Ol Beten Bilong Yu i Kamapim Olsem Yu Wanem Kain Man?
“Yu save harim beten bilong mipela. Olsem na mipela olgeta manmeri i mas i go long yu.”—SNG. 65:2.
1, 2. Bilong wanem ol wokman bilong Jehova i ken bilip tru olsem em i save harim beten bilong ol?
JEHOVA i save harim beten bilong ol gutpela wokman bilong em. Yumi ken bilip tru olsem em i save harim beten bilong yumi. Maski sapos planti milion Witnes Bilong Jehova i beten long wankain taim, Jehova inap harim olgeta wan wan beten.
2 Man bilong raitim song, Devit, i bilip tru olsem God i save harim ol beten bilong em. Em i tok: “Yu save harim beten bilong mipela. Olsem na mipela olgeta manmeri i mas i go long yu.” (Sng. 65:2) Jehova i save harim ol beten bilong Devit, long wanem, Devit em i man i lotu tru long Jehova. Yumi ken askim yumi yet: ‘Ol beten bilong mi i kamapim olsem mi bilip tru long Jehova na i soim olsem lotu i tru i stap nambawan samting long tingting bilong mi? Ol beten bilong mi i kamapim olsem mi wanem kain man?’
Beten Long Jehova Long Pasin Daun
3, 4. (a) Taim yumi beten, yumi mas mekim long wanem kain pasin? (b) Yumi mas mekim wanem sapos yumi bel hevi na tingting planti long wanpela bikpela rong yumi bin mekim?
3 Bilong God i ken harim beten bilong yumi, yumi mas beten long pasin daun. (Sng. 138:6) Yumi mas askim Jehova long skelim yumi, olsem Devit i bin mekim taim em i tok: “God, skelim mi gut na bai yu save long olgeta tingting i stap long bel bilong mi. . . . Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.” (Sng. 139:23, 24) Taim yumi beten olsem, yumi mas larim God i skelim yumi na yumi mas daun long ol skultok bilong em i stap long Baibel. Jehova inap bringim yumi i go long “rot bilong kisim laip bilong i stap gut oltaim oltaim.”
4 Tasol olsem wanem sapos yumi bel hevi na tingting planti long wanpela bikpela rong yumi bin mekim? (Ritim Song 32:1-5.) Taim bel i wok long kotim yumi, nogut yumi wok long daunim. Sapos yumi mekim olsem, strong bilong yumi inap lus olgeta, kain olsem wanpela diwai i no gat wara na i drai long taim bilong bikpela san. Sin bilong Devit i mekim na em i no stap amamas moa, na ating em i kisim sik tu. Tasol taim em i autim sin bilong em, nau hevi bilong em i pinis! Tingim amamas bilong Devit taim em i pilim olsem Jehova i ‘lusim pinis rong bilong em’ na fogivim em. Pasin bilong autim sin long God inap daunim bel hevi bilong man, na helpim i kam long ol elda Kristen, dispela tu inap helpim em long pas gut gen wantaim Jehova.—Snd. 28:13; Jem. 5:13-16.
Askim God Long Helpim Yu na Tok Tenkyu
5. Taim yumi tingting planti long wanpela samting, yumi mas mekim wanem?
5 Sapos yumi tingting planti long wanpela samting, yumi mas bihainim tok bilong Pol: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” (Fl. 4:6) Long taim bilong hevi o pasin birua, yumi mas mekim moa yet ol prea we yumi beten strong long pasin daun na askim Jehova long helpim na stiaim yumi.
6, 7. Wanem sampela as na taim yumi beten, yumi mas mekim tok tenkyu?
6 Tasol sapos yumi beten tasol long taim yumi laik kisim helpim, dispela bai kamapim wanem samting long pasin bilong yumi long stap pren bilong Jehova? Pol i tok yumi mas “tok tenkyu long em” tu. I gat as na yumi mas tok tenkyu long God olsem Devit i bin mekim, em i tok: “Yu gat olgeta strong na pawa. Yu gat biknem, na yu stap antap tru. Yu nambawan olgeta. Long wanem, olgeta samting i stap long heven na graun i bilong yu tasol. Na yu stap bikpela king bilong olgeta samting. . . . ‘God bilong mipela, nau mipela i tenkyu long yu, na litimapim biknem bilong yu.’ ”—1 Sto. 29:11-13.
