Tingim Gut Ol Gutpela Wok Bilong God
1 Inap 3-pela de yumi bin bung long “Ol Man Bilong Bihainim Tok Bilong God” Kibung Distrik. Yumi no tingim ol samting yumi save mekim long ol wan wan de, na yumi tingim gut ol gutpela wok Jehova i bin mekim. Ol i redim dispela program bilong yumi ken bilip strong moa long God na long Tok bilong em, na em i helpim yumi long strongim pasin bilong pas gut wantaim em, na em i helpim yumi long givim bel tru long mekim wok bilong God. Ol dispela samting yumi lain long en ol i helpim yumi olsem wanem?—Jo 13:17.
2 Ol Famili i Bihainim Tok Bilong God: Tok i gat tripela hap “Bihainim Tok Bilong God” i helpim yumi long skelim famili bilong yumi i stap olsem wanem long ol samting bilong spirit. Ol pikinini i laik tru long lainim ol samting. Olsem na dispela tok i bin strongim ol papamama long mekim famili-stadi i kamap as bilong strongim famili bilong ol long ol samting bilong spirit. Planti papa i stori wantaim ol liklik pikinini bilong ol long nupela buklet Yu Inap i Stap Pren Bilong God! Dispela bai helpim ol long kisim pasin bilong pas gut wantaim Jehova. Ol papamama, lainim ol pikinini bilong yupela long pasin bilong pilim gut tingting bilong God. Yupela i mas kamapim klia olsem yupela i laikim tru God na ol wok bilong em. (Sng 103:2) Wok wantaim long putim ol mak bilong spirit yupela i laik winim na givim bel tru long mekim wok bilong Jehova.
3 Tok Bilong God i Soim Rot Long Yumi: Yumi bin amamas tru long kisim nupela buk nem bilong en Isaiah’s Prophecy—Light for All Mankind I. Sapos yu inap kaunim tok Inglis, yu kaunim dispela buk i go inap long wanem mak? Dispela buk bilong Aisaia i stori long kot bilong God long ol lain nogut, na tu, em i stori long ol gutpela samting Kingdom bai kamapim long ol manmeri bilong God. (Ais 34:2; 35:10) Em i strongim tu yumi long bilip tru long Jehova na long pasin bilong em long mekim ol samting. —Ais 12:2-5.
4 Pasin nogut i bikpela tru long taim bilong Aisaia, tasol em i stap gut long Jehova. Taim Jehova i askim Aisaia long bringim tok bilong em i go long ol man, Aisaia i tok: “Yu salim mi.” (Ais 6:8) Taim yu tingim gutpela pasin bilong em long givim bel long wok, dispela bai strongim yu long wok yet long autim gutnius, na long mekim tru wok witnes “long olgeta hap bilong graun.”—Mt 24:14.
5 Taim yumi tingim ol wok Jehova i bin mekim, dispela i kamapim klia biknem bilong em. Olsem na amamas long gutpela wok yu kisim bilong stap olsem man bilong bihainim tok bilong God!