‘Jehova i Save Helpim Mi’
1 Taim Jisas i givim wok long ol disaipel em i bin kisim ol long pastaim, em i tokim ol: “Harim. Mi salim yupela i go olsem ol sipsip i go namel long ol weldok.” (Mt 10:16) Olsem wanem? Dispela tok i mekim ol i pret na ol i no autim tok? Nogat. Ol i kisim wankain tingting olsem Pol, bihain em i tokim ol wanbilip bilong em olsem: “Yumi ken strongim bel bilong yumi, na yumi ken tok olsem, ‘Bikpela i save helpim mi na mi no inap pret. Ol man i no inap mekim wanpela samting long mi.’ ” (Hi 13:6) Ol i amamas long God i ting ol inap long kisim sem long nem bilong Jisas, na ol i wok yet long autim gutnius na skulim ol manmeri.—Ap 5:41, 42.
2 Long nau yumi stap long laspela hap taim bilong mekim wok autim tok bilong olgeta hap. Olsem Jisas i bin tok, olgeta lain manmeri i bel nogut tru long yumi. (Mt 24:9) Ol man i birua na tok bilas long wok autim tok bilong yumi, na long sampela hap ol i bin tambuim wok bilong yumi. Sapos yumi sot long bilip, dispela samting inap pretim yumi. Tasol yumi save olsem Jehova em i helpim bilong yumi, na dispela i save strongim yumi long wok yet i go.
3 Man i gat pasin bilong strongim bel em i save sanap strong. Dispela pasin em i narapela kain long pasin bilong pret na surik bek. Long olgeta taim ol disaipel bilong Jisas i mas strongim bel bambai ol i ken sanap strong na karim ol hevi. Sapos yumi no laik bai pasin bilong ol manmeri i birua long God i daunim yumi, em i bikpela samting long yumi mas i gat dispela pasin. Taim yumi tingim gutpela pasin bilong Jisas olsem em i bin winim pasin bilong dispela graun, dispela inap strongim yumi! (Jo 16:33) Na tu, tingim ol aposel, taim ol bikpela hevi i painim ol, ol i sanap strong na ol i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Ap 5:29.
4 Yumi No Surik Bek: Yumi mas wok strong long holimpas stretpela tingting long wok bilong yumi. (Hi 10:39) Long olgeta taim yumi mas tingim olsem Jehova i salim yumi i go autim tok bilong kamapim pasin sori na marimari bilong em long ol manmeri. Em i no save askim ol wokboi bilong em long mekim wanpela wok i no gat gutpela as bilong en. Olgeta wok em i givim long yumi em bai helpim tru ol manmeri i laikim God.—Ro 8:28.
5 Sapos yumi ting ol gutpela samting bai kamap, dispela bai helpim yumi long wok yet long painim ol man i olsem sipsip. Taim ol man i no laik harim tok, yumi ken ting ol i mekim olsem, long wanem, tingting bilong ol i bagarap na ol i no gat gutpela samting ol i wetim. Pasin sori i mas kirapim yumi long tingim tru ol man na isi long ol. Long olgeta taim yumi tilim wanpela nius o buk samting o ating yumi lukim olsem man i amamas long harim tok, yumi mas mekim gobek hariap na kirapim em long harim sampela tok moa. Yumi no ken ting yumi no gat save long kirapim Baibel-stadi o long mekim gut stadi wantaim man, nogat. Long olgeta taim yumi mas beten long Jehova na askim em long helpim na stiaim yumi, na yumi ken bilip strong olsem em bai helpim yumi.
6 Yumi bilip tru olsem Jehova bai mekim ol samting bilong pinisim tru wok bilong em. (Filipai 1:6) Taim yumi bilip strong long em olsem Man bilong helpim yumi, dispela bai strongim yumi na bai yumi no “les long mekim gutpela pasin.”—Ga 6:9.