Famili Kristen i Save Mekim Ol Samting Wantaim

“Yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.”​—⁠1 KORIN 1:10.

FAMILI bilong yu i stap wanbel olsem? O olgeta wan wan i bihainim laik bilong ol yet? Yupela i save wok wantaim long mekim ol samting? O yupela i save go nabaut long ol narapela narapela hap na yupela i no save stap wantaim? Dispela tok “famili” i makim ol wanhaus i pas gut wantaim.a Tasol planti famili i no save stap olsem. Wanpela man Briten i tok: ‘Long nau famili i no olsem wanpela lain i stap gut. Nogat. Famili i as bilong planti hevi.’ Olsem wanem long famili bilong yu? Sapos ol i no stap gut wantaim, ol inap long senis na kamap gutpela?

² Famili i mas i gat gutpela bos na bai ol i ken i stap wanbel. Papamama i mas stiaim ol, na sapos papa tasol o mama tasol i stap, em i mas mekim. Long bipo, taim famili i pas gut wantaim na lotu long Jehova, em i bin mekim gut long ol. Pikinini meri bilong Jepta, na Samson, na Samuel, 3-pela i bihainim gutpela pasin, long wanem, famili bilong ol i save lotu long Jehova. (Hetman 11:​30-40; 13:​2-25; 1 Samuel 1:​21-23; 2:​18-21) Timoti i bin poromanim Pol long raun na mekim wok misineri, na em i bin i stap gutpela Kristen, long wanem, lapun bubu Lois wantaim mama Yunis i bin lainim em long ol tok bilong Olpela Testamen, na em i kamap gutpela disaipel na misineri.​—⁠Aposel 16:​1, 2; 2 Timoti 1:5; 3:​14, 15; lukim tu Aposel 21:​8, 9.

Bilong Wanem Yumi Mas Wok Gut Wantaim?

³ Olgeta long famili i mas wok gut wantaim na bai narapela i ken save gut long tingting bilong narapela na mekim gut long em. Yumi mas pren gut wantaim na narapela i mas helpim narapela. Wanpela buk (Family Relations) i tok: ‘Nau yumi save, olgeta wan wan bilong strongpela famili i save helpim narapela na tingim em na amamas na toktok wantaim em, na famili inap stretim hevi i save kamap namel long ol, na ol i tingim ol samting bilong spirit.’

⁴ Sapos famili i stap olsem, haus bilong ol i no ken i stap olsem ples bilong i kam kisim kaikai tasol o ples slip tasol, nogat. Haus bilong ol i olsem ples i gat pasin sori i stap, na i singautim famili i kam na ol i ken malolo gut na stap isi na stap amamas na narapela bai tingim na helpim narapela na marimari na save gut long tingting bilong em. (Sindaun 4:​3, 4) Ol pikinini insait long haus bilong pisin ol i no save kol. Ol i amamas na i stap gut. Long haus bilong skopion i gat kros pait i stap. Famili i no ken i stap olsem. Ol i ken mekim wanem bilong kamap wanbel?

Famili i Mas Stadi Wantaim

⁵ Yumi mas bihainim tingting i stret na bai yumi ken lotu tru long Jehova. (Rom 12:⁠1) Yumi no ken larim ol samting nabaut i kirapim nating bel bilong yumi, olsem tok bilong ol lotu yumi harim long redio o televisen. Yumi mas stadi oltaim long Baibel na ol buk yumi kisim long ‘gutpela wokboi,’ na yumi mas tingim gut, na dispela yet i mas kirapim yumi long lotuim Jehova. (Matyu 24:45) Yumi kisim pasin Kristen, long wanem, yumi kisim tingting bilong Krais long ol samting yumi mas mekim taim hevi o traim i painim yumi, na Jehova i stap Bikpela Tisa bilong yumi long dispela samting.​—⁠Song 25:9; Aisaia 54:13; 1 Korin 2:⁠16.

⁶ Famili-stadi i save strongim ol Kristen long ol samting bilong spirit. Yu save wokim famili-stadi long wanem taim? Nogut yumi no makim wanpela taim stret na sampela taim yumi no mekim. Mas makim wanpela taim bilong mekim, na bihainim stret na bai ol i ken save wanem de na wanem aua em bai kamap na ol i ken bung wantaim na kisim amamas long ol samting bilong spirit. Inap 12,000 brata sista bilong ol famili Betel ol i stap, na ol i save, famili-stadi bilong ol i kamap long Mande long apinun. Mande long apinun i kamap pastaim long ol ailan long Pasifik na long Nu Silan, na nau Ostrelia na Japan na Taiwan na Hong Kong na Esia na Afrika na Yurop, na laspela em ol hap bilong Amerika. Ol i stap longwe longwe inap planti tausen kilomita, na famili-stadi bilong ol i kamap long planti tok ples, tasol ol i pilim olsem ol i stap olsem wanpela famili tasol. Yumi inap pilim olsem long famili-stadi bilong yumi tu.​—⁠1 Pita 2:17; 5:⁠9.

