Apim Han Bilong Yu Long Mekim Beten
“Mi laik bai ol man bilong olgeta ples i mas apim han bilong ol na mekim prea . . . na lusim pasin bilong belhat na kros.”—1 TIMOTI 2:8.
1, 2. (a) Olsem wanem tok bilong 1 Timoti 2:8 i makim ol beten em lain bilong Jehova i save mekim? (b) Nau bai yumi skelim wanem samting?
JEHOVA i laik bai lain bilong em i mas stap gut long em, na narapela i mas stap gut long narapela. Aposel Pol i bungim pasin bilong i stap gut long Jehova wantaim beten taim em i tok: “Mi laik bai ol man bilong olgeta ples i mas apim han bilong ol na mekim prea. Mi laik bai ol i ken givim laip bilong ol long God na i stap holi, na lusim pasin bilong belhat na kros, na long dispela pasin ol i ken mekim prea.” (1 Timoti 2:8) Ating Pol i bin toktok long ol beten ol man i save mekim long ai bilong ol man long “olgeta ples” ol Kristen i save bung long en. Orait, taim kongrigesen i bung bilong mekim miting, husat i mas mekim beten? Em ol man i holi, na mekim stretpela pasin, na man bilong lotu, na man i save mekim olgeta wok bilong God em Baibel i makim. (Saveman 12:13, 14) Ol i mas i stap klin long ol samting bilong spirit na long pasin bilong ol, na ol i mas givim bel tru long God Jehova.
2 Ol elda i mas mekim moa yet dispela pasin bilong ‘apim han bilong ol na mekim prea.’ Taim ol i givim bel long beten long rot bilong Krais Jisas ol i kamapim olsem ol i stap gut long God na dispela i helpim ol long abrusim pasin bilong tok pait na kros. Olgeta man i mekim beten long ai bilong ol man long kongrigesen Kristen, ol i mas abrusim pasin bilong belhat na kros na bel nogut, na ol i mas stap gut long Jehova na oganaisesen bilong em. (Jems 1:19, 20) I gat wanem tok moa bilong Baibel long stiaim ol man i mekim beten long ai bilong ol manmeri? Na i gat wanem ol lo bilong Baibel yumi mas bihainim long ol beten bilong yumi yet na bilong famili bilong yumi?
Tingim Gut Pastaim Ol Samting Yu Laik Beten Long En
3, 4. (a) Taim yumi beten long ai bilong ol man, bilong wanem i gutpela yumi tingim gut pastaim ol samting yumi laik beten long en? (b) Baibel i givim wanem tingting long yumi long pasin bilong mekim longpela o sotpela beten?
3 Sapos ol i bin askim yumi long beten long ai bilong ol man, ating yumi gat liklik hap taim bilong tingim ol samting yumi laik beten long en. Sapos yumi mekim olsem, dispela bai helpim yumi long beten long ol bikpela samting i stret long ol manmeri, na yumi no mekim longpela beten tumas na mekim planti toktok. Na taim yumi mekim ol beten bilong yumi yet, yumi ken kolim long strongpela nek tu. Ating sampela taim ol i longpela beten na sampela taim ol i sotpela beten. Taim Jisas i laik makim ol 12-pela aposel bilong em, em i bin beten long nait olgeta. Tasol taim em i kamapim Memorial bilong tingim i dai bilong em, em i mekim sotpela beten long bret na wain. (Mak 14:22-24; Luk 6:12-16) Na yumi save God i bin amamas long ol sotpela beten tu bilong Jisas.
