Bai Yu Tok,“Mi Stap! Salim Mi”?
“Jehova i tok: Mi mas salim husat? Husat bai go mekim dispela wok bilong yumi?’ Na mi tok: ‘Mi stap! Salim mi.’ ”−AISAIA 6:8, NW
“MIPELA i amamas long salim dispela pas long yu na tok, mipela i orait long i go long Kolambia. Mipela i bin wok hia long Ekwado na mipela bin amamas long dispela.” Tupela Witnes Bilong Jehova i salim pas long Sosaiti na i tok olsem. Ol i bin stap long kantri Ekwado, na ol Witnes i bin wokim nupela brens-ofis bilong Sosaiti Was Taua long dispela hap.
2 Dispela tupela wokman bilong God i bin i go long Ekwado long helpim ol long wokim haus brens, na long mekim wok tisa Kristen tu. Tupela i tok: “Mipela ting wok autim tok i namba wan wok. Tripela wik i go pinis, mipela 8-pela i bin i go long wanpela maket na tilim 73 buk na 40 magasin. Paslain long dispela mipela i bin kirapim tupela nupela Baibel-stadi. Tru tumas, i mas i gat nupela brens. Mi tupela meri bilong mi i laik tok tenkyu long Sosaiti, long wanem mipela inap mekim yet dispela wok” long Kolambia.
3 Dispela tupela marit, na planti handet moa tu, ol i orait long Sosaiti i salim ol i go long ol narapela kantri; ol i gat wankain tingting olsem bilong Aisaia. Taim Jehova i tok: “Mi mas salim husat? Husat bai go mekim dispela wok bilong yumi?” Aisaia i kirap na i bekim tok olsem: “Mi stap! Salim mi.” Na nau God i tok: “Yu go, na yu mas tok olsem long ol dispela man: ‘Yupela mas harim harim tok, tasol bai yupela i no save long as bilong en.’ ” (Aisaia 6:8, 9, NW ) God i laik salim Aisaia long mekim wanem wok na Aisaia i redi long mekim? Na taim Aisaia i mekim, wanem samting i kamap? Dispela stori i lainim yumi long wanem ol samting bilong nau? Na yumi kisim wanem save long ol samting yumi yet i ken mekim?
Aisaia i Kisim Wok Bilong Autim Tok
4 Long yia em King Asaia i dai pinis, God Jehova i askim profet Aisaia: “Mi mas salim husat?” (Aisaia 6:1) Dispela yia em yia 777 paslain long Krais, em klostu 200 yia paslain long taim ol Babilon i bagarapim Jerusalem na kantri Juda. Jehova i save pinis dispela bagarap i laik kamap, olsem na em i givim wok long Aisaia long autim tok long dispela samting. Yumi kisim wanem save long dispela wok em Aisaia i mas mekim?
5 Aisaia i pilim tru ol samting em i lukim taim Jehova i makim em bilong mekim dispela wok, na em i save dispela wok em i kisim em bikpela wok. Ating sapos yumi kisim kain wok olsem, yumi tu bai pilim tru olsem Aisaia i bin mekim. Aisaia i tok: “Mi lukim Jehova em i sindaun long sia king i stap antap, na klos bilong em i pulimapim haus lotu. Ol bikpela ensel i sanap i stap antap long em. Olgeta wan wan i gat 6-pela wing. Tupela wing i haitim pes bilong em, na tupela wing i haitim lek bilong em, na tupela wing i bilong em i ken flai nabaut. Na narapela ensel i singaut long narapela na i tok: ‘Jehova bilong ol ami em i holi, em i holi, em i holi. Olgeta samting bilong graun i save litimapim nem bilong em.’ ”−Aisaia 6:1-3, NW.
6 King Aisaia i no pris na bai em i gat wok long mekim ofa long Rum Holi long haus lotu, tasol em i mekim dispela samting, na God i givim sik lepra long em. Aisaia i save long dispela, olsem na taim Aisaia i lukim Jehova, Aisaia i save, em bikpela samting! Aisaia em wanpela sinman, olsem na em i no lukim tru Jehova; em i lukim Jehova olsem long piksa o driman. (Eksodas 33:20-23) Ol dispela ensel Aisaia i lukim i makim olsem samting em i lukim i bikpela samting. Ol dispela ensel hia i gat bikpela namba; ol i save stap klostu long sia king bilong Jehova na ol i redi i stap bilong mekim wok bilong em. Ol i pilim tru olsem Jehova em i holi moa, olsem na ol i haitim ‘pes’ bilong ol. Ol i daunim ol yet na ol i tokaut olsem Jehova em i holi. Sapos wanpela man bilong graun i lukim ol dispela bikpela samting, em bai ting olsem wanem?
