Ol i Lukim Yumi i Narapela Kain
1 Long las yia, winim 300,000 nupela i kisim baptais na ol i kam insait long lain bilong yumi. Ol dispela manmeri i bin lukim wanem pasin bilong ol Witnes Bilong Jehova na dispela i bin kirapim ol long kam insait long oganaisesen bilong God? Bilong wanem yumi i narapela kain long ol narapela lotu? Sampela bekim bilong ol dispela askim i stap daunbilo:
—Yumi save bihainim ol lo bilong Baibel na i no ol tingting bilong yumi yet: Yumi save lotuim God Jehova long ‘spirit na long pasin i tru’ olsem Krais Jisas i tok yumi mas mekim. Bilong mekim olsem yumi lusim olgeta bilip giaman bilong ol lotu na bihainim ol lo bilong Baibel.—Jo 4:23, 24; 2 Ti 3:15-17.
—Yumi go lukim ol man, yumi no wet long ol i kam long yumi: Yumi orait long bihainim tok bilong Jisas long autim tok na skulim ol man, na yumi bihainim ol pasin bilong em long painim ol man i gat gutpela bel. Yumi painim ol long haus bilong ol, long rot, o wanem wanem hap ol man i stap long en.—Mt 9:35; 10:11; 28:19, 20; Ap 10:42.
—Yumi skulim ol man long Baibel, na no gat pe: Long laik bilong yumi yet, yumi mekim wok long mani na strong bilong yumi na lusim 1 bilion samting aua long olgeta wan wan yia long mekim wok bilong God. Yumi save mekim Baibel-stadi wantaim olgeta kain man, maski ol i bilong wanem lain o skin.—Mt 10:8; Ap 10:34, 35; KTH 22:17.
—Yumi bin skul gut long helpim ol man long ol samting bilong spirit: Long rot bilong stadi long Baibel em yumi yet i save mekim, na long ol tok yumi lainim long ol miting, kibung sekit, na kibung distrik, yumi skul gut long ol samting bilong spirit na dispela i save inapim yumi long helpim ol narapela.—Ais 54:13; 2 Ti 2:15; 1 Pi 3:15.
—Yumi tingim tok i tru i bikpela samting, na yumi bihainim long olgeta de: Yumi laikim God, olsem na yumi senisim sampela pasin bilong yumi na bihainim ol laik bilong em. Nupela pasin yumi kisim olsem bilong Krais i save pulim ol man i kam long tok i tru.—Kl 3:9, 10; Je 1:22, 25; 1 Jo 5:3.
—Yumi save wok strong long stap bel isi na wok gut wantaim ol narapela: Taim yumi bihainim ol pasin bilong God, dispela i helpim yumi long was gut long ol pasin na toktok bilong yumi. Yumi save wok strong long stap bel isi wantaim olgeta manmeri.—1 Pi 3:10, 11; Ef 4:1-3.
2 Taim ol man i lukim i stap bilong ol Kristen insait long oganaisesen bilong Jehova, dispela i save kirapim planti long kam insait long tok i tru. I gutpela sapos pasin bilong yumi olgeta wan wan i helpim ol man i save long yumi na lukim pasin bilong yumi.