Askim
◼ Ol papamama i mas was gut long wanem samting taim ol pikinini bilong ol i mekim wok autim tok?
I stret ol papamama Kristen i save kisim ol pikinini bilong ol i go wantaim ol long autim tok, na lainim ol long autim gutnius bilong Kingdom long ol narapela. Taim ol i mekim olsem, ol i mas was long ol pikinini bilong ol, long wanem, samting nogut inap kamap long teritori, maski ol i autim tok long ol “gutpela” teritori. Planti man i laik bagarapim na mekim nogut long ol pikinini, long wanem, nau yumi stap long “taim bilong las de” na pasin bilong ol man long tingim ol yet tasol na mekim ol pasin sem nogut tru i go bikpela. (2 Ti 3:1-5) Ol papamama i mas tingting stret na was gut long ol pikinini bilong ol na bai ol man bilong mekim ol pasin nogut i no ken bagarapim ol. Ol papamama i ken mekim wanem?
Baibel i givim gutpela tok long yumi long was gut na tingim ol samting nogut inap kamap. (Snd 22:3; Mt 10:16) I no olsem mipela i putim sampela lo, tasol bilong bihainim gutpela tingting, i gutpela sapos papamama o wanpela man i bikpela pinis i ken wok wantaim wanpela pikinini taim em i mekim wok autim tok. Sapos tupela yangpela pablisa i gat save i wok wantaim, em i gutpela long papamama o wanpela man i bikpela pinis i ken lukluk long ol long olgeta taim. Tru, taim ol pikinini i go bikpela na ol inap lukautim ol yet, nau papamama i ken skelim ol i mas i gat man long was long ol o nogat.—Lukim tu Askim long Wok Kingdom, bilong Disemba 1992.
Em i pasin bilong gutpela tingting long was gut long taim yumi raun long ka, PMV, o wokabaut long rot. Pasin bilong was gut i save helpim man long abrusim birua o bagarap long rot na ol hevi na pen em inap kisim long dispela bagarap, na em i no inap tromoi mani bilong baim dokta na marasin, na long baim kompensesen o kot.
I stret long ol yangpela i “mas litimapim nem bilong Bikpela.” (Sng 148:12, 13) Ol gutpela tok ol i kamapim na gutpela pasin bilong ol long taim ol i mekim wok autim tok i kirapim tru tingting bilong ol man na i litimapim nem bilong Jehova. Ol papamama, yupela i mas helpim ol pikinini bilong yupela long mekim wok bilong autim gutnius long olgeta taim, na tu, long olgeta taim yupela i mas sambai na lukautim ol bambai ol samting nogut i save kamap long nau i no ken painim ol!