7 Aisaia yet i ken tok: “Mi kirap na mi tok: ‘Sori tumas long mi! Mi no inap toktok, long wanem maus bilong mi i no klin, na mi stap namel long ol man em maus bilong ol i no klin, na ai bilong mi i lukim pinis King yet, em Jehova bilong ol ami!’ ” (Aisaia 6:5, NW ) Aisaia i save em i wanpela tokman bilong God, tasol taim em i lukim ol samting long driman em i pilim tru olsem em i sinman na maus bilong em i no klin inap long em i autim ol tok bilong dispela bikpela King em i holi. Na sampela taim ating yumi tu i pilim tru olsem yumi sinman na yumi no gutpela man inap long yumi beten toktok wantaim God o holim nem bilong em. Tasol yumi ken tingim sampela samting moa i bin painim Aisaia na dispela bai strongim yumi.
8 Wanpela ensel i kisim hap paia long alta bilong kukim ol animal olsem ofa na ensel i karim i go long Aisaia na ensel i putim dispela paia long maus bilong Aisaia na i tok: “Harim! Dispela paia i holim pinis maus bilong yu, na nau rong bilong yu i tekewe pinis na sin bilong yu ol i lukim.” (Aisaia 6:6, 7, NW ) Long taim bilong Solomon, ol i mekim ofa long alta na paia i lusim heven i kam daun na kukim dispela ofa na dispela i mekim olsem Jehova i orait long ol dispela ofa maski ofa i no mekim ol manmeri na ol pris tu i kamap klin olgeta long ai bilong Em. (2 Kronikel 7:1-3; Hibru 10:1-4, 11) Tasol taim paia i tekewe rong bilong Aisaia, nau em i ken save olsem em i stap klin long ai bilong Jehova inap long em i ken holim dispela wok bilong autim tok, em Jehova i laik givim long em. Ol dispela samting i makim wanem ol samting bai kamap bihain?
9 Dispela bikpela samting i bin painim profet, na nau em i kisim dispela wok olsem ensel i bin tok. (Aisaia 6:8, 9) Tasol yumi laik save, bilong wanem Aisaia i mas tok, ol man bai harim harim tok, tasol ol i no inap pilim na kisim save? God i tok moa, em i tok: “Mekim bel bilong ol i strong, na mekim yau bilong ol i pas, na mekim ai bilong ol i pas, na bai ol i no inap lukluk . . . nogut bel bilong ol i save long as bilong tok na ol i tanim bel na orait bek.” (Aisaia 6:10, NW ) Olsem wanem? Aisaia i mas tok strong long ol Juda na mekim ol i pasim yau na ol i mas i stap bikhet long Jehova? Nogat. Dispela tok i makim olsem taim Aisaia i givim tok long ol, ol bai pasim yau na ol bai bikhet i stap, maski Aisaia i tok klia long ol na em inapim gut dispela wok bilong autim tok em i bin kisim taim em i tok, “Mi stap! Salim mi.”
10 Ol dispela man yet i asua. Aisaia i autim tok long ol na ol inap “harim harim tok,” tasol ol yet i no laik harim na bihainim. Bipo God i bin tok, ol dispela Juda i bikhet na ol i no tingim ol samting bilong spirit, olsem na bai ol i no inap bihainim tok; wan wan bai harim tok, na bikpela hap lain bai stap olsem man i aipas na samting olsem semen i pasim strong tupela hap skin bilong ai bilong em na em i no inap opim. Na ol bai stap olsem inap long wanem taim? Aisaia i laik save long dispela, olsem na em i askim Jehova: “O Jehova, inap long wanem taim?” Em i no laik save, inap long wanem taim em i mas mekim dispela wok. Nogat. Na Jehova i bekim na i tok: “Inap long taim ol taun i bagarap na i no gat man i stap long en, na ol haus i stap nating, no gat man i stap long en.” Na ol dispela samting i kamap tru bihain long taim Aisaia i dai pinis. Ol Babilon i kam na pinisim ol man, na ples Juda “i bagarap tru.”−Aisaia 6:11, 12, NW; 2 King 25:1-26.
