Olsem Wanem Mi Inap Kirapim Man Long Harim Tok?
1 Long biktaun Filipai, “wanpela meri, nem bilong en Lidia, em i harim dispela tok. . . . Bikpela i tanim bel bilong em, na em i putim yau long dispela tok Pol i mekim.” (Ap 16:14) Dispela stori i lainim yumi long wanem samting? Em olsem: Taim man i harim tok, dispela i opim rot long em i ken lainim tok i tru. Yumi no inap autim gut tok bilong Kingdom long man sapos em i no laik harim tok. Taim man i putim yau, i no hatwok tumas long yumi autim tok long em. Tasol sampela taim i hatwok long kirapim man long harim tok. Yumi ken mekim wanem?
2 Paslain long yumi go autim tok, yumi mas tingim gut ol klos yumi bai pasim, na paus yumi laik karim, na ol buk samting yumi bai mekim wok long en. Bilong wanem? Long wanem, ol man i amamas moa long harim tok bilong man i luk olsem em i gat nem. Olsem wanem? Yumi bilas gut na pasim klos i stret? Tru, planti man ausait i save mekim nabaut long klos ol i pasim na long bilasim skin, tasol yumi no ken bihainim pasin bilong ol, long wanem, yumi ol wokman bilong God i stap olsem maus bilong Kingdom bilong em. Taim yumi bilas gut na pasim klinpela klos, dispela i strongim tok bilong Kingdom yumi autim long ol man.
3 Mekim Pasin Pren na Tingim Gut Man: Long nau tingting bilong ol man long Baibel i wok long senis, tasol planti man i tingim yet Baibel na ol bai amamas long harim tok bilong en taim yumi mekim gutpela pasin pren na tingim gut ol. Sapos yumi amamas na lap, dispela inap mekim isi bel bilong man na opim rot long stori gut wantaim em. Toktok na pasin bilong yumi i mas kamapim olsem yumi tingim tru man bilong haus na mekim gutpela pasin long em, na tu taim yumi putim gut yau long tok bilong em.
4 Yumi laik kamapim long ol narapela ol gutpela tok promis i stap long Baibel. Olsem na yumi mas was gut, nogut yumi mekim tok i sutim bel bilong man o i kirapim tok pait; tok bilong yumi i mas pulim tingting bilong man. Yumi no ken lusim nating taim long tok pait wantaim man i birua long yumi. (2 Ti 2:23-25) Yumi ken bihainim wanpela bilong ol narapela narapela gutpela pasin bilong mekim tok long man olsem ol i putim long Wok Kingdom Bilong Yumi na buk Toktok Gut Wantaim Man. Tasol yumi mas redim gut dispela tok na bai yumi inap mekim tok long gutpela pasin em bai kirapim man long bilip long en.—1 Pi 3:15.
5 Taim yumi lusim pinis haus bilong ol man, wan wan tasol inap tingim olgeta tok yumi bin mekim. Tasol klostu olgeta inap tingim pasin bilong yumi long mekim tok. Yumi no ken daunim strong bilong gutpela pasin na pasin sori. I gat planti manmeri i olsem sipsip long teritori bilong yumi, em ol bai putim yau long tok i tru olsem Lidia i bin mekim long taim bilong ol aposel. Sapos yumi tingim gut bilas bilong yumi na pasin bilong yumi long mekim tok, dispela inap kirapim ol man i gat gutpela bel long harim tok bilong Baibel na kisim gut.—Mak 4:20.