⁷ Aposel Pita i tok: “Nupela pikinini em i save laikim tumas susu. Olsem tasol yupela i mas laikim tumas long kisim gutpela susu i kam long God . . . Em dispela kain susu i save helpim spirit bilong yupela i kamap . . . strongpela long nupela laip God i givim long yupela, na bai yupela i stap gut wantaim God. Yupela i traim pinis pasin Bikpela i save mekim long yumi, . . . i gutpela tru.” (1 Pita 2:​2, 3) Em gutpela tok piksa bilong Pita! Em i kolim wanpela hap tok Grik e·pi·po·theʹsa·te, na wanpela buk (Linguistic Key to the Greek New Testament) i tok, insait bilong en i olsem “laikim tumas.” Pikinini animal i save wok strong long painim susu bilong mama, na ol pikinini bilong yumi ol man tu, na taim ol i wok long dring susu ol i stap bel isi. Yumi mas i gat wankain laik long kisim tok i tru. Wanpela saveman bilong tok Grik, em William Barclay, em i tok: ‘Kristen tru i amamas long lainim tok bilong Baibel; em i save dispela bai strongim bel bilong em.’

⁸ Papa i gat bikpela wok long bosim famili-stadi. Em i mas mekim na bai famili i amamas long en na olgeta inap kamapim sampela tok. Ol pikinini i mas save, dispela stadi i no bilong ol bikpela tasol, nogat; em i bilong ol tu. Papa i mas kamapim gut, na em i no ken tingting tasol long pinisim bikpela hap. Em i mas mekim na bai famili i ken pilim tru tok bilong Baibel, na sapos stadi i stori long ol samting i bin kamap long Palestain, papa i ken helpim ol long pilim tru ol dispela stori, i olsem ol i lukim tru long ai bilong ol. Papa i mas kirapim ol long redim gut stadi pastaim na painim ol stori bilong en na bai ol i ken kamapim long stadi. Olsem bai ol pikinini i ken “mekim wok bilong God na i kamap bikpela.”​—⁠1 Samuel 2:​20, 21.

Wok Wantaim Long Autim Tok

⁹ Jisas i tok: “Olgeta lain man i mas harim man i autim gutnius pastaim.” (Mak 13:10) Olsem na ol Kristen i mas autim gutpela tok bilong Kingdom bilong God long ol man. Sapos famili i mekim dispela wok wantaim, ol bai kisim amamas long en, na papamama i save amamas taim ol i lukim pikinini bilong ol i mekim. I gat 3-pela pikinini man, krismas bilong ol em 15 i go inap 21, na long olgeta Trinde taim skul i pinis long apinun, papamama i raun wantaim ol long autim tok, na long Sarere long moningtaim tu. Papa i tok: ‘Long dispela taim mitupela i skulim ol long sampela samting. Mipela i mekim na bai ol i amamas long dispela wok.’

¹⁰ Sapos famili i wok wantaim long autim tok na lainim ol man, ol inap kamapim gutpela wok. Sampela man i no laik harim tok, tasol ol i givim yau taim pikinini i autim tok long ol, na papamama i stap bilong helpim em. Tupela i ken lainim em na bai em i ken “kamap wokman tru, na bai God i laikim wok bilong” em na em i “no gat sem long ai bilong” God. Papamama i ken lukim pasin bilong pikinini long autim tok, i gutpela o nogat. Ol i ken wok long lainim em na strongim bilip bilong em, na em i ken lukim gutpela pasin bilong ol long autim tok. Long nau planti pasin raskol i stap long sampela hap, na sapos famili i wok wantaim long autim tok, ol i ken was gut na bai wanpela i no ken kisim bagarap.​—⁠2 Timoti 2:15; Filipai 3:⁠16.

¹¹ Pikinini inap save sapos papamama i giaman. Sapos tupela i no laikim tru tok bilong Baibel o wok bilong autim tok, pikinini i no inap givim bel long mekim. Sapos papa i no gat sik, na em i mekim Baibel-stadi wantaim pikinini long olgeta wik na em tasol, na em i no go autim tok, ating em bai kisim hevi long dispela pasin bilong em taim pikinini i bikpela.​—⁠Sindaun 22:6; Efesus 6:⁠4.

