Bilong Pinisim Wok, Yumi Olgeta i Mas Wok Wantaim
1 Olgeta disaipel bilong Krais Jisas i mas save olsem, wok bilong ol long helpim na mekim wok bilong autim tok bilong Kingdom em i bikpela samting. Jisas i save olsem ol disaipel bilong em i no inap kamapim wankain kaikai bilong Kingdom. (Mt 13:23) Ol painia i mekim bikpela hap bilong wok autim tok, tasol yumi amamas tru long lukim ol narapela i givim bel yet long litimapim nem bilong God na kamapim kaikai inap long skel bilong ol.—Jo 15:8.
2 Taim Yumi Wok Wantaim, Yumi Mekim Bikpela Wok: Jisas i bin tok olsem, ol wok em olgeta disaipel wantaim i mekim, dispela bai kamapim bikpela kaikai moa, winim wok em i bin mekim. (Jo 14:12) Maski sampela samting long sindaun bilong yumi i mekim na yumi no inap mekim bikpela wok tumas o i mekim na yumi inap lusim bikpela hap taim long autim tok bilong Kingdom, yumi olgeta i mas wok wantaim bilong pinisim dispela wok. Dispela samting i stret olsem Pol i bin tok: “Em i save mekim yumi olgeta han lek ai samting bilong bodi yumi mekim gut wok em i makim bilong yumi olgeta wan wan. Na em i save mekim yumi olgeta skru rop bun samting bilong bodi i pas gut wantaim . . . , na long dispela pasin bodi i save kamap bikpela.”—Ef 4:16.
3 Sampela inap pilim olsem ol i no bin mekim bikpela wok. Tasol taim yumi givim bel olgeta long mekim wok bilong Jehova, dispela i bikpela samting long ai bilong em. Olgeta wok bilong God yumi mekim ol i gutpela samting na em i amamas long en.—Skelim wantaim Luk 21:1-4.
4 Mekim Yet Wok: Yumi olgeta i ken givim sampela mani samting bilong helpim wok autim tok long olgeta hap bilong graun, em wanpela gutpela samting yumi inap mekim. Sampela i ken mekim wok olsem sanapim ol Haus Kingdom samting bilong helpim wok bilong Kingdom. Olgeta wan wan i ken wok strong long bekim gut ol tok long miting na mekim tok insait long Skul Bilong Wok Autim Tok. Taim yumi mekim ol tok bilong strongim ol narapela, yumi mekim gutpela wok bilong strongim kongrigesen long ol samting bilong spirit, na dispela i save helpim kongrigesen long mekim gut wok God i bin givim long en.
5 Tru tumas, bilong pinisim wok, yumi olgeta i mas wok wantaim. No gat wanpela i ken ting olsem em i no inap helpim dispela wok. Taim yumi olgeta i wok wantaim bilong mekim ol wok bilong Jehova, maski yumi mekim bikpela o liklik wok, dispela i kamapim klia olsem yumi tasol i lotu tru long God. (Mal 3:18) Yumi olgeta wan wan i ken mekim gutpela wok bilong litimapim nem bilong Jehova na helpim ol narapela long kisim save long em na mekim wok bilong em.