Askim

◼ Yumi mas mekim wanem taim bagarap i kamap na i painim ol brata sista bilong yumi?

Sapos Bagarap i Kamap Long Hap Bilong Yupela: No ken paul nabaut. Stap isi, na tingim laip​—⁠em bikpela samting, i no ol samting bilong yupela. Tingim famili bilong yu long ol samting bilong skin ol i mas kisim long dispela taim stret. Nau toksave long ol elda (bilong kongrigesen bilong yu o bilong ol kongrigesen i stap klostu) long ol samting i bin painim yupela na ples yupela i stap long en long dispela taim. Sapos yupela i no inap painim hariap wanpela elda o wasman sekit bilong toksave long em, orait toksave long brens-ofis.

Ol elda na wokman i save mekim bikpela wok bilong helpim ol brata sista long taim bilong bagarap. Sapos i gat toksave olsem bagarap bai kamap, olsem bilong bikpela ren na win samting, ol dispela brata i mas helpim ol brata long painim wanpela gutpela ples hait ol i ken i stap long en, na sapos i gat taim, ol i mas painim kaikai na ol narapela samting ol brata sista i mas kisim.

Bihain, ol wasman bilong Buk-Stadi i ken lukim olgeta wan wan famili na askim ol, ol i stap orait o nogat. Toksave long wasman siaman o narapela elda (o brata i lukautim grup o kongrigesen) long i stap bilong olgeta wan wan famili, na sapos ol i stap orait toksave tu. Sapos wanpela i kisim bagarap, ol dispela brata i ken stretim rot bilong kisim em i go long haus sik samting. Ol bai lukautim ol tu long ol samting bilong skin olsem kaikai, klos, haus, na sampela narapela samting ol i mas kisim. (Jo 13:35; Ga 6:​10) Ol elda bai strongim kongrigesen long ol samting bilong spirit na bilong bel na ol bai stretim ol samting hariap na bai ol i ken kirap mekim gen ol miting bilong kongrigesen. Taim ol i skelim olgeta samting pinis, lain elda i ken makim wanpela elda bilong toksave long wasman sekit sapos sampela brata i kisim bagarap, o ating Haus Kingdom i bagarap, o haus bilong ol brata i bagarap, na tu long sampela bikpela samting ol brata sista i sot long en. Nau wasman sekit i ken ring na givim ripot bilong ol dispela samting long brens-ofis. Sapos ol brata sista i sot tru, orait brens-ofis bai stretim rot bilong salim ol samting i go bilong helpim ol. Long ol hap i no gat ol elda o wokman, ol elda bilong ol kongrigesen klostu o wasman sekit i ken helpim ol brata sista.

Sapos Bagarap i Kamap Long Narapela Hap: Tingim ol brata na sista insait long beten bilong yupela. (Je 5:​16b) Sapos yupela laik helpim ol long mani samting, yupela i ken salim mani i go long brens-ofis, em ol i gat wanpela akaun bilong helpim dispela wok. Atres em: IBSA, Box 636, Boroko, NCD 111. (Ap 2:​44, 45; 1 Ko 16:​1-3; 2 Ko 9:​5-7; lukim Wastaua, Novemba 1, 1986, p. 28-31.) No ken salim kaikai o ol narapela samting i go long hap bagarap i kamap long en sapos ol brata i lukautim dispela wok i no askim yupela long mekim. Long dispela rot, bai yumi inap mekim gut wok bilong helpim ol brata na tilim stret olgeta samting. (1 Ko 14:40) Plis no ken telefon nating long brens-ofis, long wanem, dispela bai pasim rot bilong ol brata long kisim telefon i kam long ples bagarap i kamap long en.

Taim ol i kisim save pinis long olgeta samting, brens-ofis bai skelim olsem, ol i mas kamapim wanpela komiti bilong helpim ol brata o nogat. Ol bai toksave na bai ol brata i mas save long dispela samting. Olgeta i mas wok gut wantaim ol elda em ol i go pas bambai ol i ken helpim gut ol brata sista long ol samting ol i mas kisim.