11 Tasol bihain Jehova i givim sampela tok moa long Aisaia na bai Aisaia i ken save, ol samting i no nogut olgeta; i gat gutpela samting bai kamap. Jehova i tok: “Tasol liklik hap bai stap yet [long ples].” I olsem ol i katim na rausim bikpela diwai, na as tasol i stap. (Aisaia 6:13, NW ) Lain Juda i stap kalabus long Babilon inap 70 yia, na bihain, liklik hap lain bilong ol i go bek gen long as ples bilong ol; ol i olsem nupela kru i kamap long as bilong dispela bikpela diwai. (2 Kronikel 36:22, 23; Esra 1:1-4; skelim wantaim tok bilong Jop 14:7-9; Danyel 4:10, 13-15, 26.) Tru, tok bilong Aisaia i gat planti hevipela tok long en, tasol i gat dispela gutpela tok i stap em inap strongim bel bilong ol. Sapos yumi lukim ol tok bilong Baibel yumi save, Aisaia i mekim ol samting i makim sampela samting bai kamap bihain. Olsem wanem wok bilong Aisaia i makim samting bilong bihain?
Bikpela Truim
12 Planti handet yia bihain long taim Aisaia i dai pinis wanpela man i kamap, em i olsem Man I Winim Aisaia. Dispela man em Krais Jisas. Paslain long taim em i kamap man, em i stap long heven na em i orait long Papa i ken salim em i kam daun long graun, na long graun em bai autim tok na kamapim tu sampela tok bilong Aisaia. (Provep 8:30, 31; Jon 3:17, 34; 5:36-38; 7:28; 8:42; Luk 4:16-19; Aisaia 61:1) Na taim Jisas i tokim ol man long as bilong ol tok em i lainim ol long en, em i kolim tok bilong Aisaia sapta 6 na tok, ol dispela tok i makim em yet. (Matyu 13:10-15; Mak 4:10-12; Luk 8:9, 10) I stret em i tok olsem, long wanem planti Juda i harim Jisas i autim tok, tasol ol i no givim bel na bihainim dispela tok; ol i mekim olsem ol man i bin harim tok bilong Aisaia, em ol i no bihainim tok bilong Aisaia. (Jon 12:36-43) Ol dispela Juda i ‘pasim ai na yau’ bilong ol bai ol i no ken harim tok bilong Jisas, olsem na ol i kisim bagarap long yia 70 C.E. wankain olsem ol Juda i bin kisim long yia 607 B.C.E. Dispela bagarap long 70 C.E. em bikpela bagarap tru; kain bagarap olsem ‘i no bin kamap bipo’ long Jerusalem na ‘bihain tu’ bai i no gat bagarap olsem i kamap long en. (Matyu 24:21) Tasol Aisaia i tok, liklik hap lain, olsem ‘lain holi,’ bai ol i harim tok na bilip na bai ol i kamap lain Isrel bilong spirit, em spirit bilong God i makim ol na ol i olsem “Isrel tru bilong God.”−Galesia 6:16.
13 Nau yumi ken stori long narapela tok bilong Aisaia sapta 6 na truim bilong en. Pastaim yumi ken tingim tok aposel Pol i mekim long yia 60 C.E. samting. Em i bin “autim gut tok bilong kingdom bilong God” long ol Juda long Rom, tasol ol i no laik harim, na long yia 60 C.E. em i tokaut long as bilong dispela samting. As bilong en i olsem: Narapela truim bilong Aisaia 6:9, 10 i wok long kamap. (Aposel 28:17-27) Olsem wanem? Taim Jisas i lusim graun na i go bek long heven, ol disaipel bilong em i mas kisim wankain wok olsem bilong Aisaia? Em tasol! Ol i mas mekim wok olsem Aisaia i bin mekim.
14 Dispela Man I Winim Aisaia, taim em i laik go antap long heven em i tok, ol disaipel bilong em bai kisim spirit holi na ol bai autim tok “long Jerusalem, na long olgeta Judia, na long Samaria, na i go inap long olgeta hap graun.” (Aposel 1:8) Bipo, i gat alta bilong wokim ofa, na ensel i kisim hap paia bilong en na rausim sin bilong Aisaia. Na olsem tasol ofa bilong Jisas i tekewe sin bilong ol disaipel bilong em. (Levitikas 6:12, 13; Hibru 10:5-10; 13:10-15) Nau God inap makim ol long spirit holi, na dispela bai strongim ol na bai ol inap mekim dispela wok bilong ‘autim tok i go inap long olgeta hap graun.’ God i bin salim profet Aisaia na Man I Winim Aisaia, em tupela i gat wok long autim tok bilong God. Na olsem tasol ol disaipel “i kisim dispela wok long God” na taim ol i mekim, ol i stap “wanbel wantaim Krais.”−2 Korin 2:17.
