Yu Inap Autim Tok Long Kain Kain Taim na Ples!
1 Hamas insait long kongrigesen bilong yupela i bin kisim tok i tru long rot bilong wanpela i autim tok long ol long kain kain taim na ples? Ating bai yu kirap nogut long bekim bilong dispela askim. Bilong autim tok long kain kain taim na ples, yumi save autim gutnius long ol man yumi bungim long olgeta de—taim yumi raun, visitim ol wanblut o neiba, go long stua, long skul, long ples wok, na long narapela hap. Insait long wanpela grup i gat winim 200 Witnes i baptais, 40 pesen bilong ol i bin kisim tok i tru long rot bilong wanpela i autim tok long ol long kain kain taim na ples! Olsem na dispela rot bilong autim tok i karim kaikai.
2 Ol man bilong autim tok long taim bilong ol aposel, planti taim ol i autim tok long kain kain taim na ples. Olsem: Taim Jisas i raun long Samaria, em i autim tok long wanpela meri husat i wok long kisim wara long hulwara em Jekop i bin wokim. (Jo. 4:6-26) Filip i kirap toktok wantaim wanpela bikman bilong Itiopia husat i ritim Buk Aisaia, na Filip i askim em: “Ating yu save long as bilong dispela tok yu ritim, o nogat?” (Ap. 8:26-38) Taim aposel Pol i kalabus long Filipai, em i autim tok long wanpela woda. (Ap. 16:23-34) Bihain, taim Pol i stap kalabus long wanpela haus, em i “amamas long lukim ol man i kam long haus bilong en. Em i save autim tok bilong kingdom bilong God, na em i skulim ol manmeri long tok bilong Bikpela Jisas Krais.” (Ap. 28:30, 31) Yu tu inap autim tok long kain kain taim na ples, maski sapos yu man bilong sem. Olsem wanem yu inap mekim?
3 Kirapim Tok: Planti bilong yumi i hatwok long kirap toktok wantaim ol man yumi no save long ol. Ating bai yumi hatwok tu long autim tok i tru long ol man yumi save long ol. Tasol sapos yumi tingim tingim long bel gutpela pasin bilong Jehova, ol gutpela tok i tru em i givim long ol wokboi bilong em, na tingim sindaun bilong ol man bilong graun i nogut tru, orait dispela bai kirapim yumi long autim tok. (Jna. 4:11; Sng. 40:5; Mt. 13:52) Na tu, yumi inap askim Jehova long “strongim bel” bilong yumi. (1 Te. 2:2) Wanpela sumatin bilong Skul Gileat i tok: “Planti taim mi lukim olsem beten i helpim mi taim mi hatwok long toktok long ol man.” Sapos yu surik long toktok, mekim sotpela beten long tingting.—Neh. 2:4.
4 Pasin bilong autim tok long kain kain taim na ples, i no makim olsem yumi mas kirapim tok olsem yumi save mekim taim yumi autim tok long ol haus o kirapim tok long rot bilong wanpela skripsa. Nogat. Sapos yumi putim mak olsem yumi toktok tasol wantaim man na i no olsem yumi mas autim tok hariap, ating dispela bai helpim yumi. Planti pablisa i tok dispela pasin i givim strong long ol long kirap autim gutnius. Sapos man i no laik toktok, orait no ken subim em long toktok wantaim yu. Long gutpela pasin pinisim tok na lusim em.
5 Taim wanpela sista husat i save sem, i go long maket bilong baim ol samting, pastaim em i save lukluk long ol man na smail. Sapos man i smail bek, sista i tromoi sotpela tok. Sapos man bekim tok, dispela i kirapim sista long toktok moa. Sista i putim gut yau long tok bilong man na i traim long skelim wanem tok bilong gutnius bai kirapim tingting bilong man. Long dispela rot, sista i bin tilim planti buk na nius na kirapim wanpela Baibel stadi tu.