4 Olsem wanem sapos yumi mekim beten bilong famili paslain long kaikai? Ating kain beten olsem bai sotpela liklik—tasol maski yumi mekim wanem tok, yumi mas kamapim sampela tok bilong tenkyu long kaikai. Taim yumi mekim beten paslain o bihain long wanpela miting Kristen, yumi no ken mekim longpela beten i kamapim planti samting. Jisas i bin sutim tok long ol saveman bilong lo, long wanem, “ol i save giaman long mekim ol longpela prea.” (Luk 20:46, 47) Man i save daun long God em i no laik mekim olsem. Tasol ating sampela taim i stret sapos man i mekim longpela beten liklik long ai bilong ol man. Olsem: Elda ol i bin makim bilong mekim laspela beten long wanpela kibung, pastaim em i ken tingim ol samting em i laik beten long en pastaim na ating em i laik kamapim sampela tok i kamap long kibung. Tasol kain beten olsem tu i no ken longpela tumas.
Beten Long God Long Pasin Daun
5. (a) Taim yumi beten long ai bilong ol man yumi mas tingim wanem samting? (b) Bilong wanem yumi mas mekim beten long pasin daun na olsem yumi givim biknem long God?
5 Taim yumi beten long ai bilong ol man yumi no ken ting yumi toktok long wanpela man bilong graun. Yumi mas ting olsem yumi man i gat sin i beten long Bikpela King Jehova. (Song 8:3-5, 9; 73:28) Olsem na yumi mas pret long mekim sampela tok em i no orait long en, o long pasin bilong yumi long mekim dispela tok. (Sindaun 1:7) Devit, em man bilong raitim Song, em i tok: “Yu save laikim mi tru. Olsem na mi inap i go long haus bilong yu. Long gutpela haus bilong yu bai mi brukim skru na lotu long yu.” (Song 5:7) Sapos yumi gat kain tingting olsem, bai yumi mekim wanem tok taim ol i askim yumi long beten long ai bilong ol man long ol miting bilong ol Witnes Bilong Jehova? Sapos yumi toktok long wanpela king bilong graun, bai yumi toktok long em long pasin daun na olsem yumi givim biknem long em. Orait, taim yumi beten long Jehova, em “King bilong olgeta lain manmeri,” yumi mas toktok moa yet long em long pasin daun na givim biknem long em, a? (KTH 15:3) Olsem na taim yumi beten yumi no ken tok olsem, “Moning, Jehova,” o “Mipela i salim pasin sori i go long yu,” o “Gutbai.” Baibel i soim yumi olsem dispela wanpela Pikinini bilong God, em Krais Jisas, em i no bin mekim kain tok olsem long Papa bilong em long heven.
6 Pol i tok: “Yumi ken i go klostu long God, na yumi no ken pret. Em i man bilong marimari.” (Hibru 4:16) Yumi ken go klostu long Jehova na “yumi no ken pret” maski yumi sinman, long wanem, yumi bilip long ofa bilong Krais Jisas long baim bek ol man. (Aposel 10:42, 43; 20:20, 21) Tru yumi ken toktok long Jehova na “yumi no ken pret,” tasol dispela i no makim olsem yumi ken mekim sampela tok nating long God; na yumi no ken mekim sampela tok long em i makim olsem yumi no daun long em. Sapos yumi laik bai Jehova i orait long ol beten yumi save mekim long ai bilong ol man, yumi mas beten olsem yumi daun long em na yumi givim biknem long em; taim yumi beten long ai bilong ol man, i no stret long kamapim sampela toksave, o stretim wanpela man, o mekim sampela tok bilong stretim ol man i bung.
Beten Long Pasin Daun
7. Olsem wanem Solomon i kamapim pasin daun taim em i beten bilong dediketim tempel bilong Jehova?
7 Maski yumi beten long ai bilong ol man o yumi mekim beten bilong yumi yet, yumi mas bihainim wanpela bikpela lo bilong Baibel olsem: Yumi mas mekim pasin daun taim yumi beten. (2 Stori 7:13, 14) Taim King Solomon i mekim beten bilong dediketim tempel bilong Jehova long Jerusalem em i mekim long pasin daun. Nau tasol Solomon i wokim pinis wanpela gutpela haus tru i winim olgeta narapela haus ol man i bin wokim, tasol long pasin daun em i beten: “God, ating em i tru yu laik kam i stap long graun, a? Heven i bikpela ples tru, tasol em i no bikpela ples inap long yu stap long en. Na olsem wanem bai dispela haus mi wokim bilong yu bai inap long yu?”—1 King 8:27.
