Go Oltaim Long Ol Miting—I Helpim Yumi Long Sanap Strong
1 Aposel Pol i tok strong long yumi mas “bilip tru long God.” (Ta 1:9, 13) Taim yumi go long ol miting bilong kongrigesen, yumi tingim ol gutpela samting na yumi skul long ol samting yumi ken mekim na bai yumi no lusim wanpela bilong ol klos pait bilong spirit yumi pasim pinis—long dispela rot yumi inap “sanap strong na sakim olgeta kain pasin bilong trik na giaman Satan i save hait na mekim.”—Ef 6:11; Fl 4:8.
2 Ol Miting i Helpim Yumi: Bilong sanap strong, oltaim yumi mas go long ol miting. (1 Ko 16:13) Long ol miting ol brata i save beten bilong tok tenkyu na litimapim nem bilong God, na tu, ol i beten askim God long helpim kongrigesen. (Fl 4:6, 7) Taim yumi mekim ol singsing bilong Kingdom bilong lotuim Jehova, dispela i strongim yumi na helpim yumi long kamapim tru bel bilong yumi. (Ef 5:19, 20) Paslain na bihain long ol miting, sapos yumi pren gut wantaim ol brata sista, dispela bai kirapim yumi na strongim bel bilong yumi.—1 Te 5:11.
3 Long Epril i go pinis, bikpela pablik-tok, “Klostu Nau Ol Lotu Giaman Bai Pinis,” i strongim ol man i laikim tok i tru long ol i mas hariap na lusim kwik Bikpela Babilon. (KTH 18:4) Long Jun na Julai, 3-pela stadi long Wastaua i stori long ol lait i bin kamap long soim rot long ol stretpela man. (Snd 4:18) Sapos yumi no bin go long ol dispela miting, yumi lus long planti gutpela tok, a?
4 Buk Lo, pes 72 i tok, Skul Bilong Wok Autim Tok i bilong helpim olgeta long kongrigesen long kisim save. Nogut yumi lus long kisim dispela save.
5 Miting Bilong Wok Autim Tok i helpim yumi long mekim gut wok autim tok. Long wanpela miting olsem yumi bin kisim save long pasin bilong tilim Kingdom Nius Namba 34. Yumi save Jehova i bin blesim dispela wok, long wanem, planti gutpela samting i bin kamap long dispela wok long olgeta hap bilong graun. (Skelim wantaim 2 Korin 9:6, 7.) Ol miting i bin kirapim ol brata sista na ol i givim bel long helpim dispela wok.
6 Long Buk-Stadi Bilong Kongrigesen, buk Kamapim Tok Hait i helpim yumi long pilim tru olsem taim i sot pinis na yumi mas wok hariap. Planti bikpela samting i wok long kamap long nau, olsem na yumi mas save gut long truim bilong ol strongpela tok profet bilong Kamapim Tok Hait.
7 Go Oltaim Long Miting Em i Mas Stap Nambawan Samting Long Tingting: Long planti kantri, maski traim i painim ol brata bilong yumi na ol i mas karim hevi, ol i save, em bikpela samting long ol i mas bung wantaim long olgeta wik. Olsem: Long Barundi, Ruanda, Laibiria, Bosnia na Hetsagovina, planti nupela i kam long ol miting, winim ol pablisa inap tupela o tripela taim. Long dispela rot Jehova i helpim ol brata long stap strong na wanbel wantaim.—Fl 1:27; Hi 10:23-25.
8 Sapos yu no save go oltaim long ol miting, yu mas kirap nau na stretim dispela samting. (Sav 4:9-12) Bilong sanap strong, yumi mas toktok wantaim ol strongpela brata na sista, na yumi inap mekim olsem long rot bilong go oltaim long ol miting.—Ro 1:11.