15 Taim Namba Wan Pait Bilong Olgeta Hap i pinis na i kam inap nau, ol Kristen em spirit i makim ol, ol i save ol i mas autim tok bilong God. Wanpela hap tok ol i mas autim em olsem: “De bilong God bilong yumi i bilong bekim pe nogut” em i klostu. (Aisaia 61:2, NW ) Bikpela bagarap tru bai kamap; ol misin i tok ol i Kristen na ol i tok ol i lain bilong God, ol bai kisim nogut olsem ol Isrel bipo i bin kisim. Ol witnes bilong God, em spirit holi i bin makim ol, ol i bin autim tok long ol inap planti yia, tasol planti ol i pasim tingting na bel na yau na ai bilong ol bambai ol i no ken harim. Aisaia i tok, ol bai mekim olsem inap long taim ol taun i bagarap na i no gat man i stap long en, na ol haus i stap nating, no gat man i stap long en, na graun i bagarap tru.” Pasin nogut nau i stap long graun bai pinis olgeta.−Aisaia 6:10-12, NW.
“Salim Mi”
16 Long nau i gat planti milion Kristen ol i givim bel tru long God na ol i bilipim tok bilong Baibel i tok ol i ken wet long kisim laip i stap oltaim long paradais long graun. Blut bilong Jisas, em i givim olsem ofa, dispela i olsem rot bilong God i ken lusim tingting long sin bilong ol dispela “planti tumas manmeri” inap long Em i mas mekim long nau. Spirit bilong God i helpim na strongim ol na ol i bung wantaim dispela hap lain Kristen God i makim ol, na ol i tok: “Mi stap! Salim mi.” Salim ol bilong mekim wanem? Long Rom 10:13-15 Pol i tok: “ ‘Olgeta man i kolim nem bilong [Jehova] na i singaut long em, bai em i kisim bek ol.’ Tasol, sapos ol i no bilip long em, olsem wanem bai ol i singaut long em? Na sapos ol i no harim tok bilong em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim? Na sapos God i no salim ol man bilong autim tok, olsem wanem bai ol i autim? Baibel [long Aisaia 52:7] i tok olsem: ‘Ol man i bringim gutnius, olaman, ol i mekim gutpela pasin tru!’ ”−Revelesen 7:9-15.
17 God i tok: “Mi mas salim husat? Husat bai go mekim dispela wok bilong yumi?” Taim Aisaia i tok: “Mi stap! Salim mi,” em i no save long olgeta hap tok em i mas autim. Tasol ol man nau ol i tok, “Mi stap! Salim mi,” ol i save long ol tok ol i mas autim. Yumi mas tokim ol man long “de bilong God bilong yumi i bilong bekim pe nogut.” Tasol yumi mas tokim ol tu long “gutnius” bilong ol gutpela samting bai kamap. Baibel i tok, ol dispela man, em ‘God i salim ol bilong autim tok,’ ol i mas autim tok olsem: “Yupela kalabusman i ken lusim kalabus i go. Yupela kalabusman i aipas yupela i ken lukluk gen.” Sapos yumi mekim dispela wok bai yumi amamas tru, a?−Aisaia 61:1, 2, NW.
18 Ating yu save autim “gutnius” bilong ol gutpela samting bai kamap, tasol taim yu harim ol dispela stori bilong Aisaia sapta 6, ating bai yu tokim skin bilong yu olsem: ‘Mi mas mekim wanem na bai mi wok strong moa long bihainim tok bilong Aisaia 6:8?’ Olsem dispela tupela marit pastaim yumi bin stori long tupela, planti handet moa i insait long wok bilong wokim ol nupela haus brens samting long narapela narapela kantri. Na planti moa ol i no save long wokim haus, tasol ol i go long ol kantri i sot long ol man bilong autim tok bilong Kingdom. Tasol sapos yu laik go long narapela hap na mekim dispela wok, gutpela sapos yu askim brens-ofis bilong Sosaiti Was Taua pastaim. Sampela kantri ol i gat narapela tok ples, na pasin bilong ol i narapela kain, na ating yu mas painim wanpela wok mani; yu mas tingim ol dispela samting. Tasol yu no ken larim dispela i pretim yu na pasim yu. Planti ol i bin tok: “Mi stap! Salim mi,” na ol i go long narapela hap, na God i blesim ol na ol i mekim gutpela wok.−Lukim Provep 24:27; Luk 14:28-30.
