I Gat As na Yu Autim Tok?
1 Jehova em i God bilong kamapim laik bilong em. (Ais 55:10, 11) Em i kirapim yumi long bihainim ol pasin bilong em. (Ef 5:1) Dispela samting i mas kamap tru long pasin yumi mekim long taim yumi autim tok. Olsem na dispela askim i stret: “I gat as na yu autim tok?”
2 Wok autim tok yu mekim long ol haus, na long kain kain taim na ples, na taim yu tilim nius samting, ol i hap bilong dispela wok i gat as bilong en. Tasol yumi mas tingim, wok bilong yumi i no bilong autim tok tasol, nogat, yumi mas kamapim disaipel tu. (Mt 28:19, 20) Taim yumi planim pinis pikinini kaikai bilong tok i tru bilong Kingdom, yumi mas go bek gen bilong givim wara long ol, na taim yumi wok long lukautim ol long olgeta wik yumi wetim Jehova i mekim ol i kamap strong. (1 Ko 3:6) Yumi mas tingim gut wok bilong mekim ol gobek na kirapim Baibel-stadi.
3 Mekim Wok Bilong Yu i Go Bikpela: Bel i save amamas taim yu tingim bek ol samting yu bin mekim long wok bilong autim tok na yu inap tokim yu yet olsem: “Mi pinisim wok mi laik mekim.” Olsem Pol i tok long 2 Timoti 4:5: “Yu mas mekim tru dispela wok.” Olsem na yumi mas wok strong long go bek na painim olgeta man i laik harim tok. Long sedyul bilong yu bilong autim tok long olgeta wik, makim taim stret bilong mekim ol gobek. Wok strong long winim mak bilong traim long kirapim Baibel-stadi wantaim ol man i laikim stretpela pasin. Yu mas i gat dispela laik taim yu insait long wok autim tok.
4 Askim ol pablisa, ol i pilim olsem wanem taim ol i lukim ol Baibel-stadi bilong ol i bin kisim baptais long wanpela kibung. Ol i amamas. Ating ol i kisim bikpela amamas olsem ol man i bin kisim baptais. Ol i pinisim wanpela wok ol i laik mekim! Wanpela sista i save kamapim disaipel i tok olsem: “Taim yumi kamapim disaipel, yumi kamapim sampela man moa i save litimapim nem bilong Jehova. Ol man i kisim tok i tru ol inap kisim laip oltaim. Mi amamas tru long skulim ol man long tok i tru—em i gutpela samting tru! . . . Planti bilong ol dispela man nau ol i laikim tru Jehova ol i kamap gutpela pren bilong mi.”
5 Tingim: Yu inap helpim wanpela man long kamap wokman bilong Jehova i dediket long em! Man! Em samting bilong mekim yu i amamas tru! Gutpela kaikai i save kamap sapos yu pilim olsem i gat as na yu autim tok.—Kl 4:17.