‘Mi Inap Mekim Wanem?’
1 ‘Mi inap mekim wanem?’ Ating ol manmeri i bin bung long liklik grup bilong Baibel-stadi em Charles Taze Russell i bin kamapim long yia 1870 samting, ol i bin tingting long dispela askim. Taim ol i kisim sampela save moa long laik bilong God, ating ol dispela Sumatin Bilong Baibel ol i bin tingting long ol i ken mekim wanem bilong helpim ol narapela long kisim save long laik bilong God. Em bikpela wok tru long helpim ol manmeri long olgeta hap long kisim save long ol dispela tok bilong Baibel ol i wok long kisim.
2 Yumi ken amamas, long wanem, ol i bin mekim gut dispela wok. Ol i bin mekim olsem wanem? Olgeta wan wan i bin mekim hap wok bilong em, maski dispela i olsem liklik wok tasol. Olsem na long nau, ol man long olgeta hap ol i save long ol Witnes Bilong Jehova. Ol i wanpela oganaisesen i gat klostu 6 milion manmeri bilong autim tok bilong Kingdom, na ol i mekim wok long 90,000 samting kongrigesen long 234 kantri na ol ailan bilong solwara.—Ais 60:22.
3 Givim Bel Tru Long Mekim Wok: Em i bikpela samting long yumi olgeta wan wan i insait long mekim dispela bikpela wok em Jisas i bin tok ol bai mekim long taim bilong las de. (Mk 13:10) Yumi no ken lusim dispela wok long han bilong liklik lain elda tasol, na tu, wok autim tok i no wok bilong ol painia tasol. Olgeta wan wan Kristen i dediket pinis, ol i gat hap wok bilong ol long mekim. Yumi olgeta i ken insait long sampela hap wok bilong wok autim tok. (1 Ti 1:12) Taim yumi mekim dispela wok inap long skel bilong yumi, yumi helpim yumi yet na ol narapela.—1 Ti 4:16.
4 Na tu, yumi olgeta wan wan i ken givim bel tru long helpim lain brata Kristen long sampela narapela gutpela rot. Bilong helpim ol miting bilong kongrigesen, yumi go long ol miting long olgeta taim na amamas long insait long bekim ol tok samting. (Sng 122:1, 8, 9) Yumi ken mekim ol samting bilong helpim kongrigesen long i stap klin. Inap long skel bilong yumi, yumi ken givim sampela mani bilong helpim wok bilong autim tok long olgeta hap. Na yumi ken insait long wok bilong klinim Haus Kingdom. Olgeta inap mekim ol samting bilong strongim pasin bilong laikim ol narapela na pasin wanbel insait long kongrigesen—long rot bilong helpim ol nupela, na ol yangpela, na ol lapun.—Kl 3:12, 14.
5 Olsem na ating yu ken askim yu yet, ‘Mi inap mekim wanem?’ Maski ol wok yu mekim i olsem liklik samting tasol, taim yu mekim hap wok bilong yu, yu helpim kongrigesen long mekim wok, na long stap strong na gutpela. Olsem na yumi olgeta i gat bikpela wok long litimapim nem bilong Jehova!