Ol Famili i Stap Strong Long Ol Samting Bilong Spirit​​—⁠Long Wanem Rot?

¹ Yumi amamas long ol famili Kristen i “soim pasin bilong givim biknem long God long ol wanhaus bilong ol yet.” (1 Ti. 5:​4, King Jems Nupela Testamen) Tasol i gat planti samting nogut inap mekim na bilip bilong yumi i no strong moa, olsem na ol famili i mas wok strong long i stap strong yet long ol samting bilong spirit. Ol inap mekim dispela olsem wanem?

² Ol Het Bilong Famili​—⁠Bihainim Pasin Bilong Krais: Ol het bilong famili Kristen i mas bihainim pasin bilong Krais long ol wok ol i mekim bilong strongim famili. Jisas i bin kamapim pasin bilong em long laikim tru yumi taim em i givim laip bilong em olsem ofa, na i no dispela tasol, nogat. Oltaim em i wok long ‘givim kaikai na lukautim gut’ kongrigesen. (Ef. 5:​25-29) Ol gutpela papamama i bihainim dispela pasin, na ol i lukautim gut famili long ol samting bilong spirit long olgeta wan wan de. Olsem: Ol i mekim famili Baibel-stadi long olgeta wik, na taim rot i op ol i skelim gut sampela bikpela tok bilong spirit, na stretim ol hevi hariap.​​—⁠Lo 6:​6, 7.

³ Long Wok Autim Tok: Olgeta long famili i mas save olsem wok bilong autim tok long ol narapela long Jehova na laik bilong em, em i bikpela hap bilong lotu bilong ol. (Ais. 43:​10-12) Sapos yupela ol papamama i laik bai ol pikinini bilong yupela i stap olsem ol gutpela Witnes Bilong Jehova, yupela i mas kirap kwik long redim bel bilong ol long mekim wok autim tok. Toktok long i gat wanem ol as na yumi mas taitim bun taim yumi mekim dispela wok, na long autim tok long olgeta wik. (Mt. 22:​37-39) Stretim rot long ol i ken autim tok wantaim yu long olgeta taim.

⁴ Bilong helpim famili long pilim tru olsem wok autim tok i bikpela samting, makim hap taim long taim bilong famili-stadi long redim sampela tok bilong autim long ol man, na mekim traim long en. Skulim gut wan wan pikinini taim yupela i autim tok wantaim, na helpim ol long mekim gutpela wok moa inap long skel bilong krismas na save bilong ol. Taim yupela i autim tok pinis wantaim ol, toktok wantaim ol long ol i bin lukim gutpela pasin bilong Jehova i kamap klia long wanem rot. Kamapim sampela ekspiriens bilong strongim bilip bilong ol. Sapos planti taim ol famili ‘i traim pinis pasin Bikpela i save mekim long ol, na ol i save, Bikpela i gutpela tru,’ dispela bai helpim ol long pas gut moa wantaim Jehova, na strongim ol long sakim “olgeta pasin nogut.”​​—⁠1 Pi. 2:​1-3.

⁵ Long Ol Miting: Em i gutpela pasin tru long olgeta long famili i helpim narapela narapela long i go long olgeta miting bilong kongrigesen. Dispela pasin i gutpela moa taim wanpela long famili i pilim skin i les, o bel hevi, o wanpela samting i daunim em! Wanpela yangpela sista i tok: “Taim papa bilong mi i pinis long wok na kam long haus, skin bilong em i les. Tasol mi save tokim em long wanpela gutpela tok bai kamap long miting long apinun, na dispela i save strongim em long i go long miting. Na taim skin bilong mi i les, papa i save strongim mi long i go long miting.”​​—⁠Hi. 10:​24, 25.

⁶ Mekim Ol Samting Wantaim: Ol famili i mas mekim ol samting wantaim, olsem ol wok bilong haus. Ol i mas makim tu taim bilong mekim ol gutpela samting bilong kisim amamas. Olsem piknik, go raun long bus samting, o go lukim ol wanblut o pren. Ol dispela samting inap givim amamas long yupela na bihain tu yupela bai amamas long tingim bek ol dispela samting.​​—⁠Sav. 3:⁠4.

⁷ Ol strongpela famili Kristen i save daunim ol samting i save kamap long wan wan de na i laik bagarapim ol long ol samting bilong spirit. Ol i wok long pas gut moa wantaim Jehova, na long dispela rot ol i pilim tru strong em i save givim.​​—⁠Ef. 6:10.