¹² Sapos famili “i stap wanlain tru long wankain tingting na wankain laik,” ating ol inap orait long helpim wanpela bilong ol long kamap painia long kongrigesen. Planti famili i bin mekim olsem, na ol i kisim amamas long wok bilong dispela painia, long wanem, em i mekim gutpela wok na sampela man i bin harim gut, na em i lain gut long autim gut tok.​—⁠2 Korin 13:11; Filipai 2:​1-4.

Wok Wantaim Long Stretim Hevi

¹³ Long nau “planti hevi nogut tru” i stap, na dispela i painim yumi olgeta. (2 Timoti 3:⁠1) Hevi i save kamap long ples wok, na long skul, na long olgeta hap, na long famili tu. Sik i painim sampela, na sampela i stap bel hevi, na dispela inap kamapim hevi insait long famili. Yumi ken mekim wanem long dispela samting? Sapos yumi abrusim ol narapela na givim baksait long ol na yumi no toktok wantaim ol, dispela i no inap stretim hevi. Yumi mas kamapim hevi bilong yumi long ol narapela na askim ol long helpim yumi. I no hatwok long mekim olsem sapos pasin sori i stap insait long famili.​—⁠1 Korin 16:14; 1 Pita 4:⁠8.

¹⁴ Ol dokta i save, sapos yumi klia long ol samting bilong givim sik long yumi, ol i no gat wok long oraitim sik bilong yumi. I olsem tu long ol hevi. Sapos yumi tokaut long hevi bilong yumi, famili inap helpim yumi na bai hevi i no ken i go bikpela. Sapos famili i gat bikpela hevi, ol i ken toktok wantaim long ol lo bilong Baibel na ating dispela inap stretim hevi. Sapos narapela i kros long narapela, ol inap stretim sapos famili i bihainim tok bilong Kolosi 3:​12-14: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela . . . i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. . . . Mas givim bel bilong yupela long ol arapela.”

Kisim Amamas Wantaim

¹⁵ Jehova em Man bilong amamas, na tok i tru em samting bilong amamas, na i helpim ol man long tingim gutpela samting bai kamap long bihain. Na amamas em i wanpela pasin em spirit i kamapim. Sapos man i win long pilai spot, em i amamas inap sotpela taim tasol, tasol amamas bilong Kristen i daun moa na i pulap tru long bel bilong em, long wanem, em i pas gut wantaim Jehova. Olsem na ol samting bilong spirit i as bilong dispela amamas. Sapos yumi bihainim ol samting bilong spirit, na yumi pas gut wantaim ol narapela, yumi inap painim dispela amamas.​—⁠Galesia 5:22; 1 Timoti 1:⁠11.

¹⁶ Olsem na yumi ol Witnes Kristen Bilong Jehova i no ken i stap olsem pes drai na i no amamas liklik, nogat. Lain bilong sampela lotu ol i olsem bel hevi na i pes drai, long wanem, bilip bilong ol i no samting bilong amamas long en. Na tu, Baibel i no as bilong ol bilip bilong ol. Ol famili bilong ol i no i stap amamas na mekim wok bilong God. Jisas i save yumi mas i gat amamas na bel isi na malolo. Wanpela taim em i “tokim ol aposel olsem, ‘Goan, yumi tasol i go long wanpela hap i no gat man, na bai yupela i ken malolo liklik.’ ”​—⁠Mak 6:​30-32; Song 126:​1-3; Jeremaia 30:​18, 19.

¹⁷ Ol famili tu i mas i gat taim bilong amamas. Wanpela papa i tok: “Mipela famili i save go long nambis, na pilai bal long pak, na go piknik long maunten, na sampela taim mipela i go autim tok inap wanpela de olgeta, olsem painia, na bihain mipela i wokim gutpela kaikai, na narapela i givim presen long narapela.”

¹⁸ Na papamama i ken kisim famili i go long banis i gat ol animal, o long ples pilai, o haus tumbuna, o ol ples i gat ol samting bilong lukim. O ol i ken wokabaut long bus na lukim ol pisin, o wok long gaden. Na papamama i ken kirapim famili long lain long pilaim musik o lain long narapela samting ol i ken mekim wok long en bihain. Papamama i mas skelim olgeta samting famili i mas mekim na makim hap taim tu bilong pilai wantaim. Sapos famili i pilai wantaim, dispela bai helpim ol long pas gut wantaim.

¹⁹ Long nau planti yangpela i no laik bai papamama i bosim ol long painim ol amamas. Ol i laik bihainim laik bilong ol yet. Tru, i no gat rong long yangpela i gat sampela samting bilong givim amamas long em, tasol i no gutpela sapos dispela samting i pulim em na em i pas long dispela na bai em i no bung wantaim famili. Yumi mas bihainim tok bilong Pol olsem: “No ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.”​—⁠Filipai 2:⁠4.