7 Jisas i tok tenkyu long God long kaikai, na long bret na wain long taim bilong Kaikai Bilong Bikpela. (Mt. 15:36; Mk. 14:22, 23) Yumi mas tok tenkyu long kaikai, na tu, tok “tenkyu tru long Bikpela” long “em i bin mekim gutpela wok tru bilong helpim ol [man],” na long “ol stretpela tok [em i] mekim long kot,” na long ol tok bilong em i stap long Baibel.—Sng. 107:15; 119:62, 105.
Beten Askim God Long Helpim Ol Arapela
8, 9. Bilong wanem yumi mas beten askim God long helpim ol bratasista Kristen bilong yumi?
8 Tru, yumi save beten askim God long helpim yumi yet, tasol yumi mas askim God long helpim ol arapela tu—na tu ol Kristen yumi no save long nem bilong ol. Maski aposel Pol i no save long olgeta bilipman long Kolosi, em i tok: “Taim [mipela] i mekim prea, oltaim [mipela] i save tingting long yupela na tenkyu long God.” (Kl. 1:3, 4) Pol i beten askim God long helpim ol Kristen i stap long Tesalonaika tu. (2 Te. 1:11, 12) Kain beten olsem i save kamapim klia yumi wanem kain man na yumi gat wanem tingting long ol bratasista Kristen.
9 Taim yumi beten askim God long helpim ol Kristen em i bin makim na “ol arapela sipsip,” dispela i kamapim klia yumi tingim tru oganaisesen bilong God. (Jo. 10:16) Pol i askim ol wanlotu bilong em long beten askim God long ‘putim tok long maus bilong em, na bai em i ken autim tru tok hait bilong gutnius.’ (Ef. 6:17-20) Olsem wanem? Yumi yet i save beten askim God long helpim ol narapela Kristen?
10. Pasin bilong beten askim God long helpim ol narapela, dispela inap mekim wanem long yumi?
10 Taim yumi beten long helpim ol narapela, dispela inap senisim tingting yumi gat long ol. Sapos yumi beten long helpim narapela em yumi no laikim, ating tingting yumi gat long em bai senis. (1 Jo. 4:20, 21) Ol kain beten olsem i gutpela na i kamapim pasin wanbel namel long yumi na ol brata. Na tu, ol kain beten olsem i kamapim klia yumi bihainim pasin laikim bilong Krais. (Jo. 13:34, 35) Pasin laikim em wanpela pasin holi spirit i kamapim. Olsem wanem? Yumi yet i save beten long kisim holi spirit na askim Jehova long helpim yumi long kamapim ol pasin holi spirit i kamapim—pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel? (Lu. 11:13; Ga. 5:22, 23) Sapos olsem, orait ol tok na pasin yumi mekim bai soim olsem yumi larim holi spirit i stiaim wokabaut bilong yumi.—Ritim Galesia 5:16, 25.
11. Bilong wanem i stret long yumi askim ol arapela long beten long God i helpim yumi?
11 Sapos yumi kisim save olsem ol pikinini bilong yumi long skul i lukstil long pepa bilong narapela long taim bilong tes, yumi mas beten long God i helpim ol, na kamapim sampela tok bilong Baibel bilong helpim ol long bihainim stretpela pasin na abrusim pasin i no stret. Pol i tokim ol Kristen long Korin: “Mipela i save prea long God, bai em i helpim yupela, na yupela i no mekim wanpela pasin nogut.” (2 Ko. 13:7) Kain beten olsem i save mekim Jehova i amamas na i kamapim olsem yumi wanem kain man. (Ritim Sindaun 15:8.) Yumi ken askim ol arapela long beten long God i helpim yumi, olsem aposel Pol i bin mekim. Em i tok: “Yupela i mas prea long God na askim em long helpim mipela. Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.”—Hi. 13:18.
Sampela Samting Moa Ol Beten Bilong Yumi i Kamapim
12. Wanem ol samting i mas i stap nambawan samting long ol beten bilong yumi?
12 Olsem wanem? Ol beten bilong yumi i kamapim olsem yumi strongpela Witnes Bilong Jehova? Ol beten i kamapim olsem yumi tingting long pasin bilong bihainim laik bilong God, autim tok bilong Kingdom, rait bilong Jehova long mekim wok bos, na nem bilong em i mas i stap holi? Ol dispela samting i mas i stap olsem nambawan samting yumi beten long en, olsem beten bilong Jisas i kamapim: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Mt. 6:9, 10.