19 Na sampela−olsem brata sista singel, o brata wantaim meri bilong em, o famili olgeta−ol i no lusim kantri bilong ol, tasol ol i go sindaun long narapela hap bilong kantri em i sot long man bilong autim tok bilong Kingdom o i sot long wasman Kristen. (Aposel 16:9, 10) Taim ol i mekim olsem, ating ol i bin lusim gutpela wok mani na ol i mas painim narapela wok long dispela hap ol i go long en, na ating i no gutpela wok olsem ol i bin lusim na pe i liklik. Sampela ol i no lapun yet, tasol ol i ritaia, olsem pinis wok, na kisim liklik skel long kampani ol i bin wok long en, o ol i painim wok haptaim bambai ol i gat bikpela hap taim bilong autim tok. Na i gutpela tu sapos wanpela famili olgeta i ken tok: “Mipela stap! Salim mipela.” Olsem bai ol i bihainim pasin bilong Aisaia. Meri bilong Aisaia tu em i wok strong long bihainim laik bilong God; em i wanpela profet meri. Na ol pikinini man bilong Aisaia tu ol i gat wok insait long sampela tok profet.−Aisaia 7:3, 14-17; 8:3, 4.
20 Tasol sapos nau yu no inap i go long narapela hap, yu ken askim skin bilong yu, ‘Mi inap wok strong moa long dispela hap nau mi stap long en bambai mi bihainim pasin bilong Aisaia?’ Yu ken taitim bun na givim bel long autim tok bilong God, maski i gat ren o bikpela san o ol man i no laik harim; Aisaia i bin mekim olsem. Wok strong long tokim ol man long “gutnius” bilong ol gutpela samting bai kamap bihain. Jehova i bin tok: “Mi mas salim husat?” Yu ken mekim ol samting wankain olsem bilong Aisaia na i olsem yu bekim dispela askim na yu tok, “Mi stap! Salim mi” long autim tok bilong Jehova.
Stori Gen long Ol Dispela Tok
◻ Wanem kain pasin i stap na Aisaia i lukim ol samting em i stori long en long sapta 6? Em i lukim wanem ol samting?
◻ God i salim Aisaia bilong mekim wanem wok?
◻ Bilong wanem yumi ken tok Jisas em i olsem Man I Winim Aisaia? Dispela wok ol disaipel bilong Jisas i mas mekim, olsem wanem em i wankain olsem wok bilong Aisaia?
◻ Yu mas mekim wanem na bai yu bihainim pasin bilong Aisaia?
[Askim Bilong Stadi]
1, 2. Tupela marit i bin amamas long wanem samting?
3. Planti i gat wanem kain tingting i wankain olsem bilong Aisaia?
4, 5. (a) Wanem kain pasin i stap taim Aisaia i kisim dispela wok em i mas mekim? (b) Aisaia i lukim wanem ol samting?
6. Samting Aisaia i bin lukim, olsem wanem dispela i bikpela samting?
7. Taim Aisaia i lukim ol dispela samting, em i pilim olsem wanem? Na sapos yumi lukim ol samting olsem, bilong wanem yumi tu bai pilim wankain olsem Aisaia i bin pilim?
8. Wanpela ensel i mekim wanem wok? Na wanem samting i kamap?
9. Wanem as bilong dispela tok em Aisaia i mas givim long ol Juda?
10. (a) Husat i asua na ol man i stap olsem aipas na yaupas? (b) Bilong wanem Aisaia i askim, “Inap long wanem taim?”
11. Olsem wanem hap tok bilong Aisaia inap strongim bel bilong ol man?
12. Wanem sampela hap tok bilong Baibel yumi tingim na yumi ken tok, Jisas i olsem Man I Winim Aisaia?
13. Olsem wanem yumi save, i mas i gat narapela truim bilong Aisaia sapta 6?
14. Dispela wok ol disaipel bilong Jisas i mas mekim, olsem wanem em i wankain olsem wok bilong Aisaia?
15. Lain bilong God i bin autim tok long ol man, tasol ol dispela man i mekim wanem? Olsem na wanem samting i mas kamap?
16. Olsem wanem i stret yumi ken tok, dispela “planti tumas manmeri” i mekim wanpela wok em wankain olsem wok Aisaia i bin mekim?
17. Yumi autim wanem tok na i wankain olsem tok profet Aisaia i bin autim?
18, 19. Planti ol i mekim wanem na i olsem ol i tok “Salim mi”?
20. Sapos yu tingim tok bilong Aisaia 6:8, nau yu ken tingting long mekim wanem?
[Piksa long pes 19]
Sin bilong Aisaia i tekewe na em i kamap klin na God i salim em i go autim tok
[Piksa long pes 20]
Planti ol i bin tok, “Mi stap! Salim mi”