Riviu Bilong Skul Bilong Wok Autim Tok

Riviu bilong ol tok i bin kamap insait long Skul, kirap long Septemba 3 i go inap long Disemba 24, 2001. Long narapela hap pepa, traim raitim planti bekim insait long taim bilong mekim riviu.

[Harim: Long taim bilong mekim riviu long Skul, yu ken lukim Baibel tasol bilong helpim yu long bekim ol askim. Long pinis bilong ol askim i gat mak bilong ol buk samting, na taim yu kisim dispela pepa i go long haus paslain long taim bilong mekim riviu, yu ken lukim ol dispela buk samting bilong helpim yu long raitim stret ol bekim bilong riviu long Skul. Sampela taim ol i no putim namba bilong pes na paragraf bilong Wastaua.]

Makim ol dispela tok I Stret o I No Stret:

1. Bilip em i wanpela gutpela pasin em spirit bilong God i kirapim yumi long bihainim, olsem na ol man i no gat bilip ol i no wok long painim rot bilong kisim spirit bilong God, o ol i laik kisim bilong mekim wok i no stret, o ol i no larim spirit holi i bosim wokabaut bilong ol. (Lu. 11:13; Ga. 5:​22) [1, rs p. 68 par. 4] I Stret.

2. Song 58:4 i tok stret olsem snek kobra i gat “yau” tasol ol i no inap harim tok, long wanem, ol i yaupas. [2, Baibel ritim bilong wik; lukim Rbi8-E p. 1583.] I No Stret. Ves 5 i kamapim olsem ol snek olsem kobra ol inap long harim tok. Taim saveman i pilaim musik, dispela i mekim snek kobra i kirap na meknaisim bodi bilong en, na i no ol samting em i lukim saveman i mekim.

3. Dispela lain “planti meri” em Song 68:11 i stori long en i makim ol wokmeri nating bilong ol narapela lain em ol man Israel i bin larim ol i go fri taim ol i pait na daunim ol birua bilong ol. [3, Baibel ritim bilong wik; lukim w86-E 10/15 p. 30 par. 6.] I No Stret. Dispela lain planti meri i makim ol meri Israel; taim ol man Israel i pait na daunim ol birua i stap long Graun Bilong Promis, ol meri Israel i amamas na tokaut long ol i win; Long nau ol meri i autim gutnius ol i mekim bikpela wok long autim tok bilong Kingdom na tokaut long ol lain man olsem klostu nau bai King Mesaia i daunim ol.

4. Taim mama i karim yumi o paslain long dispela, sapos God i makim pinis taim na pasin bilong yumi long i dai, orait yumi no inap abrusim na i no gat wok long yumi lukautim gut skin o mekim sampela samting bilong abrusim bagarap. [5, rs p. 317 par. 1] I Stret.

5. Dispela tok bilong Pol olsem, “ol i lukim yu i yangpela liklik, tasol ol i no ken ting yu man nating,” em i makim olsem Timoti i gat 19 o 20 krismas samting. (1 Ti. 4:​12) [6, w99 9/15 p. 29 par. 1-3; p. 31 par. 2] I No Stret. Timoti i bin raun wantaim Pol inap planti yia pinis taim Pol i mekim dispela tok long em. Olsem na ating dispela tok i makim olsem maski Timoti yet inap mekim ol wok, em i man bilong sem liklik na em i save pret liklik long mekim wok long namba em i holim na givim tok long ol man.

6. Long Song 110:​1, dispela tok “Bikpela bilong mi” i makim Jisas. [10, Baibel ritim bilong wik; lukim w94 6/1 p. 28 par. 5.] I Stret.

7. Long Buk Song long tok Hibru, dispela nem Jehova i stap inap 700 taim; na sotpela nem “Ja” i stap 43 taim; i olsem olgeta wan wan Song i kolim nem bilong God inap 5-pela taim. [12, bsi01 p. 21 par. 23] I Stret.

