Ol Nupela Program Bilong Kibung
1 As tok bilong nupela program bilong kibung sekit i kirap long Februeri, em “Kisim Dispela Bikpela Amamas Bilong Givim Samting.” (Ap 20:35) Klostu olgeta manmeri long nau ol i wok long kisim kain kain amamas, na taim ol i kisim, planti taim em bilong sotpela taim tasol. Dispela i no amamas tru. Tasol Jehova i save skulim yumi long pasin bilong helpim yumi yet long i stap gut oltaim oltaim. (Ais 48:17; 1 Jo 2:17) Program bai kamapim klia olsem wanem pasin bilong givim ol samting bilong spirit long ol narapela i save kamapim bikpela amamas. Bai yumi lain long olsem wanem yumi ken givim yumi yet long mekim wok autim tok.
2 As tok bilong nupela program bilong bikpela de kibung i kirap long Februeri, em “Stap Olsem Man Jehova i Skulim.” (Jo 6:45) Skul yumi kisim long Jehova i save helpim yumi long sindaun gut na i stap amamas. Na i helpim yumi long pilim tru ol gutpela samting yumi kisim olsem lain bilong em. Program bai stori long olsem wanem save ol man i kisim long skul bilong Jehova inap helpim ol, tasol save ol i kisim long skul bilong dispela graun inap nogutim ol. Bai yumi save gut olsem wanem dispela save yumi kisim long Jehova em i nambawan tru—as bilong dispela save, em Baibel. Program bai kamapim klia olsem i gat tripela samting bilong lotu em God i skulim yumi long en na i givim amamas long yumi. Na tu, program bai kirapim ol yangpela long bihainim gutpela pasin bilong ol man kain olsem Devit na Timoti, na long mekim ol samting bilong spirit i kamap namba wan samting long i stap bilong ol. Na program bai stori long pasin bilong ol lapun long i stap gut long Jehova, na dispela bai strongim bilip bilong yumi.
3 Nem bilong pablik-tok bilong kibung sekit, em “Bung Wantaim Lain Bilong God Ol i Stap Amamas.” Ol gavman bilong dispela graun em Satan i bosim, ol i no bin helpim ol man long nau long i stap gutpela na i stap amamas oltaim. (Sav 8:9) Tasol ol dispela man inap kisim bikpela amamas taim ol i bung wantaim lain bilong Jehova em ol i stap amamas! (Sng 144:15b) Nem bilong bikpela tok bilong bikpela de kibung, em “Jehova i Skulim Yumi Long Mekim Laik Bilong Em.” Dispela tok bai stori gut long sampela as na yumi olgeta i mas wok yet long kisim save, na stap strong long bilip, na wok long kamap strong moa. Tok i laik kirapim yumi long bihainim pasin bilong Jehova na skulim ol narapela long tok i tru i bringim man long laip oltaim. Bai i gat sampela gutpela ekspiriens bilong soim olsem wanem Jehova i bin skulim ol man long rot bilong ol buk na nius samting bilong Sosaiti.
4 Ol man i laik kisim baptais long kibung sekit o long bikpela de kibung, ol i mas toktok wantaim wasman siaman na bai em i ken stretim rot bilong ol elda i ken stori wantaim ol long ol askim bilong baptais. Taim man i baptais nupela em i stap stret long ai bilong Jehova na mekim wok bilong Em, em i save kisim bikpela amamas.
5 Stretim gut rot bilong yu ken i go long kibung sekit na bikpela de kibung. Kirapim olgeta man i laik harim tok long go long kibung. Ol man em ol i kisim bikpela amamas long givim ol samting bilong spirit long ol narapela, na ol i larim Bikpela Tisa, em God bilong amamas, i skulim yet ol, ol i no ken bel hevi.—Ais 30:20; 1 Ti 1:11.
This article is unique to PNG.