Autim Gutpela Tok—Putim Gut Yau na Mekim Gut Dispela Wok
1 Bilong mekim gut wok autim tok, yumi mas save, ol man i no wankain tasol. Ol samting i bin painim olgeta wan wan na ol samting ol i gat bikpela tingting long en na ol samting ol i gat laik long kisim, i no wankain—i narapela narapela. Olsem na taim yumi autim tok, yumi mas tingting long olsem wanem yumi ken kamapim tok bilong Kingdom bambai em i stret long man bilong haus, na em i ken save long olsem wanem Kingdom inap helpim em yet. Bilong mekim gut dispela wok, orait, taim em i toktok yumi mas putim gut yau.
2 Planti pablisa, taim ol i kirapim tok ol i save kamapim sampela askim na bai man bilong haus i ken insait long toktok. Mekim ol gutpela askim i save kirapim man long kamapim tingting bilong em, tasol was gut, nogut ol dispela askim i strongpela tumas na semim man bilong haus. Tasol taim man bilong haus i toktok, em i bikpela samting long yumi mas putim gut yau na harim gut ol tok bilong em. Pasin bilong putim gut yau i makim olsem yumi laikim dispela man na yumi daun long em, na long dispela rot yumi inap kisim save long tingting bilong em. Sapos yumi save long sindaun bilong dispela man, olsem ol hevi bilong em, orait, bai yumi inap mekim pasin sori long em, olsem pilim tru hevi bilong em. Na nau yumi ken kamapim ol gutpela tok bilong Baibel i save mekim gut bel bilong man i gat hevi, na tokim em long ol gutpela samting Baibel i tok em i ken wetim i kamap bihain.
SENISIM TOK
3 Aposel Pol i tok: “Yupela i mas tingting gut na traim long bekim gut tok bilong olgeta man.” (Kl 4:6) Tru, paslain long yumi autim tok yumi no save stret long ol tok em man bilong haus bai kamapim, tasol yumi save pinis long ol hevi i save painim planti man long nau, a? Olsem na yumi inap “tingting gut” long ol tok yumi ken mekim, na taim ol man i kamapim kain kain tingting bilong ol bai yumi redi long “bekim gut tok.”
4 Ating yumi redi pinis long toktok wantaim man bilong haus long gutaim bai kamap, tasol man hia i tokim yumi long ol i bin rausim em long wok. Orait, olsem wanem? Bai yumi strong yet long kamapim dispela tok yumi redi pinis long mekim o bai yumi senisim tok na bai tok i stret long dispela hevi bilong em? Ating man hia i tingting planti long olsem wanem em inap lukautim famili bilong em. Orait, yumi ken mekim wanem bilong helpim em? Yumi mas mekim pasin sori na pilim tru dispela hevi bilong em. Na long pasin isi kamapim sampela tok bilong Baibel na bai em i ken save taim gavman bilong God i bosim graun, bai olgeta man i gat gutpela wok na ol narapela samting bilong givim gutpela sindaun long ol.—Ais 65:17, 21, 22, 24.
5 Ating man bilong haus i tokim yumi olsem raskol i bin mekim nogut long em o long wanpela wanblut bilong em, o kain hevi olsem. Sapos yumi sori long em na kamapim tok i makim olsem yumi pilim tru dispela hevi i bin painim em, orait, dispela bai mekim na ating em inap harim sampela tok bilong yumi. Nau rot i op long helpim em long save, God Jehova i lukim pinis ol hevi i painim ol man, na liklik taim nau bai em i pinisim olgeta pasin nogut bilong graun.—Lukim buk Reasoning, pes 10, 12, 229-231.
6 Sampela taim ol man i no inap i stap wanbel na pas gut wantaim, long wanem, ol i no save toktok gut wantaim. Taim narapela i toktok, ating narapela i no putim gut yau na bel bilong em i no pilim gut dispela tok. Na sapos em i no putim gut yau, bai em i kisim kranki ol tok o em i no save gut long olsem wanem em inap helpim narapela. Sapos yumi kisim pasin bilong putim gut yau long tok bilong man, bai yumi inap mekim gut wok autim tok, na bihainim pasin bilong Jehova long tingim ol narapela, na yumi inap helpim ol narapela long kamap olsem pren bilong dispela gutpela Man bilong wokim yumi na ol i ken pas gut wantaim em na lain bilong em.—Je 1:19; gE 11/22/74 pes 21-23.
[Ol Askim]
1. (a) Ol pablisa i mas mekim wanem long taim ol i autim tok? (b) Taim man bilong haus i toktok, bilong wanem yumi mas putim gut yau?
2. (a) Taim man bilong haus i toktok, bilong wanem yumi mas putim gut yau na harim gut ol tok bilong em? (b) Sapos yumi save long sindaun bilong man bilong haus, olsem ol hevi bilong em, orait, bai yumi inap mekim wanem?
3. (a) Kolosi 4:6 i tok ol wan wan pablisa i mas mekim wanem? (b) Sapos pablisa i bihainim dispela tok, em inap mekim wanem?
4, 5. Wanem gutpela samting inap kamap sapos man bilong haus i save yumi pilim tru ol hevi samting bilong em?
6. Taim man i no putim gut yau long tok bilong narapela man, wanem samting inap kamap? Taim yumi putim gut yau long tok bilong man, wanem gutpela samting inap kamap?