8. Tru, Baibel i kolim Jisas olsem wanpela god na “God i gat bikpela strong” tasol i no gat wanpela taim Baibel i kolim Jisas olsem God i Gat Olgeta Strong. (Jo. 1:1; Ais. 9:6; Stt. 17:⁠1) [12, rs p. 120 par. 2] I Stret.

9. Taim yumi stadi long Buk Sindaun, yumi stadi long gutpela tingting na save bilong Solomon yet. [14, bsi01 p. 23 par. 1] I No Stret. “God i bin givim” gutpela tingting na save long Solomon, olsem na taim yumi stadi long Buk Sindaun, yumi stadi long gutpela tingting na save bilong God. (1 Kin. 10:​23, 24)

10. Tok bilong Baibel long Sindaun 21:17 i tok long yumi mas abrusim pasin bilong “laikim tumas gutpela kaikai na dring na pasin bilong amamas,” i makim olsem i no stret long yumi kisim amamas, long wanem, dispela bai pulim taim bilong yumi long mekim ol bikpela samting. [17, Baibel ritim bilong wik; lukim w97 10/1 p. 27 par. 7.] I No Stret. Dispela skripsa i tok lukaut long pasin bilong “laikim tumas gutpela kaikai na dring na pasin bilong amamas,” o tingim olsem amamas i nambawan bikpela samting. Long wanem, dispela bai mekim na man bai i no hangre tumas long kisim ol kaikai bilong spirit na bai em i no gat bikpela hap taim bilong autim tok bilong Kingdom.

Bekim ol dispela askim:

11. Tok Jisas i mekim long Marta i kamapim klia wanem samting? (Lu. 10:​40, 41) [3, w99 9/1 p. 30 par. 7] Jisas i kamapim klia olsem taim Marta i tingting tasol long redim kaikai, em i abrusim wanpela rot i op long em long kisim skul i kam long Pikinini bilong God​—⁠i no planti taim em inap kisim dispela kain skul.

12. Jehova i kisim man bilong raitim Song i go we? (Sng. 73:24) [4, Baibel ritim bilong wik; lukim w86-E 12/15 p. 28 par. 3.] Pastaim man bilong raitim Song i bin ting olsem sindaun bilong ol man nogut i gutpela moa na i winim sindaun bilong ol stretpela man, tasol bihain em i luksave olsem ‘pasin bilong i stap klostu long God em i gutpela tru’ (Sng. 73:​2-​12, 28); em i larim ol “gutpela tok” bilong God i stiaim wokabaut bilong em, olsem na Jehova i orait long em na em i pas gut wantaim Jehova, i olsem God i kisim em i go i stap wantaim em.

13. Olsem Song 84:​1-3 i kamapim, man bilong raitim Song i kamapim wanem tingting bilong em long wok bilong God? [6, Baibel ritim bilong wik; lukim w97 3/15 p. 8 par. 5-7.] Em i pilim tru wok em i mekim long haus lotu bilong Jehova, tasol em i gat sotpela taim tasol bilong i stap long en, olsem na em i tok olsem em bai amamas tru sapos em i kain olsem ol dispela pisin i save stap olgeta taim long haus lotu bilong Jehova.

14. Olsem wanem Kamapim Tok Hait 22:17 na Rom 2:​4, 5 i kamapim klia olsem Jehova i no save makim, o save long, olgeta samting ol man bai mekim? [7, rs p. 319 par. 3-4] Wanem man i laik kisim wara bilong givim laip, em i ken kisim long laik bilong em yet; Jehova i no save subim ol man long bihainim wanpela rot em i makim pinis long ol i mas bihainim.