²⁰ Taim yumi lukim wanpela famili i sindaun wantaim long miting o long kibung, em i gutpela tru, a? Ol bikpela pikinini inap helpim ol liklik, olsem na ol bikpela i no ken bung wantaim wanlain bilong ol na i go raun o sindaun long baksait na ol i no givim bel long harim ol tok. Na taim famili i kirap lusim ples na i go long kibung, na taim ol i kam bek tu, ol i ken kisim amamas long rot tu. Ol i ken toktok long wanem rot ol bai bihainim, na wanem ol samting ol bai lukim, na ol bai slip we. Long taim bilong Jisas, ating ol famili i bin kisim amamas long taim ol i wokabaut i go long kibung long Jerusalem, a?​—⁠Luk 2:​41, 42.

Pas Gut Wantaim, Em Gutpela

²¹ I hatwok long ol marit o famili i ken stap wanbel wantaim. I gat bikpela wok long mekim na bai marit na famili i ken wok gut. Sampela i les na ol i katim marit na ol i maritim narapela, tasol wankain hevi i kamap gen long namba 2 o namba 3 marit bilong ol. Tasol Kristen i mas givim bel long bihainim lo bilong Baibel long mekim pasin sori long poroman na givim gutnem long em. Bilong famili i ken i stap wanbel, narapela i mas helpim narapela, nogut em i tingim ol samting bilong em yet tasol. Wanpela saveman long marit em i tok: ‘I gat 4-pela samting na marit i ken wok gut, em i olsem: Narapela i mas harim tok bilong narapela, na tok sori long samting nogut em i mekim, na helpim na strongim em, na mekim pasin sori long em.’ Ol lo bilong Baibel i as bilong ol dispela samting, na em inap strongim marit na bai i no ken bagarap.​—⁠1 Korin 13:​1-8; Efesus 5:33; Jems 1:⁠19.

²² Sapos yumi bihainim tok bilong Baibel, dispela i gutpela as na bai famili i ken i stap wanbel na pas gut wantaim. Na sapos ol famili i stap olsem, dispela i as na kongrigesen i ken i stap strong long ol samting bilong spirit. Sapos yumi wanbel long mekim ol samting i litimapim nem bilong Jehova, em bai mekim gut long yumi.

[Ol Futnot]

Yu Tingim Yet?

◻ Bilong wanem famili i mas mekim ol samting wantaim?

◻ Bilong wanem i mas i gat famili-stadi?

◻ Bilong wanem papamama i mas raun wantaim pikinini na autim tok?

◻ Bilong wanem famili i mas toktok wantaim sapos hevi i kamap namel long ol?

◻ Bilong wanem famili i no ken i stap pes drai olsem ol i no amamas?

[Askim Bilong Stadi]

1. Planti famili i stap wanbel, o olsem wanem?

2. Husat long taim bilong Baibel ol i bilong ol gutpela famili na ol i kamap gutpela man o meri?

3, 4. (a) Gutpela famili i mas i stap olsem wanem? (b) Famili i ken mekim wanem na bai haus bilong ol i no stap olsem ples slip tasol?

5. Yumi mas wokim wanem samting bilong yumi na bai yumi ken lain long trupela lotu?

6. Wanem wanpela kain famili-stadi yumi ken bihainim pasin bilong en?

7. Olsem Pita i tok, yumi mas ting olsem wanem long tok i tru bilong Baibel?

8. Wanem bikpela wok bilong papa long bosim famili-stadi?

9. Olsem wanem famili i ken amamas long autim tok?

10. Papamama i ken mekim wanem bilong helpim pikinini long autim tok?

11. Wanem samting inap mekim na bai pikinini i no laik givim bel long autim tok?

12. Wanem gutpela samting famili i ken mekim na bai Jehova i mekim gut long ol?

13, 14. (a) Wanem samting inap putim hevi long famili na ol i no pas gut wantaim? (b) Famili i ken mekim wanem na bai planti hevi i no ken kamap?

15, 16. (a) Wanem pasin i mas i stap insait long famili Kristen? (b) Wanem kain man i stap long sampela lotu? Bilong wanem ol i olsem?

17, 18. Wanem sampela samting famili i ken mekim bilong kisim amamas?

19. Wanem pasin ol yangpela bilong nau i mekim na em inap mekim nogut long famili?

20. Olsem wanem famili i ken kisim amamas long taim bilong kibung?

21. (a) Yumi mas mekim wanem na bai marit i ken stap gutpela? (b) Wanem 4-pela samting inap helpim marit?

22. Sapos famili i stap wanbel, wanem ol gutpela samting i ken kamap?

[Piksa long pes 17]

Famili bilong yu i save bung wantaim na kaikai?

[Piksa long pes 18]

Famili i ken malolo na raun na kisim amamas wantaim