap bilong Jisas i mekim wok bilong em long autim tok, olgeta samting em i mekim long olgeta de em samting bilong litimapim nem bilong God. Yumi save Pol i gat wankain tingting long dispela wok, long wanem, em i tok: “Sapos mi no autim gutnius, bai mi stap nogut tru.” ( 1 Ko 9:16) Baibel i kirapim ol gutpela Kristen long redi oltaim long autim bilip bilong ol. (1 Pi 3:15) Long nau planti handet tausen painia na planti milion pablisa i wok strong long mekim olsem.
3 Krais Jisas i givim bel olgeta long mekim wok, na taim yumi tingim dispela samting, dispela i kirapim yumi long bihainim pasin bilong em. (1 Pi 2:21) Ating sampela taim yumi bel hevi taim yumi mas karim ol hevi bilong olgeta de. Olsem wanem yumi ken litimapim nem bilong Jehova long olgeta de sapos yumi mekim wok mani? Na yumi no inap lusim wok bilong famili, maski dispela i pulim bikpela hap taim bilong yumi. Planti yangpela i mas mekim wok bilong skul long olgeta de. Sampela i pilim olsem ol i no inap litimapim nem bilong Jehova long olgeta de. Sampela taim, sampela pablisa i no autim gutnius long wanpela mun olgeta.
4 Jeremaia i no surik long autim tok; em i strong long mekim. Taim em i no tokaut long nem bilong Jehova inap liklik taim, em i pilim olsem wanpela bikpela paia i stap long bel bilong em. (Jer 20:9) Maski i olsem ol bikpela hevi i painim em, oltaim Jeremaia i painim rot long autim tok bilong Jehova long ol narapela man. Olsem wanem? Yumi inap bihainim pasin bilong Jeremaia, em i strongim bel na em i no les kwik, taim yumi litimapim nem bilong Jehova long olgeta de.
5 Yumi no ken autim tok tasol long Jehova taim yumi makim taim bilong autim tok long ol haus wantaim ol pablisa long teritori bilong kongrigesen. Taim man i amamas long harim tok, yumi ken autim tok long em. Long olgeta taim yumi save bungim ol man—sampela i kam long haus bilong yumi, o yumi wok mani wantaim ol, o yumi bungim ol long stua taim yumi sanap long lain bilong baim kaikai samting, o taim yumi raun long PMV. Tok gude tasol na kamapim wanpela tok o askim bilong kirapim tingting bilong man na yupela i ken toktok long dispela. Planti pablisa i pilim olsem long dispela rot ol inap mekim bikpela wok tru bilong autim tok. Oltaim rot i op long autim gutnius long ol man, bai yumi no inap tru lusim wok bilong autim tok bilong Kingdom inap wanpela mun olgeta.
6 Dispela gutpela wok bilong litimapim nem bilong Jehova i no inap pinis. Man bilong raitim Song i tok, olgeta samting i pulim win i mas litimapim nem bilong Jehova. Na yumi tu i laik insait long dispela wok. (Sng 150:6) Sapos long olgeta taim bel bilong yumi i kirapim yumi long mekim olsem, long olgeta de bai yumi wok strong long tokaut long Jehova na Tok bilong em.