15. Ol Kristen bilong pastaim ol i bin bilip na wetim Taim Bilong Wan Tausen Yia Bilong Krais i Stap King, tasol olsem wanem na bihain ol Kristen i tromoim bilip ol i kirap long sakim dispela bilip? [10, w99 12/1 p. 6 par. 3–​p. 7 par. 5] Sampela man i kisim tingting kranki long dispela taim bilong wan tausen yia, olsem em taim bilong kisim ol samting bilong skin; ol i tok olsem Buk Kamapim Tok Hait em i no wanpela hap tru bilong Baibel; pastaim ol i bin klia gut long dispela tok, tasol bihain ol i kisim ol tingting na tok bilong ol saveman bilong ol Grik. (Wanpela bilong ol dispela tok)

16. Taim ol Kristen i mekim pasin bilong “lukautim ol samting bilong ol arapela,” ol i mas abrusim wanem pasin? (Fl. 2:⁠4) [11, w99 12/1 p. 29 par. 1] Ol Kristen i mas abrusim pasin bilong “laikim tumas long harim tok long ol samting ol arapela manmeri i mekim na ol i raun na tok baksait long ol.” (1 Ti. 5:​13)

17. Dispela tok i stap long Song 128:3 i tok long ol pikinini i olsem “ol yangpela diwai oliv” i raunim tebol bilong wanpela man, em i makim wanem samting? [Baibel ritim bilong wik; lukim w00 8/15 p. 30 par. 4.] Ol nupela kru i save kamap long as bilong diwai oliv. Taim mama diwai i kamap olpela tru na i no karim planti kaikai moa, ol i larim ol nupela kru i stap na ol i save kamap bikpela strongpela diwai i pas wantaim mama diwai; olsem tasol, ol papamama i ken amamas long ol pikinini i karim kaikai na wok wantaim ol long lotuim Jehova.

18. Sapos ol gutpela wok bilong Jehova i kirapim yumi na yumi pret long em, bai yumi mekim wanem? (Sng. 139:14) [13, Baibel ritim bilong wik; lukim w93 10/1 p. 15 par. 18.] Yumi mas pilim tru na pret na daun long Jehova na dispela i mas kirapim yumi long lusim ol samting i no stret na bai yumi ken mekim ol gutpela wok tasol long olgeta taim.

19. I gat wanem as na Sindaun 5:​3, 4 i tok pasin pamuk i “samting nogut, olsem marasin i gat pait” na “em i pen olsem bainat i sutim yu”? [14, Baibel ritim bilong wik; lukim w00 7/15 p. 29 par. 2.] Taim wanpela i mekim pasin pamuk, em inap kisim bikpela pen na indai inap painim em; bel bilong em bai i gat tok, na em bai bel hevi na em inap kisim sik bilong pamuk.

20. Gutpela tingting em Sindaun 14:29 i stori long en, em inap helpim yumi olsem wanem long abrusim pasin bilong les kwik na belhat kwik? [16, Baibel ritim bilong wik; lukim w97 3/15 p. 13 par. 7-8.] Gutpela tingting inap helpim yumi long skelim gut ol samting inap kamap sapos yumi no was gut long pasin yumi mekim o long pasin bilong yumi long belhat, olsem dispela inap nogutim skin bilong yumi, yumi inap mekim sampela krankipasin, yumi no inap bihainim stretpela tingting long mekim ol samting, yumi mekim ol pasin God i no orait long en na dispela inap bagarapim pasin bilong yumi long pas gut wantaim Jehova.

Raitim wanem hap tok i stret bilong pinisim ol dispela tok:

21. Ol profet tru i save autim tok long nem bilong God na tokaut olsem ol i bilip long Jisas. (Lo 18:​18-​20; 1 Jo. 4:​1-3) [3, rs p. 375 par. 1-3]

22. Ol savetok bilong Buk Sindaun i mekim tupela kain wok​​—⁠em i givim gutpela tingting long yumi na i kamapim ol tok bilong stretim yumi. (Snd. 1:​1-4) [5, w99 9/15 p. 13 par. 2]

23. “Ples hait bilong God Antap Tru” i makim wanpela ples bilong i stap gut long ol samting bilong spirit na dispela ples em i bilong ol man i daun long God olsem em i bos bilong heven na graun; ol man i no save tingting long ol samting bilong spirit, ol i no save long dispela ples​—⁠i olsem em i stap “hait.” (Sng. 91:​1, NW ) [7, Baibel ritim bilong wik; lukim w86-E 12/15 p. 29 par. 6.]

