Olgeta De Litimapim Nem Bilong Jehova
1 God bilong yumi, Jehova, em i Man bilong wokim yumi na As bilong laip na amamas, olsem na i stret na yumi litimapim nem bilong em. Olsem man bilong raitim Song, yumi wan wan i laik tok olsem: “Bai mi litimapim nem bilong yu moa yet. Bai mi tokim ol manmeri long stretpela pasin yu bin mekim. . . . Long olgeta de bai mi tokim ol long yu bin kisim bek mi.” (Sng 71:14, 15) Bilong mekim olsem, yumi mas painim rot long litimapim nem bilong Jehova long olgeta de na tokim ol man long stretpela pasin bilong em na ol samting em i mekim bilong kisim bek yumi.
2 Ol Kristen bilong pastaim, ol i gutpela piksa long litimapim nem bilong Jehova. Aposel 2:46, 47 i stori long dispela 3,000 manmeri i bin kisim baptais long Pentikos na i tok: “Long olgeta de ol i save bung wantaim long tempel. . . . Oltaim ol i save litimapim nem bilong God, na olgeta manmeri i belgut long ol. Long olgeta de Bikpela i wok long kisim bek sampela manmeri.” Ol i kisim save long tok i tru bilong Jehova na Mesaia bilong em. Bikpela amamas bilong ol i kirapim ol narapela tu long harim na kisim save na litimapim nem bilong Jehova.
3 Rot i Op Long Olgeta De: Planti brata sista long nau i save litimapim nem bilong Jehova long olgeta de taim ol i autim tok long kain kain taim na ples. Wok bilong ol i kamap gutpela moa taim ol i redi gut pastaim. Wanpela sista i tingting pinis long autim tok olsem, tasol em i painimaut ol i bin brukim tupela windo bilong ka bilong em na go insait. Em i singautim wanpela wokman i kam bilong stretim, na em i redi bilong autim tok long em. Sista i beten tu long Jehova i ken stiaim em. Bihain wokman i kam na em i autim tok long em inap wanpela aua na tilim buk Stap Oltaim long em.
4 Narapela sista i save bungim wanpela meri taim tupela i kisim dok bilong ol i go wokabaut liklik. Wanpela taim, tupela i kirap stori gut long ol hevi i save painim yumi, na bihain dispela i kamapim sampela stori moa. I no longtaim na ol i kirapim Baibel-stadi. Bihain dispela meri i tok, sapos ol Witnes i bin kam long haus bilong em, em i no inap harim tok bilong ol, long wanem, em i no bilip long God o long Baibel.
5 Sampela i save autim tok taim ol narapela i kam long haus bilong ol. Long Aialan, wanpela man i kam long haus bilong wanpela sista—em i laik baim i go laip-insurens long em. Sista i tokim em, em i wet long kisim laip i stap oltaim oltaim. Dispela em nupela tingting long man hia, em bilong lotu Katolik. Em i kisim buk Stap Oltaim na i kam long wanpela miting long wik antap, na em i kirap stadi long Baibel. Nau dispela man em i wanpela brata i baptais pinis.
6 Long olgeta de, yumi olgeta i mas redi long litimapim nem bilong Jehova taim rot i op. Gutpela sapos yu putim sampela magasin o liklik nius long ples klia na taim ol man i kam long haus bilong yu, yu inap givim long ol. Sapos yu sindaun long sampela hap bilong malolo liklik, olsem long pak samting, ating rot bai op bilong autim tok long sampela man. Sampela yangpela Witnes long skul i save putim ol nius bilong Baibel long tebol bilong ol bambai ol inap kirapim tok wantaim narapela taim em i lukim na mekim sampela askim long en. Tingim wanpela o tupela skripsa yu inap stori long en. Beten askim Jehova long helpim yu. Em bai blesim yu sapos yu mekim olsem.—1 Jo 5:14.