13, 14. Ol beten bilong yumi i kamapim wanem samting bilong yumi?
13 Ol beten yumi mekim long God ol i kamapim klia ol tingting na laik bilong yumi. Jehova i save yumi wanem kain man. Sindaun 17:3 i tok: “Bikpela i laik painimaut olsem, yumi gutpela man o man nogut, na em i traim bel bilong yumi olsem paia i kukim gol na silva bilong traim na painimaut em i samting tru o nogat.” God i save lukim bel bilong yumi. (1 Sml. 16:7) Em i save yumi gat wanem tingting long ol miting, wok autim tok, na ol bratasista. Jehova i save yumi gat wanem tingting long ‘ol brata’ bilong Krais. (Mt. 25:40) Em i save yumi gat laik tru long samting yumi askim long en o yumi kolim nating tasol. Jisas i tok: “Maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”—Mt. 6:7.
14 Na tu, ol samting yumi beten long en i kamapim klia yumi bilip na wetim God i helpim yumi o nogat. Devit i tok: “Yu [Jehova] tasol yu save lukautim mi gut. Yu tasol i strongpela banis bilong mi, olsem na ol birua i no inap daunim mi. Mi laikim tumas bai mi stap long haus bilong yu inap long taim mi dai. Na mi laik i stap gut klostu long yu, olsem pikinini kakaruk i save stap gut aninit long wing bilong mama kakaruk.” (Sng. 61:3, 4) Taim God i ‘karamapim yumi long haus sel bilong en,’ dispela i mekim na yumi stap gut. (KTH 7:15, NW) Yumi amamas olsem long rot bilong beten yumi inap go klostu long Jehova na bilip tru olsem em ‘i stap wantaim yumi’ long taim samting i kamap bilong traim bilip bilong yumi.—Ritim Song 118:5-9.
15, 16. Beten inap helpim yumi long luksave long wanem samting bilong laik bilong yumi long kisim wok insait long kongrigesen?
15 Taim yumi beten long Jehova long samting yumi laik mekim, dispela inap helpim yumi long luksave long as tru na yumi laik mekim. Olsem: Sapos yumi gat laik long holim bikpela wok namel long ol manmeri bilong God, wanem astingting bilong yumi? Yumi gat laik tru long helpim kongrigesen na helpim wok bilong Kingdom, o yumi gat laik long i “stap namba wan” bilong ol na “bosim” ol? Kain pasin olsem i no ken i stap namel long lain bilong Jehova. (Ritim 3 Jon 9, 10; Luk 22:24-27.) Sapos yumi gat sampela laik i no stret, pasin bilong beten long God Jehova inap helpim yumi long luksave long ol dispela laik nogut na helpim yumi long senis, nogut ol dispela laik i kamap strong long yumi.
16 Ating ol meri marit Kristen i gat bikpela laik long man bilong ol i kamap kongrigesen sevan o elda. Ating ol dispela sista i mekim ol samting i stret wantaim ol beten bilong ol—ol i wok strong long i stap gutpela piksa long wokabaut bilong ol. Dispela em i bikpela samting, long wanem, ol tok na ol pasin em famili bilong brata i mekim, dispela inap stiaim kongrigesen long tingting ol i gat long dispela brata.
Taim Yumi Beten Long Ai Bilong Ol Man
17. Taim yumi mekim beten bilong yumi yet, bilong wanem i gutpela long yumi stap wanpis?
17 Sampela taim Jisas i lusim bikpela lain manmeri bambai em inap stap wanpis na beten long Papa bilong em. (Mt. 14:13; Lu. 5:16; 6:12) Yumi tu i mas i gat haptaim we yumi ken i stap wanpis. Taim yumi stap long ples i no gat nois na yumi beten, ating bai yumi mekim ol disisen em Jehova i laikim na i helpim yumi long stap strong long pasin bilong yumi long lotuim em. Tasol Jisas i beten tu long ai bilong ol man, na i gutpela long tingim olsem wanem yumi ken mekim kain samting olsem long stretpela pasin.
