Namba 7 Hap—Mekim Ol Baibel Stadi i Save Helpim Ol Man
Mekim Beten Long Taim Bilong Stadi
1 Bilong ol Baibel sumatin i ken kamap strong long ol samting bilong spirit, Jehova i mas blesim stadi. (1 Ko. 3:6) Olsem na i stret long kirapim na pinisim stadi long rot bilong beten. Planti taim yumi inap kirap mekim olsem long namba wan taim yumi stadi wantaim ol manmeri em ol i save tingim ol samting bilong lotu. Long sampela sumatin, ating yumi mas skelim wanem taim i stret long kirap mekim beten long stadi. Ating yu ken mekim wok long Song 25:4, 5 na 1 Jon 5:14 long helpim sumatin long kliagut long as na yupela i mas beten, na tu, yu ken mekim wok long Jon 15:16 na stori olsem em i bikpela samting long beten long Jehova long rot bilong Jisas Krais.
2 Husat i mas mekim beten long taim bilong stadi? Sapos wanpela brata i baptais pinis i go wantaim wanpela sista long stadi, orait em i mas mekim beten, tasol sista bai karamapim het long wanpela laplap samting na mekim stadi. (1 Ko. 11:5, 10) Tasol sapos wanpela man em i pablisa i no baptais yet i go wantaim wanpela sista long stadi, orait sista i mas mekim beten. Long kain taim olsem, sista i mas karamapim het bilong em long wanpela laplap taim em i beten na long taim em i mekim stadi.
3 Ol Samting Yu Ken Beten Long En: Ol beten long taim bilong stadi i no ken longpela, yu mas kolim stret ol samting i stret long stadi. Yu ken beten askim God long blesim stadi na tok tenkyu long tok i tru em sumatin i lainim, na i stret tu long givim biknem long Jehova em Man bilong skulim yumi. (Ais. 54:13) Yumi ken kamapim tu olsem yumi tingim sumatin, na yumi ken tok tenkyu long oganaisesen Jehova i yusim. (1 Te. 1:2, 3; 2:7, 8) Taim yumi beten long Jehova i ken blesim ol samting sumatin i mekim bilong bihainim ol tok em i lainim, dispela bai helpim em long luksave olsem em i bikpela samting long em i ‘bihainim tok em i harim.’—Jem. 1:22.
4 Pasin bilong beten long taim bilong stadi i save kamapim gutpela samting. Jehova bai blesim stadi. (Lu. 11:13) Beten i kamapim klia olsem em i bikpela samting long stadi long Tok Bilong God. Taim sumatin i harim beten bilong yumi, em i lain tu long pasin bilong beten. (Lu. 6:40) Na tu, sapos pasin bilong laikim tru God na amamas long ol gutpela pasin bilong em i kirapim yumi long beten, orait dispela inap helpim sumatin long pas gut wantaim Jehova.
[Askim Bilong Stadi]
1. (a) Bilong wanem em i stret long kirapim na pinisim stadi wantaim beten? (b) Olsem wanem yumi ken kirap mekim beten long stadi?
2. Sapos wanpela brata i baptais pinis o wanpela man em pablisa i no baptais yet i go wantaim wanpela sista long stadi, orait husat i mas mekim beten?
3. Wanem ol samting i stret yumi kamapim insait long beten?
4. Taim yumi kirapim na pinisim stadi wantaim beten, dispela i kamapim wanem ol gutpela samting?