Askim

◼ Dispela tok “brata” na “sista” i makim husat tru?

Insait tru bilong dispela tok “brata,” i makim ol man na meri i gat wanpela papa na mama. Olsem na ol i pas gut wantaim. Na i stap bilong ol na ol samting ol i mekim wantaim, dispela tu i mekim na narapela i stap klostu long narapela olsem gutpela pren.

Jisas i lainim ol disaipel bilong em olsem, taim ol i beten long Jehova, ol i mas tok “Papa bilong mipela.” Dispela tok i makim olsem, yumi olgeta Kristen i insait long wanpela gutpela famili bilong spirit i pas gut wantaim. Jisas i kamapim klia moa yet dispela samting taim em i tokim ol disaipel, “yupela olgeta i stap brata brata.”​—Mt 6:9; 23:⁠8.

Insait long lain bilong God, narapela i pas gut wantaim narapela, olsem na yumi save tok “Brata” o “Sista”​—⁠yumi mekim olsem long ol miting bilong kongrigesen. Brata i lukautim miting em i mekim dispela tok “brata” o “sista” long man o meri i baptais pinis, na em i kolim namba tu nem bilong em wantaim.

Olsem wanem sapos wanpela man o meri i no baptais yet i laik bekim sampela tok long miting? Sapos longtaim pinis em i bin bung wantaim lain bilong Jehova, na em i tingting long dediket, na em i tingim em yet i olsem wanpela Witnes Bilong Jehova, orait, no gat rong long tok “Brata” o “Sista” wantaim namba tu nem bilong em. I wankain tu long pablisa i no baptais yet.

Tasol man o meri i kirap nau tasol long kam long ol miting, ol i no bin mekim sampela samting bilong makim olsem ol i insait long lain bilong God. Ol i no insait yet long famili bilong God long spirit, olsem na i no stret yumi tok “Brata” o “Sista” long ol. Olsem na long taim bilong miting, yumi ken kolim namba wan na namba tu nem wantaim.

Long ol miting bilong kongrigesen, dispela tok “brata” na “sista” i makim olsem yumi pas gut wantaim olsem gutpela pren​—⁠nem tasol bilong man o meri i no makim tru dispela samting. Taim yumi harim dispela tok “brata” na “sista,” yumi tingim dispela gutpela samting: Yumi insait long wanpela famili bilong spirit i stap aninit long wanpela Papa, God Jehova, na tu, yumi mas laikim tru ol narapela na sori long ol.​—Ef 2:​19; 1 Pi 3:⁠8.