Litimapim Nem Bilong Jehova Long Rot Bilong Autim Tok Long Kain Kain Taim na Ples
1 Ol gutpela wokboi bilong Jehova ol i save painim rot long litimapim nem bilong em long olgeta de. (Sng. 96:2, 3; Hi. 13:15) Wanpela rot bilong mekim olsem em long rot bilong autim tok long kain kain taim na ples. Planti man i lotuim Jehova long nau ol i tenkyu tru olsem wanpela i bin tokim ol long tok bilong Kingdom long rot bilong autim tok long kain kain taim na ples.
2 Taim man i autim tok olsem long wanpela man, dispela i save opim rot long ol narapela tu i harim tok bilong Kingdom. Olsem: Toktok em Jisas i bin mekim wantaim wanpela meri Samaria long hul wara bilong Jekop i bin opim rot na planti moa i laik harim gutnius. (Jo. 4:6-30, 39-42) Taim Pol na Sailas i stap kalabus long Filipai, ol i autim tok long man i was long haus kalabus, na famili olgeta bilong dispela man ol i kisim tok i tru.—Ap. 16:25-34.
3 Ol Rot i Op: Yu gat wanem ol rot bilong autim tok long kain kain taim na ples? Sampela i save mekim olsem taim ol i raun long ol stua, long PMV, o wet long lukim dokta samting. Sampela i save autim tok long hap taim bilong malolo long ples wok o skul. Sapos yumi putim wanpela buk o nius samting bilong Baibel long ples klia, dispela inap kirapim ol narapela long kisim save long ol bilip bilong yumi.—1 Pi. 3:15.
4 Pasin Bilong Kirapim Tok: Wanpela pikinini meri i gat 7-pela krismas na i save sem, em i bin harim long miting olsem em i bikpela samting long yumi olgeta i mas autim tok. Olsem na taim em i go wantaim mama bilong em long stua, em i putim tupela buklet long hanbek bilong em. Taim mama i wok long baim ol samting, pikinini i soim buklet long wanpela meri, na dispela meri i kisim buklet. Taim mama i askim pikinini long olsem wanem em i bin strongim bel na i go toktok wantaim dispela meri, pikinini i tok: “Mi tokim skin bilong mi, Wan, Tu, Tri, Go! Em nau, mi go!”
5 Bilong autim tok long kain kain taim na ples, yumi olgeta i mas kisim kain tingting olsem bilong dispela pikinini meri. Wanem samting inap helpim yumi? Beten long God i ken strongim bel bilong yu na bai yu no pret long toktok. (1 Te. 2:2) Redim wanpela askim o wanpela tok em yu ting ol man i laik save long en na yu ken yusim dispela bilong kirapim tok. Taim yu mekim olsem, yu ken bilip Jehova bai blesim wok yu mekim.—Lu. 12:11, 12.
6 Pasin bilong autim tok long kain kain taim na ples long ol man yumi bungim long olgeta de, dispela i save litimapim nem bilong Jehova na givim amamas long yumi. Dispela wok yumi mekim inap helpim man long kirap long wokabaut long rot i go long laip oltaim.