Askim

◼ Husat inap beten long ol miting bilong kongrigesen?

Beten bilong kongrigesen em i wanpela bikpela samting bilong lotu bilong yumi. Taim wanpela brata i beten long Jehova long ai bilong ol narapela, dispela em i wanpela gutpela na bikpela wok. Olsem na ol elda i mas skelim gut, taim ol i pasim tok long husat ol brata i winim mak bilong mekim beten long ol miting. Ol brata i baptais pinis em ol i makim ol bilong beten long ai bilong kongrigesen, ol i mas i stap olsem ol strongpela wokman Kristen, na olsem gutpela piksa, na ol i gat gutpela nem long kongrigesen. Ol beten ol i mekim long pasin bilong lotuim God na long pasin daun i kamapim klia olsem ol i stap klostu long God Jehova. Stori “Apim Han Bilong Yu Long Mekim Beten” long Wastaua, Janueri 15, 1999, i kamapim sampela bikpela tok bilong helpim ol brata i save mekim beten long ai bilong kongrigesen.

Ol elda i no inap makim wanpela brata long beten sapos brata i save mekim sampela pasin i no gutpela tumas, o em i no save tingting gut taim em i mekim ol samting. Sapos wanpela brata i no save amamas long ol wok samting ol narapela i save mekim long kongrigesen, o taim em i beten em i save autim hevi i stap namel long em na narapela, orait ol elda i no inap makim em long mekim beten. (1 Ti 2:⁠8) Na maski wanpela yangpela brata i baptais pinis em i gat 13 i go inap 19 krismas, ol elda i mas skelim em bilong save em i strong long ol samting bilong spirit inap long em i beten long ai bilong kongrigesen o nogat.​—⁠Aposel 16:​1, 2.

Sampela taim long bung bilong autim tok i no gat wanpela brata i winim mak bilong mekim beten, olsem na long kain taim olsem wanpela sista i baptais pinis i mas beten. Em i mas pasim samting i stret bilong karamapim het bilong em. Sapos ol elda i save bai i no gat wanpela brata inap mekim beten i stap long bung bilong autim tok, ol i ken makim wanpela sista i winim mak long i go pas long dispela bung.

Siaman bilong Pablik-Tok i save mekim beten bilong kirapim miting. Tasol long ol narapela miting bilong kongrigesen taim i gat ol narapela brata i winim mak ol i stap, ol inap makim ol long beten long kirap o long pinis bilong miting, na i no ol brata i lukautim ol dispela hap tasol inap beten. Tasol em i gutpela long makim brata long mekim beten paslain long miting i kirap bambai em i ken tingting gut long tok em bai mekim. Long dispela rot em inap mekim beten em ol brata sista inap kisim gut insait bilong en na beten i stret long dispela miting.

I no olsem ol kain beten i mas longpela, nogat. Taim wanpela brata i mekim beten long ai bilong ol man, i gutpela sapos em i sanap na beten na strong bilong nek i antap inap long skel bilong hap em i stap long en, na em i kolim stret ol tok. Dispela bai mekim na olgeta i bung ol inap long harim beten, na long pinis bilong en ol inap tok “Amen!”​—⁠1 Sto 16:​36, NW; 1 Ko 14:16.