Mekim Amamas Bilong Yu Long Autim Tok i Kamap Bikpela
1 Olsem wanem? Yu kisim dispela amamas bilong autim gutnius long ol narapela long wok autim tok bilong yu? Sapos yumi no was gut, ol pasin nogut bilong dispela graun inap mekim na yumi pret long autim tok, na yumi lusim amamas bilong yumi. Taim yumi autim tok long ol teritori em ol man i no laik harim tok long en, dispela tu inap daunim amamas bilong yumi. Yumi ken mekim wanem na bai yumi inap kisim amamas long wok autim tok?
2 Holim Stretpela Tingting: Pasin bilong holim stretpela tingting inap helpim tru yumi. Wanpela rot bilong mekim olsem em long tingim tingim long bel gutpela wok bilong yumi long i stap olsem ol “wanwok bilong God.” (1 Ko. 3:9) Jisas tu i wok wantaim yumi. (Mt. 28:20) Na em i helpim yumi long rot bilong ol ensel. (Mt. 13:41, 49) Olsem na yumi ken bilip tru olsem God i stiaim wok bilong yumi. (KTH 14:6, 7) Olsem na maski ol man i harim tok bilong yumi o nogat, ol lain long heven i amamas tru long wok yumi mekim!
3 Redi Gut: Pasin bilong redi gut pastaim bai helpim yumi long kisim amamas long wok yumi mekim. I no olsem yumi mas lusim bikpela hap taim bilong redi long mekim wok autim tok, nogat. Yumi inap lusim sampela minit tasol long skelim wanpela samting yumi bai toktok long en long ol nupela magasin o long samting bilong tilim long mun. Makim wanpela tok long “Ol Tok Yu Ken Mekim Bilong Tilim Ol Nius” i stap long Wok Kingdom Bilong Yumi. Lukim pepa yumi kisim wantaim Wok Kingdom bilong Janueri 2002 “Ol Tok Yu Ken Mekim Long Taim Bilong Autim Tok,” o yu ken lukim buk Toktok Gut na makim wanpela gutpela kirap bilong tok. Sapos oltaim ol man bilong haus i save mekim wanpela tok na dispela i save pasim rot bilong yu long autim tok, orait redim gutpela bekim bilong givim long ol na bilong stiaim tingting bilong ol i go long wanpela tok ol i amamas long harim. Buk Toktok Gut inap helpim yumi long mekim olsem. Taim yumi mekim wok long ol dispela tul, dispela bai strongim yumi long amamas long mekim wok autim tok.
4 Beten Oltaim: Beten i bikpela samting bilong helpim yumi long amamas oltaim. Yumi mekim wok bilong Jehova, olsem na yumi mas askim em long spirit bilong em, na wanpela samting dispela spirit i save kamapim em pasin bilong amamas. (Ga. 5:22) Jehova bai givim yumi strong bilong mekim yet wok autim tok. (Fl. 4:13) Taim yumi beten long wok bilong yumi long autim tok, dispela bai helpim yumi long holim stretpela tingting taim ol hevi i painim yumi. (Ap. 13:52; 1 Pi. 4:13, 14) Sapos yumi pret, pasin bilong beten bai helpim yumi long strong yet long autim tok na amamas long wok bilong yumi.—Ap. 4:31.
5 Painim Ol Rot: Yumi bai amamas moa yet long wok bilong yumi long autim tok taim yumi bungim ol man na autim tok long ol. Sapos yu senisim sediul bilong yu na yu autim tok long ol haus long narapela taim long de, olsem long apinun samting, ating wok bilong yu bai kamapim gutpela samting. Long olgeta taim yu save bungim ol man, maski yu wokabaut long rot, o go long maket o stua, o raun long PMV, o wokabaut long pak. Olsem wanem? Yu inap redim sotpela kirap bilong tok na painim rot bilong toktok wantaim ol man i mekim gutpela pasin pren? O ating yu mekim wok mani o go long skul, olsem na long olgeta de yu save toktok wantaim ol narapela. Yu inap opim rot bilong autim tok sapos yu kamapim wanpela tok bilong Baibel bilong kirapim tingting bilong man long harim tok. Sampela gutpela tok yu ken mekim bilong autim tok i stap long pes 5 bilong Wok Kingdom Bilong Yumi bilong Janueri 2002. Ol dispela samting yu mekim inap helpim yu long kisim bikpela amamas long wok autim tok.
6 Pasin bilong amamas i save helpim yumi long sanap strong na karim ol hevi, olsem na em i bikpela samting long yumi mas holimpas dispela pasin! Sapos yumi mekim olsem, yumi bai kisim gutpela pe tru taim dispela wok i pinis—em wanpela wok yumi no inap mekim gen long bihain. Dispela gutpela pe yumi bai kisim inap helpim yumi long amamas long mekim wok autim tok.—Mt. 25:21.