8. Taim yumi beten long ai bilong ol man, wanem sampela rot bilong kamapim olsem yumi beten long pasin daun?
8 Olsem Solomon, yumi mas mekim pasin daun taim yumi beten long ai bilong ol man. Nek bilong yumi inap kamapim olsem yumi beten long pasin daun, tasol yumi no ken mekim olsem yumi stretpela man tru. Taim yumi mekim beten long pasin daun yumi no save bikmaus nabaut o bilasim nogut tru tok bilong yumi na mekim long narapela kain nek na tromoi han nabaut. Ol beten yumi mekim long pasin daun bai kirapim ol man long tingim Man ol i beten long em, na ol i no tingim man i mekim beten. (Matyu 6:5) Na tu, ol tok yumi mekim long beten i mas kamapim olsem yumi mekim beten long pasin daun. Sapos yumi beten long pasin daun, bai yumi no mekim olsem yumi strong long God i mas bihainim laik bilong yumi long mekim sampela samting. Tasol bai yumi askim Jehova long mekim ol samting i stret wantaim laik holi bilong em. Man bilong raitim Song i kamapim stretpela tingting taim em i tok: “Bikpela, mipela i askim yu long kisim bek mipela. Yu helpim mipela na olgeta samting mipela i mekim bai i kamap gutpela.”—Song 118:25; Luk 18:9-14.
Beten i Mas Kamap Long Bel Bilong Yumi
9. Long Matyu 6:7 Jisas i kamapim wanem gutpela tok? Olsem wanem yumi ken bihainim dispela tok?
9 Sapos yumi laik bai Jehova i amamas long ol beten yumi save mekim long ai bilong ol man o ol beten bilong yumi yet, ol beten i mas kamap long bel bilong yumi. Olsem na yumi no ken kolim nating wanpela beten planti taim na yumi no tingim ol tok yumi kolim. Long tok bilong em antap long maunten, Jisas i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.” (Matyu 6:7) I olsem Jisas i tok: “Yupela no ken mekim planti tok nating; no ken kolim nating ol tok planti taim.”—Matyu 6:7, NW; long sta daunbilo.
10 Tru, sampela taim yumi mas beten long wankain samting planti taim. Dispela i stret, long wanem, Jisas i tok: “Yupela i mas [wok long] prea na askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim. Yupela i mas paitim dua, na God bai i opim long yupela.” (Matyu 7:7) Ating yupela i mas kisim wanpela nupela Haus Kingdom, long wanem, Jehova i mekim wok autim tok bilong ol brata long kongrigesen bilong yupela i kamap gutpela. (Aisaia 60:22) I stret yu wok long askim Jehova long dispela samting taim yu mekim beten bilong yu yet o long ai bilong ol man long ol miting bilong lain bilong Jehova. Sapos yu mekim olsem, dispela i no olsem yu ‘kolim nating ol tok planti taim.’
Tok Tenkyu na Litimapim Nem Bilong Jehova
11. Olsem wanem tok bilong Filipai 4:6, 7 i stret long ol beten bilong yumi yet na ol beten yumi save mekim long ai bilong ol man?
11 Planti man i save beten taim ol i laik askim God long kisim wanpela samting, na ol narapela taim nogat. Tasol pasin bilong yumi long laikim tru God Jehova i mas kirapim yumi long tok tenkyu long Jehova na litimapim nem bilong em taim yumi mekim beten bilong yumi yet na long ai bilong ol man. Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Yes, yumi mas beten askim Jehova long helpim yumi, na yumi mas tenkyu long Jehova long ol gutpela samting em i givim long yumi, em ol samting bilong spirit na bilong skin. (Sindaun 10:22) Man bilong raitim Song i tok: “Mobeta yupela i tenkyu tru long mi. Em kain ofa yupela i mas mekim. Olgeta presen yupela i tok pinis long givim long mi, God Antap Tru, em yupela i mas givim long mi.” (Song 50:14) Na wanpela gutpela song i olsem beten bilong Devit i tok: “Bai mi mekim song na litimapim nem bilong God, na bai mi tenkyu long em na tokaut long biknem bilong em.” (Song 69:30) Gutpela yumi kamapim kain tok olsem long ol beten yumi mekim long ai bilong ol man na ol beten bilong yumi yet, a?