6 Go Pas Long Kirapim Tok: Yumi inap tok wanem bilong kirapim tok? Taim Jisas i toktok wantaim meri long hulwara, em i kirapim tok long rot bilong askim meri long givim wara long em. (Jo. 4:7) So yumi tu inap kirapim tok long rot bilong tok gude, o long gutpela pasin yumi mekim wanpela askim. Taim yu toktok, ating yu luksave olsem rot i op long yu inap kamapim wanpela tok bilong Baibel na planim kaikai bilong tok i tru. (Sav. 11:6) Sampela inap kirapim tok long rot bilong kamapim wanpela tok i kirapim tingting bilong man na man yet bai mekim wanpela askim. Olsem: Taim yu wet long lukim dokta, yu inap kirapim tok olsem, “Mi bai amamas tru sapos mi no inap sik moa.”
7 Pasin bilong lukluk na skelim ol samting i kamap, dispela tu inap helpim yu long kirapim tok. Sapos yumi lukim wanpela papa o mama i gat ol pikinini i mekim gutpela pasin, orait yumi ken tok amamas long papa na askim em olsem: “Wanem samting i bin helpim yu long mekim gut wok papa?” Wanpela sista i save putim yau long ol samting ol wanwok i toktok long en, na bihain em i soim magasin i stret long samting ol i stori long en. Taim em i kisim save olsem wanpela meri long ples wok i laik marit, sista i givim em Kirap! i stori long rot bilong redim ol samting bilong weding. Dispela i opim rot long toktok moa long Baibel.
8 Narapela rot bilong kirapim tok, em yumi ken ritim ol buk o nius bilong yumi long hap we ol narapela i ken lukim. Wanpela brata i opim Wastaua o Kirap! long stori i gat het tok i kirapim tingting bilong ol man na em i kirap long ritim. Sapos em i luksave olsem wanpela man i lukluk long magasin bilong em, orait em bai tromoi wanpela askim o stori liklik long samting em i ritim. Planti taim dispela i opim rot long toktok wantaim man na autim tok long em. Sapos yumi lusim wanpela buk o magasin bilong yumi long ples klia, dispela inap kirapim tingting bilong ol wanwok o ol wanskul na bai ol i askim long dispela buk o magasin.
9 Painim Rot Bilong Autim Tok: Taim yumi tingim olsem taim i sot pinis bilong mekim wok autim tok, yumi mas redi oltaim long autim tok long kain kain taim na ples. Yumi mas painim rot bilong autim tok taim yumi mekim ol wok bilong yumi yet long olgeta de. Tingim ol man yu inap bungim, na tingim olsem wanem yu inap kirap toktok gut wantaim ol. Karim Baibel na sampela nius em yu inap givim long ol man i laik harim tok.—1 Pi. 3:15.
10 Planti pablisa i wokim tingting na painim ol rot bilong autim tok long kain kain taim na ples. Wanpela sista husat i sindaun long ol flet i gat sekiuriti, em i save go long hap insait long dispela banis we ol man i save pilai samting, na em i pilai jikso pasel i gat ol naispela piksa bilong ol maunten na wara samting. Taim ol man i sanap na toktok long ol naispela piksa, em i kirapim toktok na stori long ol long tok promis bilong Baibel long “nupela skai na nupela graun.” (KTH 21:1-4) Yu inap tingim ol rot we yu inap autim tok long kain kain taim na ples?
11 Go Bek Lukim Man i Laik Harim Tok: Sapos yu bungim wanpela man i laik harim tok, traim long wokim rot bilong lukim em gen. Sapos i stret long mekim, yu inap tokim man olsem: “Mi amamas tru long toktok wantaim yu. Mi inap bungim yu we na bai yumi ken toktok gen?” Sampela pablisa i save givim atres na fon namba bilong ol long man na tok: “Mi amamas long yumi stori. Sapos yu laik kisim sampela save moa long samting yumi bin toktok long en, em hia atres na fon namba bilong mi.” Sapos yu yet i no inap go lukim man gen, long wanem, em i stap long teritori bilong narapela kongrigesen, orait stretim rot long wanpela bilong dispela kongrigesen i ken go lukim dispela man. O kuskus bilong kongrigesen bilong yu inap helpim yu long toksave long kongrigesen em man i stap long teritori bilong en, long go lukim em.
