Yu Redi Long Autim Tok Long Kain Kain Taim na Ples?
1 Pasin bilong autim tok long kain kain taim na ples inap kamapim gutpela samting. Baibel i gat planti stori long ol man i bin autim tok long kain kain taim na ples na gutpela samting i bin kamap long en. (Jo. 4:7-15) Yumi inap mekim wanem bilong redi long autim tok long kain rot olsem?
2 Klos na Bilas: Taim yumi tingim gut klos na bilas bilong yumi long olgeta taim, dispela bai givim rot long yumi ken autim bilip bilong yumi long ol narapela. (1 Ti. 2:9, 10) Sapos yumi pilim olsem bilas bilong yumi i no stret, dispela bai mekim na yumi surik long autim tok. Tasol sapos yumi bilas gut na skin bilong yumi i klin, dispela inap mekim na ol man i laik save long as na yumi bilas gut. Olsem, taim tupela marit Witnes i raun, tupela i bilas gut na ol i sindaun klostu long wanpela man Muslim. Man i luksave long bilas bilong ol na i askim sapos ol i Kristen o nogat. Dispela i opim rot na ol i stori long Baibel inap 3-pela aua.
3 Kirapim Tok: Taim Jisas i bungim meri Samaria long hulwara bilong Jekop, em i kirapim tok long rot bilong askim dispela meri long givim wara long em. Olsem tasol, yumi tu inap kirapim tok long rot bilong mekim wanpela sotpela tok o kamapim wanpela askim i no hatwok long bekim. Maski sampela taim yumi inap surik liklik, tasol sapos yumi bilip na larim Jehova i helpim yumi, yumi inap “strongim bel” na kirapim tok.—1 Te. 2:2.
4 Painim Rot Bilong Mekim: Planti pablisa i painim rot bilong autim tok long kain kain taim na ples. Skelim sindaun bilong yu, na tingim ol manmeri em yu inap bungim long olgeta wan wan de. Karim sampela nius i stret na wanpela liklik Baibel. Lukluk gut long ol samting i kamap na tingim ol man i stap klostu long yu. Taim yu tingim ol rot inap op bilong autim tok long dispela de, ating bai yu redi long autim gut tok.—Fl. 1:12-14; 1 Pi. 3:15.
5 I gat tupela as na yumi laik autim tok long kain kain taim na ples taim rot i op—em pasin bilong laikim tru God na laikim tru ol narapela man. (Mt. 22:37-39) Yumi save olsem taim i sot pinis bilong mekim wok autim tok, olsem na yumi mas redi oltaim long autim tok long kain kain taim na ples. Long dispela hap taim i stap yet, yumi mas mekim gutpela wok long olgeta taim rot i op bilong autim gutnius bilong Kingdom long ol narapela.—Ro. 10:13, 14; 2 Ti. 4:2.
[Askim Bilong Stadi]
1. Wanem stori i soim olsem gutpela samting inap kamap long pasin bilong autim tok long kain kain taim na ples?
2. Olsem wanem klos na bilas bilong yumi i helpim yumi long redi long autim tok?
3. Olsem Jisas i bin mekim, yu mekim wanem bilong kirapim tok?
4. Olsem wanem yumi inap redi long autim tok long kain kain taim na ples?
5. Bilong wanem yumi mas redi oltaim long autim tok long kain kain taim na ples?