12 Man bilong raitim Song i tok long God olsem: “Yumi mas i go insait long haus bilong en na tenkyu long em na litimapim nem bilong em. Yumi tenkyu long em na givim biknem long em. Bikpela i save mekim gutpela pasin tasol. Oltaim em i save laikim yumi tru. Em i save bihainim tok tru bilong em oltaim oltaim.” (Song 100:4, 5) Long nau, ol manmeri bilong olgeta lain i kam insait long banis bilong haus bilong Jehova, na yumi ken litimapim nem bilong Jehova na tenkyu long em long dispela samting. Olsem wanem? Yu save tenkyu long God long Haus Kingdom bilong yupela na kamapim amamas bilong yu long rot bilong bung oltaim long en wantaim ol man i laikim em tru? Taim yu stap long Haus Kingdom, yu save givim bel long mekim ol singsing bilong tenkyu na litimapim nem bilong Papa bilong yumi i stap long heven?
No Ken Sem Long Mekim Beten
13. Wanem stori bilong Baibel i kamapim olsem yumi mas beten strong long God maski bel bilong yumi i gat tok na yumi pilim olsem yumi nogut tasol?
13 Maski bel bilong yumi i gat tok na yumi pilim olsem yumi nogut tasol, yumi mas beten strong long God. Taim ol Juda i mekim rong na ol i kisim ol meri haiden, Esra i brukim skru na apim han bilong em long God, na long pasin daun em i beten: “God, mi sem nogut tru. Olsem na mi ting mi no inap i kam beten long yu. Mipela i bin mekim planti sin moa. Na sin bilong mipela i olsem wanpela traipela hip pipia i go antap inap long heven. Long taim bilong ol tumbuna i kam inap long nau, mipela ol manmeri bilong yu wantaim ol king na pris bilong mipela i bin mekim pasin nogut moa yet. . . . Mipela i sakim tok bilong yu na mekim planti bikpela sin na rong. Olsem na yu bin mekim save long mipela. Mipela i bin mekim planti pasin nogut, olsem na yu inap long bagarapim mipela olgeta. Tasol nogat, yu marimari long mipela na yu larim liklik lain i stap yet. Olsem na nogut mipela i sakim tok bilong yu gen na mipela i maritim ol dispela man na meri i save mekim kain kain pasin nogut tru. Mipela i save pinis, sapos mipela i maritim ol bai yu belhat nogut tru na bai yu bagarapim mipela na pinisim mipela olgeta, na i no gat wanpela bilong mipela bai i stap. God, Bikpela bilong mipela Israel, yu save mekim stretpela pasin tasol. Olsem na yu bin mekim save long mipela, na mipela liklik lain tasol i stap. Mipela i no gutpela manmeri bai mipela inap i go klostu long yu. Nogat. Mipela i manmeri bilong sin tasol.”—Esra 9:1-15; Lo 7:3, 4.