12 Yumi mas raitim long ripot haptaim yumi lusim bilong autim tok long kain kain taim na ples. Olsem na yu mas raitim long notbuk haptaim yu lusim bilong autim tok, maski sapos em i sampela minit tasol. Tingim dispela: Sapos olgeta wan wan pablisa i autim tok long kain kain taim na ples inap 5-pela minit long olgeta wan wan de, orait ol bai autim tok inap 17 milion aua long olgeta wan wan mun!
13 I gat as tru na yumi laik autim tok long kain kain taim na ples—yumi laikim tru God na ol man. (Mt. 22:37-39) Long bel yumi pilim tru ol gutpela pasin bilong Jehova na ol samting em i tingting pinis long mekim, na dispela i kirapim yumi long tokim ol man olsem Jehova em i ‘strongpela king, na nem bilong em i bikpela tru.’ (Sng. 145:7, 10-12) Taim haptaim i stap yet, pasin bilong tingim tru ol man, bai kirapim yumi long autim gutnius long kain kain taim na ples taim rot i op. (Ro. 10:13, 14) Taim yumi redi gut pastaim, yumi olgeta inap autim tok long kain kain taim na ples, na kisim amamas long bungim man i gat gutpela bel na autim tok i tru long em.
[Askim Bilong Stadi]
1. (a) Pasin bilong autim tok long kain kain taim na ples, em wanem samting? (b) Hamas insait long dispela miting nau, i bin kisim tok i tru long rot bilong wanpela i autim tok long ol long kain kain taim na ples?
2. Baibel i kamapim wanem ol eksampel long pasin bilong autim tok long kain kain taim na ples?
3. Wanem samting inap helpim yumi long daunim pasin bilong sem?
4. Pastaim yumi ken putim wanem mak bilong winim? Bilong wanem i olsem?
5. Wanem samting i helpim wanpela sista husat i save sem, long autim tok long kain kain taim na ples?
6. Olsem wanem yumi inap kirapim tok long kain kain taim na ples?
7. Olsem wanem pasin bilong lukluk na skelim ol samting i kamap, bai helpim yumi long autim tok long kain kain taim na ples?
8. Olsem wanem yumi ken yusim ol buk na nius bilong yumi bilong kirapim tok?
9, 10. (a) Olsem wanem yumi ken painim rot bilong autim tok long kain kain taim na ples? (b) Olsem wanem yu bin mekim olsem?
11. Olsem wanem yumi inap wokim rot bilong lukim man gen taim yumi autim tok long kain kain taim na ples?
12. (a) Bilong wanem yumi mas raitim long notbuk na long ripot haptaim yumi bin lusim bilong autim tok long kain kain taim na ples? (b) Wanem gutpela samting i bin kamap long rot bilong autim tok long kain kain taim na ples? (Lukim blok “Wok i Karim Kaikai!”)
13. Wanem samting i mas kirapim yumi long autim tok long kain kain taim na ples?
[Rait long pes 4]
Yu ken putim mak olsem yu bai bungim tasol ol man na kirap toktok wantaim ol
[Rait long pes 5]
Planti pablisa i wokim tingting na painim ol rot bilong autim tok long kain kain taim na ples
[Blok long pes 5]
Ol Samting Yu Inap Mekim Bilong Kirapim Tok
◼ Beten askim God long helpim yu long kirapim tok
◼ Toktok wantaim ol man i gat pasin pren na ol i no hariap long go long wanpela hap
◼ Lukluk long man, smail, na mekim tok long samting ol man i tingting long en
◼ Putim gut yau
[Blok long pes 6]
Wok i Karim Kaikai!
• Taim wanpela brata i stap long woksop na i wet long ol i stretim ka bilong em, em i autim tok long ol man i stap long dispela hap na givim liklik pepa i singautim ol man i kam harim pablik tok. Long wanpela kibung long yia bihain, wanpela brata i kam tok gude long em. Em wanpela bilong ol man em i bin givim liklik pepa long em, long woksop long yia i go pinis! Dispela man i bin go harim pablik tok na em i givim nem bilong em long wanpela i ken stadi wantaim em long Baibel. Em wantaim meri bilong em i baptais pinis.
