Pasin Bilong i Stap Klin i Save Litimapim Nem Bilong God
1 Lo Bilong Moses i gat ol strongpela lo bilong helpim ol Israel long i stap klin. Ol dispela lo bilong stap klin long skin na long spirit i makim ol i narapela kain tru long ol narapela lain. (Wkp 11:35, 36; 15:1-11; Ais 52:11) Ol i stap klin olsem, na dispela i litimapim nem bilong God na helpim skin bilong ol i stap gutpela; ol i no save sik tumas.
2 Long nau tu, pasin bilong i stap klin i wanpela mak bilong lain bilong Jehova. Tasol olsem wanem long yumi olgeta wan wan—yumi stap klin? Taim yumi stap klin na stretim gut ol samting, dispela i kamapim klia olsem yumi pilim tru ol lo bilong Jehova.
3 Olsem wanem long haus na banis bilong yumi? Em i nogutim tok bilong Kingdom yumi save autim? Sapos yumi no katim ol gras samting na i gat pipia na ol samting i stap nabaut, orait, taim yumi tokim ol man olsem gutpela ples paradais bai kamap long graun, ating bai ol i no bilipim yumi, a? Sapos ol samting i stap nabaut o toilet samting i no klin na i gat smel nogut, yumi no ken tok yumi “bihainim gutpela klinpela pasin i stret wantaim dispela nupela taim em Kingdom bilong God bai bosim,” a?—om pes 130, 131.
4 Taim yumi autim tok na go long ka, olsem wanem long ka? Insait na ausait bilong en i stap klin? Nogut em i doti na i pasim ol man long harim tok bilong Kingdom. Na olsem wanem long klos na gras bilong yumi na paus bilong autim tok? Ol i klin na i stap gutpela? Nogut ol man i gat tok long dispela. Olgeta de yumi mas waswas, na wasim klos tu, bambai skin na klos bilong yumi i stap klin.—w89 12/1 pes 17-21.
5 Olsem wanem sapos wanpela brata i slek na em i no mekim gut skin na klos o haus na banis samting bilong em, na dispela i mekim na ol man i gat tok long kongrigesen? Sapos em i lapun o skin i no strong, gutpela sapos narapela i mekim pasin sori na helpim em long stretim ol samting. Tasol sapos brata i no tingim na ol samting i stap olsem, orait, narapela i mas sori long em na givim sampela gutpela tok long em na ating dispela inap kirapim em long mekim gut ol samting. Tasol sapos oltaim wanpela brata o wanpela sista i no mekim gut skin na klos o haus na banis samting, em i no ken holim bikpela wok insait long kongrigesen. Tasol ol elda i mas was gut, nogut ol i kamapim sampela lo o tingting bilong ol yet tasol na ol i strong long ol brata i mas bihainim.
6 Yumi save singautim ol nupela long kam long Haus Kingdom bilong yumi bambai ol inap kisim ol kaikai bilong spirit. Klostu olgeta taim yumi amamas long mekim olsem, long wanem, Haus Kingdom i klin na i luk nais. Tasol bilong Haus Kingdom i ken i stap olsem, yumi mas mekim wok. Lukim gut ol samting i stap long Haus Kingdom. Olsem wanem? Ol sia na plua na ol banis i stap klin? Yumi save wasim rum toilet? Sapos longtaim pinis yumi lukim plua o banis i doti, ating bai yumi no tingting olsem yumi gat wok long klinim o penim. Tasol taim ol nupela i kam long namba wan taim, ating bai ol i lukim ol dispela samting na ol i no ken amamas long dispela. Olsem na yumi mas wok strong long mekim gut Haus Kingdom na bai em i ken luk nais. Long taim bilong klinim na stretim ol samting bilong Haus Kingdom, gutpela sapos yumi olgeta wan wan i insait long dispela wok. Maski em Haus Kingdom ol i bin wokim long diwai bilong bus, yumi inap klinim na stretim na mekim i stap gutpela.
7 Maski yumi no mekim wanpela tok, sapos yumi stretim gut skin, na haus, na ka, na Haus Kingdom bilong yumi, long dispela rot bai yumi inap litimapim nem bilong God. Bai yumi no pundaunim wanpela man, nogat; gutpela pasin yumi bihainim bai kamapim klia olsem lotu bilong yumi i klin na i stret.—1 Ko 10:31, 32; Je 1:27.
This is a repeat of article in km 4/94 taken from km-E 4/94 “Cleanliness Honors God.” Also repeated in 7/02.