14. Olsem ol man long taim bilong Esra i bin mekim, yumi mas mekim wanem bambai God i ken lusim rong bilong yumi?
14 Bilong God i ken lusim rong bilong yumi, yumi mas autim rong bilong yumi long em na tanim bel na mekim ol wok i “soim olsem [yumi] tanim bel pinis.” (Luk 3:8; Jop 42:1-6; Aisaia 66:2) Long taim bilong Esra, ol man i pilim tru rong bilong ol na ol i kamapim dispela taim ol i stretim rong bilong ol na rausim ol meri haiden. (Esra 10:44; skelim wantaim 2 Korin 7:8-13.) Taim yumi askim God long lusim wanpela bikpela rong bilong yumi, yumi mas beten long pasin daun na autim rong long em na mekim ol wok i soim olsem yumi tanim bel pinis. Na tu, taim yumi mekim pasin i makim olsem yumi tanim bel pinis na yumi laik stretim rong yumi bin mekim, dispela bai kirapim yumi long askim ol elda Kristen long helpim yumi long ol samting bilong spirit.—Jems 5:13-15.
Mekim Gut Bel Bilong Yu Long Rot Bilong Beten
15. Ol samting i painim Hana, olsem wanem dispela i kamapim olsem beten inap mekim gut bel bilong yumi?
15 Sapos yumi bel hevi long wanpela samting, beten inap mekim gut bel bilong yumi. (Song 51:17; Sindaun 15:13) Beten i bin mekim gut bel bilong gutpela meri Hana. Em i stap long taim ol Israel i gat ol bikpela famili, tasol em i no karim yet wanpela pikinini. Man bilong em, Elkana, em i gat sampela pikinini man na pikinini meri long namba tu meri bilong em, Penina, na Penina i bin tok bilas long Hana, long wanem, em i no karim wanpela pikinini. Hana i beten strong long Jehova na em i tok promis olsem: “Sapos yu givim mi wanpela pikinini man, orait bai mi givim em long yu na bai em i ken i stap wokman bilong yu inap em i dai.” Beten bilong em na ol tok bilong Hetpris Eli i mekim gut bel bilong Hana, na em “i no moa bel hevi.” Em i karim wanpela pikinini man na givim nem Samuel long en. Bihain, em i givim Samuel bilong mekim wok long haus bilong Jehova. (1 Samuel 1:9-28) Em i amamas tru long gutpela pasin sori God i mekim long em, na em i mekim wanpela beten bilong tok tenkyu—em wanpela beten i litimapim tru nem bilong Jehova na i kamapim olsem i no gat narapela God olsem em. (1 Samuel 2:1-10) Olsem Hana, yumi ken beten long Jehova na dispela bai mekim gut bel bilong yumi, na yumi ken bilip tru olsem God bai harim olgeta beten i stret wantaim laik bilong em. Taim yumi autim olgeta hevi bilong yumi long Jehova, yumi no ken ‘bel hevi moa,’ long wanem, em bai rausim hevi bilong yumi o em bai givim strong long yumi long karim dispela hevi.—Song 55:22.
16. Olsem stori bilong Jekop i kamapim, bilong wanem yumi mas beten taim yumi pret o tingting planti?
16 Sapos wanpela samting i mekim na yumi pret, o bel hevi, o tingting planti, yumi mas i go long God bambai em i ken mekim gut bel bilong yumi. (Song 55:1-4) Jekop i bin pret taim em i mas bungim brata bilong em Iso. Tasol Jekop i beten olsem: “God bilong Abraham, tumbuna bilong mi, yu God bilong Aisak, papa bilong mi, harim beten bilong mi. Bikpela, yu bin tokim mi olsem, mi mas i go bek long as ples bilong mi, na bai yu mekim gut long mi. God, mi wokboi bilong yu. Mi no gutpela man, tasol yu bin marimari long mi na yu bin mekim gut tru long mi. Taim mi brukim wara Jordan na mi go bilong i stap wantaim Laban, mi no gat wanpela samting. Nogat. Mi holim tasol stik bilong wokabaut. Tasol nau mi kam bek wantaim dispela tupela lain. Mi prea long yu, bai yu ken sambai long mi, na bai brata bilong mi, Iso, i no ken i kam pait long mi. Mi pret, nogut em i kam pait long mipela na pinisim mipela olgeta, na ol meri na pikinini wantaim. Bipo yu bin tok olsem, bai yu was gut long mi na bai yu givim planti lain tumbuna pikinini long mi. Na bai ol i kamap bikpela lain tru olsem wesan bilong nambis, na i no gat man inap long kaunim.” (Stat 32:9-12) Iso i no bin pait long Jekop na lain bilong em. Em nau, long dispela taim Jehova i bin “was gut” long Jekop.