• Wanpela sista husat i kisim tok i tru long rot bilong wanpela i autim tok long em long kain kain taim na ples, i tingim olsem ol man em i bungim long rot bilong tripela pikinini bilong em, i olsem spesel teritori bilong em. Ol neiba na ol papamama em i bungim long skul na long ol miting bilong ol papamama, i insait long teritori bilong em. Taim em i kolim nem bilong em long ol, em i save stori liklik olsem Baibel i helpim em tru long mekim bikpela long ol pikinini bilong em, na bihain em i kirap stori long narapela samting. Em i kirap toktok pinis, olsem na i no hatwok long em i kamapim tok bilong Baibel long sampela narapela samting ol i toktok long en. Long dispela rot, em i bin helpim 12-pela man long kisim baptais.
• Taim wanpela man bilong salim insurens i kam long haus bilong wanpela sista, sista i autim tok long em. Sista i askim man sapos em i laik bai wanpela i promis long em olsem em bai i gat gutpela helt, stap amamas, na stap laip oltaim. Man i tok yes, na i askim sista long em i toktok long wanem kain insurens. Sista i soim long em ol tok promis bilong Baibel na i givim em wanpela nius, na dispela man i ritim nius long wanpela nait. Man i kirap stadi long Baibel. Em i kirap long kam long ol miting na bihain em i kisim baptais.
• Taim wanpela sista i raun long balus, em i kirap toktok wantaim meri i sindaun klostu long em na i autim tok. Taim balus i pundaun, sista i givim atres na fon namba bilong em long meri, na i kirapim meri long askim ol Witnes Bilong Jehova long stadi wantaim em taim ol i kam long haus bilong em. Long neks de tasol, tupela Witnes i kam long haus bilong meri. Meri hia i kirap stadi long Baibel, kamap strong hariap, kisim baptais, na i no longtaim em yet i gat 3-pela Baibel stadi.
• Wanpela brata aipas i gat 100 krismas na i stap long haus bilong ol lapun, planti taim em i save tok, “Yumi nidim Kingdom.” Dispela i kirapim ol nes na ol sikman long mekim ol askim na i opim rot long em long stori long Kingdom em i wanem samting. Wanpela meri husat i wok long hap i askim em long em bai mekim wanem long Paradais. Em i tok: “Bai mi lukluk gen na wokabaut gen na kukim wilsia bilong mi long paia.” Em i aipas, olsem na em i save askim dispela meri long ritim ol magasin long em. Taim pikinini meri bilong brata i visitim em, dispela wokmeri i askim pikinini meri sapos i orait long em i kisim ol magasin i go long haus. Wanpela nes i tokim pikinini meri: “Nupela tok bilong dispela haus bilong ol lapun, em: ‘Yumi nidim Kingdom.’ ”
• Wanpela sista i sanap long lain long wanpela haus kaikai na i harim sampela lapun man i sindaun klostu, ol i toktok long ol samting bilong politik. Wanpela bilong ol i tok olsem gavman i no inap stretim ol hevi bilong yumi. Sista i tokim em yet olsem, ‘Dispela em sans bilong mi.’ Em i mekim sotpela beten na i go long ol dispela man. Em i kolim nem bilong em, na bihain em i tokim ol long wanpela gavman we bai pinisim ol hevi bilong ol man, em Kingdom Bilong God, na i givim ol wanpela buklet em i holim. Long dispela taim stret maneja i kam long em. Sista i ting maneja bai tokim em long lusim haus kaikai. Tasol nogat, em i tokim sista olsem em i bin putim yau long tok bilong em, na em tu i laik kisim wanpela buklet. Wanpela wokmeri tu i bin putim yau na em i kam long sista na aiwara bilong em i pundaun. Bipo em i bin stadi long Baibel na nau em i laik kirap stadi gen.