24. Bilong helpim yumi bambai ‘yumi no ken lusim tingting long ol gutpela samting Jehova i bin mekim,’ tingim tingim long bel na pilim tru “ol gutpela samting em i bin mekim,” em ol samting em i bin mekim bilong kamapim sori bilong em long yumi olsem Song 103 i stori long en. (Sng. 103:⁠2) [8, Baibel ritim bilong wik; lukim w99 5/15 p. 21 par. 5-6.]

25. Savetok o proveb i sotpela tok i stori long ol samting i wankain o skelim samting i narapela kain long dispela tok, na em i gat wok long kirapim tingting bilong man.

Makim wanem tok i stret:

26. Maski i gat as na Devit i ken kros long samting Sol i mekim long em, Devit i bosim gut bel, long wanem, (em i save olsem Sol i gat sin long skin na ol wokboi bilong God i mas lusim rong bilong ol narapela; em i tingim pasin bilong em long i stap gut wantaim Jehova; em i save olsem i no stret long skelim pasin bilong ol narapela). (1 Sml. 24:​6, 15) [1, w99 8/15 p. 8 par. 7]

27. (Gutpela tingting na save; Tok bilong stretim yumi; Stretpela pasin) i gat planti samting bilong en, na sampela i olsem: klia gut long ol tok, gutpela save na tingting, savepasin, na pasin bilong wokim gut tingting; (man i gat gutpela pasin; man i klia gut long ol tok; man i save skelim gut ol samting) em inap skelim gut ol samting long tingting na painim tru as bilong en, na long dispela rot em inap kisim gut as bilong tok. (Snd. 1:​1-4) [5, w99 9/15 p. 13 par. 3]

28. Taim meri bilong Potifar i laik mekim pasin pamuk wantaim Josep, Josep i tok nogat long meri, long wanem, (em i save olsem Lo Bilong Moses i tambuim pasin pamuk; em i pret long bikpela namba bilong Potifar; em i tingim pasin bilong em long pas gut wantaim Jehova i gutpela samting tru). (Stt. 39:​7-9) [7, w99 10/1 p. 29 par. 3]

29. Man bilong raitim Song 119 em i amamas tru long (tok, o lo, bilong God; laip em i kisim olsem presen; rot i op long God inap kisim bek ol man), na klostu olgeta ves long dispela song i stori long dispela samting. [11, Baibel ritim bilong wik; lukim w99 11/1 p. 9 par. 5; w87-E 3/15 p. 24 par. 2.]

30. Long sapta 1 na sapta 2 bilong pas Pol i salim i go long ol (Rom; Galesia; Hibru), em i kolim sampela tok bilong Buk Song i stori long (biknem; baptais; wok) bilong Jisas Krais. [13, bsi01 p. 22 par. 28]

Putim wanem skripsa i stret long ol dispela tok:

Snd. 2:​19; 14:15; 18:17; Ro. 10:17; Hi. 13:⁠18

31. Bilong kisim bilip, pastaim man i mas kisim save long tok bilong Baibel na skelim gut dispela tok. [Ro. 10:17] [2, rs p. 70 par. 1]

32. Ol Kristen i no ken bihainim ol pasin i no stret long wok bisnis bilong ol o mekim sampela pasin bilong bisnis i no tingim gut ol samting bilong narapela. [Hi. 13:18] [4, w99 9/15 p. 10 par. 2]

33. Ol manmeri i mekim pasin pamuk inap dai long taim ol i no bin tanim bel yet. [Snd. 2:​19] [9, w99 11/15 p. 27 par. 4-5]

34. Man i gat gutpela tingting em i save skelim gut pastaim wanem ol samting inap kamap sapos em i bihainim wanpela pasin, na em i no save kirap kwik long bihainim nating wanpela nupela pasin maski planti man i mekim. [Snd. 14:15] [16, Baibel ritim bilong wik; lukim g94-E 12/8 p. 16 par. 1.]

35. Maski yumi ting olsem tok bilong wanpela man i stret na yumi inap bilipim, yumi mas harim gut tok bilong narapela pastaim na nau yumi ken skelim wanem tok i stret. [Snd. 18:17] [17, bsi01 p. 28 par. 36]