17. Sapos yumi mekim olsem Song 119:52 i tok, olsem wanem beten inap strongim bel bilong yumi taim wanpela bikpela traim i painim yumi?
17 Taim yumi beten, yumi ken tingim sampela tok bilong Baibel, na dispela inap mekim gut bel bilong yumi. Long nambawan longpela Song—em wanpela gutpela beten ol i mekim olsem singsing—ating Hesekia yet i singsing olsem: “Bikpela, mi save ting long tok bipo yu bin givim mi, na dispela tok i givim strong long mi.” (Song 119:52) Taim wanpela bikpela traim i painim yumi na yumi beten long God long pasin daun, ating yumi inap tingim wanpela lo bilong Baibel i ken helpim yumi long bihainim rot i save amamasim Papa bilong yumi long heven, na dispela inap mekim gut bel bilong yumi.
Beten Long Olgeta Taim
18. Bilong wanem yumi ken tok ‘olgeta manmeri i save bihainim God, ol i mas beten long em’?
18 Olgeta man i stap gut long God Jehova bai “beten long olgeta taim.” (Rom 12:12) Long Song 32, ating Devit i bin raitim bihain long taim em i mekim rong wantaim Batseba, em i stori long bikpela hevi em i bin kisim, long wanem, em i no bin askim Jehova long lusim rong bilong em, na em i stori long olsem wanem pasin bilong tanim bel na autim rong bilong em long God i bin mekim gut bel bilong em. Devit i tok: “Olsem na olgeta manmeri i save bihainim yu [long wanem Jehova i save lusim rong bilong olgeta man i tanim bel tru], ol i mas beten long yu taim hevi i kamap. Na sapos hevi i kamap bikpela tumas, . . . bai hevi i no inap daunim ol.”—Song 32:6.
19. Bilong wanem yumi mas apim han bilong yumi long mekim beten?
19 Sapos yumi amamas long pas gut wantaim God Jehova, bai yumi askim em long marimari long yumi long rot bilong ofa bilong Jisas long baim bek ol man. Yumi mas bilip na go klostu long God, na yumi no ken pret. Em i man bilong marimari, na em bai helpim yumi long taim stret. (Hibru 4:16) Tasol i gat planti as na yumi ken beten long God! Olsem na gutpela yumi “beten oltaim”—planti taim yumi ken litimapim nem bilong God na tenkyu long em. (1 Tesalonaika 5:17) Long san na long nait, yumi mas apim han bilong yumi long beten.
Bai Yu Bekim Olsem Wanem?
◻ Bilong wanem i gutpela yu tingim gut pastaim ol samting yu laik beten long en long ai bilong ol man?
◻ Bilong wanem yumi mas mekim beten long pasin daun na olsem yumi givim biknem long God?
◻ Yumi mas mekim wanem pasin taim yumi beten?
◻ Taim yumi beten, bilong wanem yumi mas tok tenkyu long God na litimapim nem bilong em?
◻ Olsem wanem Baibel i kamapim olsem beten inap mekim gut bel bilong yumi?
6. Yumi mas tingim wanem samting taim ‘yumi go klostu long God’?
10. Bilong wanem i stret yumi beten planti taim long wankain samting?
12. Olsem wanem tok bilong Song 100:4, 5 i wok long kamap tru long nau? Olsem na yumi ken tenkyu na litimapim nem bilong God long wanem samting?
[Piksa long pes 17]
King Solomon i mekim pasin daun taim em i beten long ai bilong ol man bilong dediketim tempel bilong Jehova
[Ol Piksa long pes 18]
Olsem Hana, beten inap mekim gut bel bilong yu