18. Wanem sampela samting ol brata i mas tingim taim ol i makim maus bilong kongrigesen na mekim beten?
18 Long ol miting bilong yumi, ol brata i makim maus bilong kongrigesen na mekim beten. (1 Ti. 2:8) Long pinis bilong kain beten olsem, ol wanbilip i tok “amen,” olsem “mi wanbel long dispela tok.” Tasol bilong ol inap mekim olsem, ol i mas wanbel long ol tok bilong dispela beten. Taim Jisas i mekim dispela beten “Papa bilong mipela,” em i no kolim ol tok em ol narapela inap kirap nogut o tingting planti long en, nogat. (Lu. 11:2-4) Na tu, em i no kolim olgeta nid o hevi bilong olgeta wan wan i harim beten bilong em. Ol samting bilong ol man wan wan, yumi ken kolim long taim yumi mekim beten bilong yumi yet na i no long taim yumi mekim beten long ai bilong ol man. Na taim yumi stap olsem maus bilong ol arapela na mekim beten, yumi no ken kamapim ol samting i stap hait em i no gat wok long ol arapela i save long en.
19. Yumi mas bihainim wanem kain pasin long taim bilong mekim beten long ol miting?
19 Taim narapela i makim maus bilong yumi na mekim beten, pasin bilong yumi i mas soim olsem yumi “pret long God na aninit long em.” (1 Pi. 2:17) I gat taim na ples bilong mekim sampela samting em long taim bilong ol miting Kristen i no stret long mekim ol dispela samting. (Sav. 3:1) Olsem: Ating sampela i laik bai olgeta long grup i holim han long taim bilong beten. Tasol dispela inap pulim ai bilong sampela, na bilong ol visita tu i no wanbilip, o mekim ol i tingting planti. Long taim bilong beten, ating sampela marit bai holim han bilong poroman marit bilong ol na mekim long pasin i no pulim ai bilong ol arapela, tasol sapos ol i holimpas poroman marit bilong ol, kain pasin olsem inap pundaunim sampela. Ol inap kisim tingting olsem tupela i tingim moa pasin laikim i stap namel long tupela na tupela i no tingim tumas Jehova. Yumi rispek long Jehova, olsem na yumi mas mekim “olgeta samting bilong givim biknem long God” na sakim pasin em inap pulim ai bilong ol narapela, mekim ol i kirap nogut tru, o pundaunim ol.—1 Ko. 10:31, 32; 2 Ko. 6:3.
Beten Long Wanem Samting?
20. Wanem mining bilong Rom 8:26, 27?
20 Sampela taim, yumi no save yumi bai tok wanem long ol beten bilong yumi yet. Pol i tok: “Yumi no save yumi mas prea long wanem samting. Yumi save krai long bel tasol, na yumi no inap long tokaut. Na long dispela pasin Holi Spirit yet i save prea bilong helpim yumi. Na God i save lukim tru bel bilong man, em i save long dispela tingting bilong Holi Spirit.” (Ro. 8:26, 27) I gat planti beten i stap long Baibel. Jehova i larim ol dispela beten i kamap olsem prea bilong yumi yet na em i harim. God i save gut tru long yumi na long mining bilong ol tok em holi spirit i bin kirapim ol man long raitim long Baibel. Taim holi spirit i “prea bilong helpim” yumi, Jehova i save harim. Tasol taim yumi wok long save gut moa long Tok Bilong God, ating samting yumi mas beten long en bai kamap kwik moa long tingting bilong yumi.
21. Bai yumi skelim wanem samting long stadi i kamap bihain long dispela?
21 Olsem yumi stori pinis, ol beten bilong yumi i kamapim olsem yumi wanem kain man. Olsem: Ol inap kamapim olsem yumi stap klostu long Jehova na save gut long Tok bilong em o nogat. (Jem. 4:8) Long stadi i kamap bihain long dispela, bai yumi skelim sampela beten i stap long Baibel. Taim yumi skelim ol dispela beten, dispela bai mekim wanem long pasin bilong yumi long beten long God?
Bai Yu Bekim Olsem Wanem?
• Taim yumi beten long Jehova, yumi mas mekim long wanem kain pasin?
• Bilong wanem yumi mas beten askim God long helpim ol wanbilip?
• Ol beten bilong yumi inap kamapim wanem ol samting bilong yumi?
• Yumi mas bihainim wanem kain pasin long taim bilong beten long ol miting?
[Piksa long pes 4]
Yu save litimapim nem bilong Jehova na tok tenkyu long em?
[Piksa long pes 6]
Long taim bilong beten long ol miting, pasin yumi bihainim i mas givim biknem long Jehova