Yumi Stap Witnes Long Olgeta Taim
1. Yumi lainim wanem samting long stori bilong Jisas i autim tok long meri long hulwara?
1 Jisas i bin wokabaut inap planti aua. Em i taiet na nek drai. Taim ol disaipel bilong em i go baim kaikai, em i sindaun malolo long wanpela hulwara ausait long wanpela taun bilong Samaria. Jisas i no go long Samaria bilong autim tok, nogat; em i katim i go olsem long Samaria bilong kamap long Galili bilong mekim wok autim tok. Maski i olsem, taim rot i op em i autim tok long wanpela meri husat i kisim wara. (Jo. 4:5-14) Bilong wanem? Long wanem, olgeta taim Jisas i “save holimpas wok bilong autim tok na mekim tok tru tasol.” (KTH 3:14, NW ) Yumi bihainim pasin bilong Jisas na stap Witnes Bilong Jehova long olgeta taim.—1 Pi. 2:21.
2. Olsem wanem yumi ken redi long autim tok long kain kain taim na ples?
2 Redi Gut: Yumi ken redi long autim tok long kain kain taim na ples long rot bilong karim ol buk na nius wantaim yumi. Planti pablisa i save karim ol liklik nius wantaim ol long olgeta taim na ol i save tilim long ol man i wok long stua, long petrol stesin, na ol narapela man ol i save bungim. (Sav. 11:6) Wanpela sista husat i save raun planti taim, olgeta taim em i save putim liklik Baibel na buk Baibel i Tok long beg bilong em, na em i save traim long kirapim toktok wantaim ol man i sindaun klostu long em.
3. Olsem wanem yumi ken kirapim toktok?
3 Kirapim Toktok: Taim yumi autim tok long kain kain taim na ples, i no olsem yumi mas kolim wanpela tok bilong Baibel bilong kirapim tok. Taim Jisas i kirap toktok wantaim meri Samaria long hulwara, em i no tok em i Mesaia. Em i askim meri long givim wara long em, na dispela i kirapim tingting bilong meri na em i mekim sampela askim. (Jo. 4:7-9) Wanpela sista i pilim olsem dispela pasin i bin helpim em long kirapim tok taim wanpela i askim em sapos em i save amamas long selebretim ol bikpela de o nogat. Sista i no tok olsem em i no save selebretim ol bikpela de, long wanem, em i wanpela Witnes Bilong Jehova, nogat, em i tok: “Mi yet i mekim disisen olsem mi no laik selebretim ol bikpela de bilong dispela graun.” Planti taim man bai askim, bilong wanem, na dispela i opim rot long sista long autim tok.
4. Tok bilong Matyu 28:18-20 i kirapim yumi long mekim wanem?
4 Maski Jisas i no autim tok moa long graun, em i laik bai yumi mekim yet wok autim tok long wankain pasin olsem em i bin mekim. (Mt. 28:18-20) Olsem Jisas, em Man i stap gutpela piksa bilong yumi, yumi ol Witnes i redi long autim bilip bilong yumi long kain kain taim.—Hi. 10:23.